Teuteronome

12 “O tulafono+ nei ma iʻuga o faamasinoga+ e ao ona outou tōʻaaga e tausia+ i le laueleele o le a tuuina mai iā te outou e Ieova le Atua o o outou augātamā e fai mo outou, i aso uma e tou te ola ai i le fogāeleele.+ 2 E tatau ona outou matuā faatamaʻia+ nofoaga uma o loo auauna ai nuu ia e tou te faatoʻilaloina i o latou atua, i mauga maualuluga ma aʻega ma lalo o laau lauolaola uma.+ 3 E ao ona outou tala i lalo o latou fata faitaulaga+ ma nutililii o latou poutū paia,+ ia susunu foʻi i le afi o latou pou paia,+ ma talepe i lalo tupua ua tā+ o o latou atua, ma e ao foʻi ona outou soloiesea o latou igoa mai i lea mea.+

4 “Aua neʻi outou faia ia mea iā Ieova lo outou Atua,+ 5 ae o le nofoaga o le a filifilia e Ieova lo outou Atua mai i o outou ituaiga uma e tuu i ai lona suafa ina ia iai pea, ia outou saʻili i ai ma ō atu i ai i inā.+ 6 O i inā e ao ona outou avatu i ai a outou taulaga mū,+ o a outou taulaga, o a outou sefuluaʻi,+ o le foaʻi a o outou lima,+ o a outou taulaga o tautoga,+ o a outou taulaga tauofo+ ma ulumatua o a outou lafu povi ma a outou lafu mamoe.+ 7 E tatau ona outou aai i inā i luma o Ieova lo outou Atua,+ ma fiafia i mea uma tou te faia,+ o outou ma o outou aiga auā ua faamanuia oe e Ieova lou Atua.

8 “Aua tou te faia mea uma o loo tatou faia i inei i le asō, ua taʻitasi ma faia mea ua saʻo i lona lava manatu,+ 9 auā tou te leʻi oo atu i le nofoaga e nonofo+ ai ma le tofi lea o le a avatu e Ieova lou Atua iā te oe. 10 E tatau ona outou sopoʻia atu Ioritana+ ma nonofo i le laueleele ua tuuina mai e Ieova lo outou Atua iā te outou e fai mo outou,+ ma na te avatu foʻi iā te outou le mapusaga mai i o outou fili o loo siʻomia ai, ma e tou te nonofo ma le saogalemu.+ 11 O le nofoaga+ o le a filifilia e Ieova lo outou Atua ia iai lona suafa, o i inā o le a outou avatu i ai mea ua ou poloaʻi atu ai iā te outou, o a outou taulaga mū,+ o a outou taulaga, o a outou sefuluaʻi,+ ma foaʻi+ a o outou lima, o mea uma ua outou filifilia mo a outou taulaga o tautoga+ o le a outou tautō ai iā Ieova. 12 E ao ona outou fiafia i luma o Ieova lo outou Atua,+ o outou ma o outou atalii, o o outou afafine, o a outou tane pologa, o a outou teine pologa ma le sa Levī o loo i totonu o outou aai, auā e leai sana vaega po o sona tofi faatasi ma outou.+ 13 Ia leoleo iā te oe ina neʻi e ofo atu au taulaga mū i so o se isi nofoaga e te vaai i ai.+ 14 Ae tau lava o le nofoaga o le a filifilia e Ieova mai i se tasi o ou ituaiga, e te fai ai au taulaga mū, ma o i inā foʻi e ao ona e faia ai mea uma ua ou poloaʻi atu ai iā te oe.+

