Teuteronome

24 “Afai e ave e se tamāloa se fafine ma faaipoipo iā te ia ma fai ma ana avā, afai foʻi ua lē fiafia o ia i le fafine auā ua ia iloa ua leaga se mea ua ia faia,+ e ao ona ia tusia se tusi e faamaonia ai ua teteʻa+ ma ia, ia tuu i lona lima ma tuliese o ia mai i lona fale.+ 2 Ia alu ese o ia mai i lona fale ma alu atu ma nonofo ma se isi tamāloa.+ 3 Afai foʻi e ʻinoʻino le tamāloa mulimuli iā te ia ma tusia se tusi e faamaonia ai ua teteʻa ma ia, ma tuu i lona lima ma tuliese o ia mai i lona fale, po ua oti le tamāloa mulimuli o lē na faaipoipo iā te ia, 4 e lē mafai e le tamāloa muamua o lē na faateʻa iā te ia, ona toe ave o ia e fai ma ana avā ina ua uma ona faaleagaina o ia;+ auā e inosia e Ieova lenā mea, aua e te faatupuina le agasala i le laueleele ua tuuina mai e Ieova lou Atua iā te oe e fai ma ou tofi.

5 “Afai e faatoʻā faaipoipo se tamāloa ma sana avā,+ aua neʻi alu o ia i le taua pe avatu se isi galuega iā te ia e fai. E tatau ona nofo saʻoloto o ia i lona fale mo se tausaga, ma ia faafiafia i lana avā lea ua ia faaipoipo i ai.+

6 “Aua e te ave se mea e olo ai fatu po o se maaolo i luga, e fai ma mea e faamau ai se aitalafu,+ auā o lona ola lea ua ave e fai ma mea e faamau ai le aitalafu.

7 “Afai ua maua se tasi ua ia ave faamalosia+ se isi o ona uso o le fanauga a Isaraelu, ua agaleaga iā te ia ma faatau atu o ia,+ ia fasiotia lenā tagata na ave faamalosia lona uso. E ao ona e aveesea le mea leaga mai iā te oe.+

8 “Ia e leoleo iā te oe i le maʻi o le lepela,+ ia e toʻaga e faia mea uma ua faatonu mai e ositaulaga, o le ʻau sa Levī iā te outou.+ E ao ona outou tōʻaaga+ e fai e pei ona ou poloaʻi atu ai iā i latou. 9 Ia manatua le mea na faia e Ieova lou Atua iā Miriama i le ala, ina ua outou ō ese mai i Aikupito.+

10 “Afai e te nonō atu i lou tuaoi so o se mea,+ aua neʻi e ulu atu i lona fale e aumai le mea ua faamau ai lana aitalafu.+ 11 Ia e tū i fafo, ma e ao i le tagata o lē na e nonō atu i ai ona aumai i fafo iā te oe le mea ua faamau ai lana aitalafu. 12 Afai ua pagatia le tamāloa, aua neʻi e alu ma oe i lou moega le mea ua faamau ai lana aitalafu.+ 13 E ao lava ona e faafoʻi atu iā te ia le mea ua faamau ai lana aitalafu i le taimi lava e goto ai le lā,+ e ao foʻi ona alu o ia i lona moega ma lona ofu,+ e faamanuia+ o ia iā te oe; e avea foʻi lea mea ma amiotonu iā te oe i luma o Ieova lou Atua.+

14 “Aua e te faapiʻopiʻo ona fai se totogi o sē na e faafaigaluegaina o lē e pagatia ma mativa, e tusa po o ou uso, po o se tagata ese o aumau i lou laueleele, i totonu o ou aai.+ 15 E ao ona avatu iā te ia lona totogi+ e tusa ma lona aso a o leʻi goto le lā, auā ua pagatia ma o loo naunau o ia i lona totogi; ina ia lē alaga atu o ia iā Ieova ona o oe,+ ma avea ma mea e te agasala ai.+

16 “Aua neʻi fasiotia tamā ona o a latou fanau, aua foʻi neʻi fasiotia fanau ona o o latou tamā.+ Ia fasiotia le tagata i lana lava agasala.+

17 “Aua e te faapiʻoina le faamasinoga o le tagata ese e aumau+ po o le tama e leai se tamā,+ aua foʻi e te ave le ofu o se fafine ua oti lana tane e fai ma mea e faamau ai se aitalafu.+ 18 Ia e manatua na e nofo pologa i Aikupito, ma na laveaʻiina oe e Ieova lou Atua mai i inā.+ O le mea lea ua ou poloaʻi atu ai iā te oe ia faia lenei mea.

19 “Afai e te selesele lau seleselega i lou fanua,+ ma galo ai se fusi saito i le fanua, aua neʻi e toe alu e aumai. E ao ona tuu lea mea mo le tagata ese e aumau, o le tama ua leai se tamā ma le fafine ua oti lana tane;+ ina ia faamanuia ai Ieova lou Atua iā te oe i mea uma e faia e ou lima.+

20 “Afai e te sasa i lalo olive mai i lou laau o le olive, aua e te toe foʻi ma toe sasa ona lālā. Ia tuu ai pea ia mea mo le tagata ese e aumau, o le tama e leai se tamā ma le fafine ua oti lana tane.+

21 “Afai e te aoao fuifui vine o lau togāvine, aua neʻi e toe alu ma ao mai mea e totoe. Ia tuu ia mea mo le tagata ese e aumau, o le tama e leai se tamā ma le fafine ua oti lana tane. 22 Ia e manatua na e nofo pologa i le atunuu o Aikupito.+ O le mea lea ua ou poloaʻi atu ai iā te oe ina ia faia lenei mea.+