Iopu
22 Ona tali mai lea o Elifasa le Timanu, ua faapea mai:
2 “Pe e aogā ea le tagata i le Atua,+
E pei ona aogā iā te ia o lē ua iai le tofā mamao?
3 Pe e fiafia ea Lē e ona le malosi uma lava ina ua e amiotonu,+
Pe e aogā foʻi iā te ia pe a lē taʻuleagaina lou ala?+
4 Pe e aʻoaʻia ea oe e ia ona o lou faaaloalo,
Pe e te lua ō atu ea ma ia i le faamasinoga?+
5 Po ua lē tele ea lou leaga,+
Ma po o le a faamutaina ea au mea sesē?
6 Auā ua e faoa fua mai i ou uso mea e faamau ai le tautoga,+
Ma ua e avea foʻi ofu o tagata matitiva.
7 Ua e lē avatua i lē ua vaivai se vai e inu ai,
Ua e taofia foʻi le meaʻai mai i lē o loo fia ʻai.+
8 O le tagata malosi e fai mo ia le laueleele,+
E mau ai foʻi lē ua faamamaluina ona o le faaituʻau.
9 Ua e aauina ese atu fafine ua oti a latou tane e aunoa ma ni mea,
Ua faavaivaia foʻi lima o tamaiti ua leai ni o latou tamā.+
10 O le mea lea ua siʻomia ai oe i mailei manu,+
Ua faaatuatuvaleina foʻi oe i le mataʻu faafuaseʻi.
11 Po o le pōuliuli ina ia e lē iloa ai se mea,
Ma ua lofia foʻi oe i vai e tele.
12 Po ua lē maualuga ea le Atua e pei o le lagi?+
Ia vaai atu i fetu uma,+ ua maualuluga lava.
13 A ua e faapea mai: ‘O le ā moni lava e silafia e le Atua?
Pe e mafai ea ona ia faamasino e ati atu i le pogisa tele?
14 Ua punitia o ia i ao ua lē mafai ai ona ia silasila mai,
Ma ua fealuaʻi o ia i le lapotopoto o le lagi.’
15 Pe e te tumau pea i le ala o aso anamua
Na ui ai tagata e faia mea e tigā ai,
16 O tagata ia ua seʻiesea a o leʻi oo i o latou taimi,+
O ē ua tafiesea lo latou faavae+ e pei o le vaitafe,
17 O ē ua fai atu i le Atua moni: ‘Inā liliuese ia mai iā i matou!+
O le ā foʻi se mea e faia e Lē e ona le malosi uma lava faasaga iā i matou?’
18 Ua faatumuina e ia lava o latou fale i mea lelei;+
Ua mamao ese foʻi mai iā te aʻu fautuaga a ē e amioleaga.+
19 E vāai o ē e amiotonu ma e olioli ai,+
E tauemu foʻi o lē ua lē sala iā i latou:
20 ‘E moni e fano o ē e tetee mai iā i tatou;
E ʻaina foʻi e le afi mea na totoe o i latou.’
21 Faamolemole, ia e faamasani iā te ia ma tausi le filemu;
Ona oo mai ai lea o mea lelei iā te oe.
22 Ia e talia le tulafono mai i lona fofoga,
Ma ia teu i lou loto ana afioga.+
23 Afai e te toe foʻi atu i Lē e ona le malosi uma lava,+ e toe atiina aʻe oe;
Afai foʻi e te faamamaoina ese le amiolētonu mai i lou faleʻie,
24 Ma pe afai e te lafoaʻi le auro tautele i le efuefu
Ma le auro o Ofeira+ i le papa i le ālia,
25 Ona avea ai lea o Lē e ona le malosi uma lava e pei o se auro tautele iā te oe,
Ma siliva, ma mea e sili ona lelei iā te oe.+
26 Ona e matuā fiafia ai lea i Lē e ona le malosi uma lava,+
E tepa aʻe foʻi ou mata i le Atua.+
27 E te ʻaiʻoi atu iā te ia ona faafofoga mai lea o ia iā te oe;+
E faataunuuina foʻi au tautoga.+
28 O le mea foʻi e te filifili e fai, e faatumauina lea mo oe;
E susulu mai le malamalama i ou ala.+
29 E iai le faalumaina pe a e tautala ma le faasausili;+
A o lē e faamaulaloina, e faaolaina e ia.+
30 E laveaʻiina e ia le tagata e lē sala,+
E laveaʻiina foʻi oe ona o le mamā o ou lima.”+