15 “Peitaʻi pe a e matuā fia ʻai i se aano o se manu e mafai ona e fasia se manu,+ e ao ona e ʻai i le aano o le manu, e tusa ai ma le manuia mai iā Ieova lou Atua ua ia tuuina mai iā te oe, i totonu o ou aai. E mafai e le tagata e lē mamā+ ma le tagata e mamā ona ʻai ai, e pei ona ʻaina o le manu o le sevi ma le ʻaila.*+ 16 A o le toto, aua neʻi outou aai ai.+ E ao ona e sasaa i le palapala e pei o le vai.+ 17 E lē faatagaina ona e ʻai le sefuluaʻi o au fatu i totonu o ou aai,+ po o lau uaina fou, po o lau suāuu, po o ulumatua o au lafu povi ma au lafu mamoe,+ po o se tasi o au taulaga o tautoga e te tautō ai po o au taulaga tauofo+ po o foaʻi a ou lima.+ 18 Ae e te ʻai ai i luma o Ieova lou Atua, i le nofoaga o le a filifilia e Ieova lou Atua,+ o oe ma lou atalii ma lou afafine, o lau tane pologa, o lau teine pologa ma le sa Levī o loo i totonu o ou aai; ma e ao ona e fiafia+ i luma o Ieova lou Atua i mea uma e te faia. 19 Ia faaeteete neʻi e tuulafoaʻiina le sa Levī+ i aso uma e te mau ai i lou fanua.

20 “Pe a faalauteleina e Ieova lou Atua lou laueleele,+ e pei ona ia folafola mai ai iā te oe,+ ma e faapea ane, ‘Ou te fia ʻai i se aano o manu,’ auā ua e matuā fia ʻai i le aano o manu, o so o se taimi e te matuā fia ʻai ai, e mafai ona e ʻai i aano o manu.+ 21 Afai e mamao mai iā te oe le nofoaga lea e filifilia e Ieova lou Atua e tuu ai lona suafa,+ e ao ona e fasia ni manu mai i lau lafu povi po o lau lafu mamoe ua foaʻi atu e Ieova iā te oe, e pei ona ou poloaʻi atu ai iā te oe, ma e ao ona e ʻai i totonu o ou aai po o le ā lava le taimi e te matuā fia ʻai ai.+ 22 E pei ona ʻaina o le manu o le sevi ma le ʻaila,+ e faapea foʻi ona e ʻai o na mea: e mafai ona ʻai ai le tagata e lē mamā+ ma le tagata e mamā. 23 Ia e maumauaʻi e aua neʻi ʻaina le toto,+ auā o le toto o le ola lea+ ma aua neʻi ʻaina le ola* faatasi ma le aano. 24 Aua e te ʻai ai. E ao ona e sasaa i le palapala e pei o le vai.+ 25 Aua e te ʻai ai ina ia sologa lelei ai mea mo oe+ ma ou atalii pe a mavae atu oe, auā o le a e faia le mea ua saʻo i le silafaga a Ieova.+ 26 E ao ona e ave na o mea paia+ ia o le a fai mo oe e fai ai au taulaga, ma au taulaga o tautoga,+ e ao foʻi ona e alu atu i le nofoaga lea o le a filifilia+ e Ieova. 27 E ao ona e ofo atu au taulaga mū,+ o le aano ma le toto+ i luga o le fata faitaulaga a Ieova lou Atua; e ao foʻi ona e sasaa le toto o au taulaga i tala ane o le fata faitaulaga a Ieova+ lou Atua, a o le aano e te ʻaina.

28 “Ia uaʻi atu ma ia e usiusitaʻi i nei upu uma ua ou poloaʻi atu ai iā te oe,+ ina ia sologa lelei ai mea mo oe+ ma ou atalii i aso uma lava pe a mavae atu oe, auā o le a e faia le mea ua lelei ma saʻo i le silafaga a Ieova lou Atua.+

29 “Pe a faaumatia e Ieova lou Atua mai i ou luma nuu ia e te alu atu e faatoʻilaloina,+ e ao ona e faatoʻilaloina i latou ma nofo ai i o latou laueleele.+ 30 Ia leoleo iā te oe lava neʻi maileia oe ma mulimuli atu iā i latou,+ pe a mavae ona faaumatia i latou mai i ou luma, ina neʻi e fesili foʻi e faatatau i o latou atua e faapea, ‘E faapefea ona auauna nei nuu i o latou atua? O aʻu foʻi ou te faia faapea.’ 31 Aua e te faia faapea iā Ieova lou Atua,+ auā o mea uma e inosia e Ieova ma ua ia ʻinoʻino i ai, ua latou faia i o latou atua, auā ua masani ona latou susunuina o latou atalii ma o latou afafine i le afi i o latou atua.+ 32 O upu uma ou te poloaʻi atu ai iā te outou, o mea ia e ao ona outou tōʻaaga e fai.+ Aua tou te faaopoopo se upu pe toese se upu mai i ia upu.+