Mareko
2 Ina ua mavae ni nai aso, ona toe maliu atu lea o ia i Kapanaumi ma ua logo atu le tala ua iai o ia i le fale.+ 2 Ona lolofi mai lea o le toʻatele o tagata, ma ua lē ofi ai le potu, ua leai se avanoa e oo lava i le faitotoʻa, ona ia aʻoaʻo atu lea o le upu.+ 3 Ona sii mai ai lea e tagata e toʻafā iā te ia, o se tamāloa ua pē le tino.+ 4 Ae ona o le tumutumu o tagata, ua lē mafai ai ona latou oo mai iā Iesu. Ua latou aveese le taualuga o le mea ua iai o ia, ona faapu lea o le faʻalo, ma tuutuu ifo ai i lalo le moega o loo taoto ai le tamāloa e pē le tino.+ 5 Ua silafia e Iesu lo latou faatuatua,+ ona ia fetalai atu lea i le tagata maʻi: “Loʻu atalii e, ua faamagaloina au agasala.”+ 6 O loo nonofo ai foʻi i inā nisi o le ʻautusiupu, ma ua manatunatu ifo i o latou loto:+ 7 “Aiseā ua tautala ai faapea lenei tagata? Ua fai upuleaga o ia. O ai ea e mafai ona faamagaloina agasala, ua na o le toʻatasi, o le Atua lea?”+ 8 Ae ua silafia e Iesu i lona lava finagalo o latou manatunatuga ma ua fetalai atu: “Aiseā ua outou manatunatu ai i nei mea i o outou loto?+ 9 Auā o lē fea e sili ona faigofie, o le fai atu i le tagata maʻi, ‘Ua faamagaloina au agasala,’ po o le fai atu, ‘Ia tū i luga ma ave lou moega ma savali’?+ 10 Ae peitaʻi, ina ia outou iloa ua i le Atalii o le tagata+ le pule i le lalolagi e faamagalo ai agasala,”+ ona ia fetalai atu lea i le tagata maʻi: 11 “Ou te fai atu iā te oe, Inā tū ia i luga ma ave lou moega, ma e alu i lou aiga.”+ 12 Ona tū lea o ia i luga, ua ave i lona moega ma savali ane loa i luma o i latou uma.+ O lea, ua taufaiofo ai i latou uma ma faamamaluina ai le Atua e faapea: “Tatou te leʻi vaaia lava se mea faapenei.”+
13 Ua toe maliu atu o ia e lata ane i le sami; ma ua lolofi atu pea le toʻatele o tagata, ma ua ia aʻoaʻo atu iā i latou. 14 A o maliu ane o ia, ua ia silafia ai Levi+ le atalii o Alefaio o loo nofo i le ofisa aolafoga, ua ia fetalai atu iā te ia: “Ia e mulimuli mai iā te aʻu.” Ona tū lea o ia i luga ma mulimuli atu iā te ia.+ 15 Mulimuli ane, a o taoto o ia e taumafa i le fale, e toʻatele le ʻauaolafoga+ ma tagata agasala ua taooto faatasi ma Iesu ma ona soo, ma e toʻatele i latou ua amata foʻi ona mulimuli atu iā te ia.+ 16 Ae ina ua vāai atu le ʻautusiupu a le ʻau Faresaio ua aai faatasi Iesu ma tagata agasala ma le ʻauaolafoga, ona latou faapea atu lea i ona soo: “Pe e aai faatasi ea o ia ma le ʻauaolafoga ma ē agasala?”+ 17 Ua faafofoga i ai Iesu i lenei mea, ona ia fetalai atu lea: “E lē manaʻomia e tagata malolosi se fomaʻi, ae na o ē e mamaʻi. Auā ua ou sau e valaau i ē agasala ae lē o ē e amiotonu.”+
18 E masani ona anapopogi soo o Ioane ma le ʻau Faresaio. Ona latou ō mai lea ma fesili mai iā te ia: “Aiseā e anapopogi ai soo o Ioane ma soo o le ʻau Faresaio, ae lē anapopogi ou soo?”+ 19 Ona fetalai atu lea o Iesu iā i latou: “E lē anapopogi uō a le alii faaipoipo a o faatasi ai o ia ma i latou,+ a ea? E lē mafai ona anapopogi i latou a o faatasi ai ma le alii faaipoipo.+ 20 Ae e oo mai aso e aveesea ai le alii faaipoipo mai iā i latou, ona latou anapopogi ai lea i lenā aso.+ 21 E leai se tasi e na te fonoina se ofu tele tuai i se fasiʻie fou. Auā a faia faapea, o le a atili ai ona telē le masae o le ofu tele tuai pe a mimigi le fasiʻie fou.+ 22 E lē utuina foʻi e se tagata le uaina fou i fagupaʻu tuai, auā a faia faapea, ona pāpā ai lea o fagupaʻu ma masaa ai le uaina, ma lē toe aogā ai le fagupaʻu.+ Ae e masani ona utu e tagata le uaina fou i fagupaʻu fou.”+
23 Ua agaʻi atu o ia i le togāsaito i le sapati, ae ua savavali atu ona soo ma tau+ mai fuifui saito.+ 24 Ua fai mai le ʻau Faresaio iā te ia: “Faauta! Aiseā ua latou faia ai le mea e sā i le sapati?”+ 25 Ua ia fetalai atu iā i latou: “Tou te leʻi faitau ea i le mea na faia e Tavita+ ma tagata na iā te ia, ina ua fia aai, ae e leai ni a latou meaʻai?+ 26 I le tala iā Aviata+ le faitaulaga sili, pe na lē ulu atu ea Tavita i le fale o le Atua, ma ʻai i falaoa e laulauina i luma o le Atua,+ o se mea e faasā+ ona ʻai ai se tagata vaganā ai ositaulaga, ma na ia avatu foʻi i ē na faatasi ma ia?”+ 27 O lea, ua ia fetalai atu ai: “Ua faia le sapati mo le tagata,+ ae e leʻi faia le tagata mo le sapati.+ 28 O lea la, o le Atalii o le tagata, o le Alii foʻi ia o le sapati.”+