Teuteronome
17 “Aua e te fai taulaga iā Ieova lou Atua i se povi poʻa po o se mamoe e iai se faalētonu, o so o se mea e leaga ai; auā o se mea lea e inosia e Ieova lou Atua.+
2 “Afai ua iloa o iā te oe, i se tasi o ou aai o le a tuuina mai e Ieova lou Atua iā te oe, se tamāloa po o se fafine o lē e faia le mea ua leaga i le silafaga a Ieova lou Atua ma solia ai lana feagaiga,+ 3 ma e alu o ia ma tapuaʻi i isi atua e ifo i ai, o le lā, po o le masina, po o ʻau uma o le lagi,+ o le mea lea ou te leʻi poloaʻi atu ai,+ 4 ma e taʻu mai foʻi iā te oe, e te logotala i ai ma e te matuā saʻili i ai, ma ua mautinoa ua moni le tala,+ ua faia lenei mea inosia i Isaraelu! 5 Ia e aumaia lenā tamāloa po o lenā fafine o lē na faia lenei mea leaga i fafo o faitotoʻa o ou aai, ioe, o le tamāloa po o le fafine, ma e ao ona fetogia lea tagata i maa ma oti ai.+ 6 O faamatalaga a molimau e toʻalua pe toʻatolu,+ e fasiotia ai lē ua tatau i ai le oti. E lē fasiotia o ia i le faamatalaga a se molimau e toʻatasi.+ 7 Ia muamua ona fetogia o ia e molimau i maa ina ia oti ai, mulimuli ane ona fetogia lea o ia e tagata uma;+ ma e ao ona e aveesea le mea leaga mai iā te outou.+
8 “Afai e matuā faigatā iā te oe le faia o se iʻuga o se faamasinoga,+ e pei o se mataupu i le faamasaatoto,+ lea ua iai se talosaga faaletulafono,+ po ua faia se gaoioiga sauā, o feeseeseaʻiga i totonu o ou aai,+ ia e tulaʻi ma alu atu i le nofoaga o le a filifilia e Ieova lou Atua,+ 9 e ao foʻi ona e alu atu i ositaulaga,+ o le ʻau sa Levī, ma lē ua fai ma faamasino+ i lea aso ma talosaga atu mo se faamasinoga, ma e ao ona latou taʻu mai iā te oe se tala e tusa ma le iʻuga o le faamasinoga.+ 10 Ona e faia lea e tusa ma le upu latou te taʻu mai iā te oe mai i lenā nofoaga o le a filifilia e Ieova; ma ia e toʻaga e faia mea uma latou te faatonuina ai oe. 11 Ia e faia e tusa ma tulafono e latou te faasino mai iā te oe ma e tusa foʻi ma iʻuga o faamasinoga e latou te taʻu mai iā te oe.+ Aua e te liliuese mai i le upu e latou te taʻu mai iā te oe, i le itu taumatau po o le itu tauagavale.+ 12 O le tagata e amio faamaualuga e ala i le lē faalogo i le ositaulaga, o lē o loo tū e auauna iā Ieova lou Atua po o le faamasino,+ e ao ona oti lenā tagata;+ ma e ao ona e aveesea le mea leaga mai i Isaraelu.+ 13 Pe a logotala uma i ai tagata ona fefefe ai lea,+ ma e latou te lē toe amio faamaualuluga ai.
14 “Pe a e oo atu i le laueleele e tuuina mai e Ieova lou Atua iā te oe, e fai mo oe ma e nofo ai,+ ma e te faapea ane, ‘Ou te faia se tupu mo aʻu e pei o isi nuu uma o loo siʻomiaina aʻu’;+ 15 e ao lava ona e tofia mo oe se tupu o lē ua filifilia e Ieova lou Atua.+ E te tofia se tupu mo oe mai i ou uso. O le a lē faatagaina ona e tofia se tagata o se isi atunuu, o se tasi e lē o sou uso. 16 Ae ia aua neʻi faateleina mo ia lava ni solofanua,+ pe toe faafoʻi tagata i Aikupito ina ia faatele ai ana solofanua;+ auā ua fetalai mai Ieova iā te outou, ‘Aua neʻi outou toe foʻi atu i lea lava ala.’ 17 Aua foʻi neʻi faatoʻateleina ni ana avā, neʻi liliuese lona loto mai iā te aʻu;+ aua foʻi neʻi soona faateleina mo ia lava ni siliva ma ni auro.+ 18 Pe a nofo o ia i le nofoālii o lona malo, e ao ona ia tusi se kopi o nei tulafono mo ia lava, mai i le tusi o loo tausia e ositaulaga, o le ʻau sa Levī.+
19 “E ao ona iai pea lenei kopi iā te ia, na te faitau foʻi i ai i aso uma e ola ai+ ina ia aʻoaʻoina ai o ia e mataʻu iā Ieova lona Atua, ma tausia upu uma o lenei tulafono ma nei tuutuuga e ala i le faia o ia mea;+ 20 ina neʻi faualuga lona loto i ona uso+ ma aua neʻi liliuese mai i le poloaʻiga i le itu taumatau po o le itu tauagavale,+ e faaumiumi ai foʻi ona aso i lona malo,+ o ia ma ona atalii i Isaraelu.