Teuteronome

22 “Aua neʻi e ʻaloese pe a e iloa atu ua sē le povi poʻa a lou uso po o lana mamoe.+ E ao lava ona e toe taʻitaʻiina atu ia manu i lou uso.+ 2 Afai e lē o latalata mai lou uso iā te oe ma e te lē iloa o ia, ia e aumaia le manu i lou fale, ia tuu pea iā te oe seʻia saʻilia e lou uso lana manu. Ia e toe faafoʻi atu iā te ia lana manu.+ 3 Ia faapea foʻi ona e faia i lana asini, ia faapena foʻi ona e faia i lona ofu tele, ia faapena foʻi ona e faia i so o se mea a lou uso ua leiloa, lea ua leiloa mai iā te ia ae ua e mauaina. Aua e te ʻaloese mai ai.

4 “Aua neʻi e ʻaloese pe a e iloa le asini a lou uso po o lana povi poʻa ua paʻū i le auala. E ao lava ona e fesoasoani iā te ia e faatutū i luga na manu.+

5 “Aua neʻi ofu se fafine i ofu o se tamāloa, aua foʻi neʻi ofu se tamāloa i ofu o se fafine;+ auā e inosia e Ieova lou Atua so o se tasi e faia ia mea.

6 “Afai e te tau atu i se faamoega o se manulele, i luga o se laau po o le laueleele, ua iai ni toloaʻi+ po o ni ona fua, ma o loo nofo ai i luga le tinā i le toloaʻi po o ona fua, aua e te ave le tinā faatasi ma lana toloaʻi.+ 7 E ao lava ona e faasola le tinā, ae ave ma oe lana toloaʻi; ina ia sologa lelei ai mea mo oe, ma faaumiumi ai ou aso.+

8 “Afai e te fausia se fale fou, ia e fausia foʻi ma se puipui e siʻo ai le taualuga,+ neʻi e nofosala i le faamasaatoto pe afai e paʻū ai se tasi mai i lou fale.

9 “Aua neʻi e lūlūina ni fatu o ituaiga eseese se lua i lou togāvine,+ neʻi avatu o fua uma mai i fatu na e lūlūina atoa ma fua o lau togāvine i le faleʻie paia.

10 “Aua e te tuu faatasia le povi poʻa ma se asini e suatia le fanua.+

11 “Aua neʻi e ofuina ni ofu ua lalaga faatasi i le fulufulu mamoe ma le ʻie lino.+

12 “Ia e faia mo oe ni teuteu e faia i filo e tautau mai i pito e fā o lou ofu o loo e ofu ai.+

13 “Afai e faaipoipo se tamāloa i se fafine ma feusuaʻi ma ia, ma ua oo ina ʻinoʻino iā te ia,+ 14 ma ua ia tuuaʻia o ia i amioga matuā leaga lava ma ua ia taʻuvalea lona igoa,+ ma faapea mai, ‘O le fafine lenei na ou faaipoipo i ai, na ou feusuaʻi ma ia, ae ou te leʻi mauaina ni faamaoniga o lona teine muli’;+ 15 ona avatu lea e le tamā ma le tinā o le teine le faamaoniga o le teine muli o le teine i toeaina o le aai o loo i le faitotoʻa o le aai;+ 16 e ao i le tamā o le teine ona fai atu i toeaina, ‘Na ou avatu loʻu afafine i lenei tamāloa e fai ma ana avā, ae o lea ua ʻinoʻino+ o ia iā te ia. 17 A o lenei ua ia tuuaʻia o ia i amioga matuā leaga lava+ e faapea: “Ua ou iloa e leai ni faamaoniga o le teine muli o lou afafine.”+ O le faamaoniga lenei o le teine muli o loʻu afafine.’ E ao ona la fofola le ofu tele i luma o toeaina o le aai. 18 E ao i toeaina+ o lenā aai ona ave le tamāloa ma aʻoaʻi iā te ia.+ 19 E ao ona latou faasala iā te ia i le selau sekeli siliva ma avatu i le tamā o le teine, auā ua ia taʻuvaleaina le igoa o se teine muli o Isaraelu;+ ma e avea pea o ia ma ana avā. E lē mafai ona teteʻa* ma ia i aso uma e ola ai o ia.

20 “Peitaʻi afai e moni lenei mea, ua lē maua se faamaoniga o le teine muli o le teine,+ 21 e ao ona latou aumai le teine i le faitotoʻa o le fale o lona tamā, ma fetogia o ia i maa e tamāloloa o lona aai ma oti ai o ia, auā ua ia faia se amioga matagā+ i Isaraelu i le faia o amioga faatalitane i le fale o lona tamā.+ O lea, e ao ona e aveesea le mea leaga mai iā te oe.+

22 “Afai e maua se tamāloa o momoe ma se avā a le tasi tamāloa,+ ia fasiotia i laʻua uma, o le tamāloa na momoe ma le fafine atoa ma le fafine.+ O lea, e ao ona e aveesea le mea leaga mai iā Isaraelu.+

23 “Afai e iai se teine muli ua faamau ma se tane,+ ae ua maua e se isi tamāloa o ia i le aai ma ua momoe ma ia,+ 24 ia outou aumaia foʻi i laʻua uma i le faitotoʻa o lenā aai ma fetogia i laʻua i maa ina ia feoti ai, o le teine ina ua lē ʻeʻē i le aai, a o le tamāloa i lona faalumaina o le avā a lona tuaoi.+ O lea, e ao ona e aveesea le mea leaga mai iā te oe.+

25 “Afai o le fanua na maua ai e le tamāloa le teine ua faamau, ma ua toso e le tamāloa o ia ma la momoe, e ao ona oti tau lava o le tamāloa na momoe ma ia, 26 ae aua neʻi faia se mea i le teine. E leai se agasala a le teine e tatau ai ona oti o ia, auā e tutusa lenei mea ma le tulaʻi o le tamāloa e faasagatau i lona tuaoi ma fasiotia lava lenā tagata.+ 27 Auā na ia maua o ia i le fanua. Na ʻeʻē le teine ua faamau ae ua leai se isi e laveaʻiina o ia.

28 “Ae afai e maua e se tamāloa se teine, o se teine muli e leʻi faamau, ua ia toso o ia ma la momoe,+ ma ua maua i laʻua,+ 29 e ao i le tamāloa na momoe ma le teine ona avatu le lima sefulu sekeli siliva+ i le tamā o le teine, ma e fai o ia ma ana avā ona ua ia faalumaina o ia. E lē mafai ona teteʻa ma ia i aso uma e ola ai o ia.+

30 “Aua neʻi ave e se tamāloa le avā a lona tamā, ina neʻi aveesea* e ia le ʻie o lona tamā.+