Ieremia

31 Ua fetalai mai Ieova, “I lenā taimi, e fai ai aʻu ma Atua o aiga uma o Isaraelu; e fai foʻi i latou ma oʻu nuu.”+

2 O le mea lenei ua fetalai mai ai Ieova: “Na maua e tagata na faasaoina mai i le pelu le finagalo malie o le Atua i le toafa,+ ina ua savali atu Isaraelu i le mea e mālōlō ai o ia.”+ 3 Na faaali mai Ieova iā te aʻu mai i le mea mamao, ua faapea mai: “O le alofa e faavavau na ou alofa ai iā te oe.+ O le mea lea na ou tosina mai ai oe i loʻu alofa faamaoni.+ 4 Le taupou e, o Isaraelu, ou te toe fausia oe ma e toe fausia lava oe.+ O le a e teuteu iā te oe i au topa, ma e alu atu foʻi i le siva a i latou o loo toē.+ 5 E te totō togāvine i mauga o Samaria.+ E totō foʻi e ē galulue vine ma aai mai i o latou fua.+ 6 Auā e oo mai le aso e alalaga atu ai leoleo i vaega maugā o Efaraima, ‘Inā tutulaʻi ia outou, ma tatou ō aʻe i Siona iā Ieova lo tatou Atua.’”+

7 Auā o le mea lenei ua fetalai mai ai Ieova: “Inā alalaga leotele atu ia ma le olioli iā Iakopo, ia alalaga atu ma le fiafia ona ua sili outou i atunuu.+ Ia outou faalauiloa atu.+ Ia outou vivii atu ma faapea atu, ‘Ieova e, ia e faaola mai i lou nuu, o ē ua totoe o Isaraelu.’+ 8 Ou te aumaia i latou mai i le nuu o le itu i mātū,+ ou te faapotopoto faatasi foʻi i latou mai i vaega pito mamao o le lalolagi.+ E faatasi foʻi ma i latou le tauaso ma le pipili, o le fafine tō ma lē o le a fanau.+ E toe foʻi mai i latou i inei o se faapotopotoga tele lava.+ 9 Ua ō mai i latou ma le fetagisi,+ ou te aumaia foʻi i latou, a o latou ʻaiʻoi mai mo le faamagaloga. Ou te faia i latou ina ia savavali i vanu e tafe ai vai,+ i le auala saʻo e lē tautevateva ai i latou. Auā ua fai aʻu ma Tamā o Isaraelu;+ ma o Efaraima foʻi, o laʻu ulumatua.”+

10 Inā faalogologo mai ia outou o atunuu i le afioga a Ieova, ma ia taʻutaʻu atu i motu mamao,+ e faapea: “O Lē na faasalalauina Isaraelu, na te faapotopoto faatasi+ mai o ia, na te tausia foʻi o ia e pei ona faia e se leoleo mamoe i lana lafu.+ 11 Auā e togiolaina lava e Ieova Iakopo,+ ma faatauina mai o ia mai i le lima o lē e sili atu ona malosi iā te ia.+ 12 E latou te ō mai lava ma alalaga fiafia i le mea maualuga o Siona,+ e fiafia foʻi i le lelei o Ieova,+ ona o le saito, o le uaina fou,+ o le suāuu, ma tamaʻi mamoe ma tamaʻi povi o le lafu.+ E avea i latou e pei o se togālaau ua faasūsūina lelei,+ e lē toe vaivai lava i latou.”+

13 “E olioli ai le taupou i le siva i lenā taimi, o tauleleʻa foʻi faatasi ma toeaina.+ Ou te liua foʻi lo latou faavauvau i le fiafia, ou te faamāfanafanaina i latou, ma faafiafia i latou mai i lo latou faanoanoa.+ 14 Ou te faamaoona ositaulaga i meaʻai lololo,+ e faamalieina+ foʻi loʻu nuu i mea lelei,” ua fetalai mai ai Ieova.

15 “O le mea lenei ua fetalai mai ai Ieova, ‘Ua lagona le leo i Rama,+ o le auēga ma le tagituʻi;+ ua tagiauē Rasela+ ona o lana fanau.+ Ua lē mafai foʻi ona faamāfanafanaina o ia ona o lana fanau,+ auā ua lē toe iai i latou.’”+

16 O le mea lenei ua fetalai mai ai Ieova: “‘Soia e te tagi ma aua le maligi ou loimata,+ auā ua iai le taui o au galuega,’ ua fetalai mai ai Ieova, ‘e toe foʻi mai lava i latou mai i le nuu o le fili.’+

17 “‘E iai le faamoemoe+ mo lou lumanaʻi,’ ua fetalai mai ai Ieova, ‘e toe foʻi mai lava le fanau i lo latou laueleele.’”+

18 “Ua ou lagona atu Efaraima o auē,+ ‘Ua e aʻoaʻia aʻu ina ia faasaʻoina ai aʻu,+ e pei o se tamaʻi povi poʻa ua lē aʻoaʻoina.+ Ia e faaliliuina aʻu, ona ou nofosauni lea e toe liliu atu,+ auā o oe o Ieova loʻu Atua.+ 19 Ina ua uma ona ou liliuese, ona ou salamō+ ai lea; ma ina ua ou iloa, ona ou pōpō ai lea i loʻu ogāvae.+ Na ou māsiasi ma ou lagona le faalumaina,+ auā na ou tauaveina le luma o loʻu talavou.’”+

20 “Po o Efaraima ea o se atalii e pele iā te aʻu, po o se tamaitiiti ou te tausi faapelepele i ai?+ Auā talu ona ou tautala atu iā te ia, ou te saga manatua pea o ia.+ Ua tagi lava loʻu loto ona o ia.+ Ou te tigā alofa lava iā te ia,”+ ua fetalai mai ai Ieova.

21 “Ia e faia ni faailoga mo oe i le auala. Ia faatutū ni pou faailoilo mo oe.+ Ia taulaʻi atu lou loto i le ala tele, o le ala e te alu atu i ai.+ Le taupou o Isaraelu e, inā toe foʻi mai ia. Ia e foʻi mai i ou aai nei.+ 22 Le tama fafine lē faamaoni e, o le ā ea le umi e te fealuaʻi solo ai?+ Auā ua faia e Ieova se mea fou i le lalolagi: E siʻosiʻoina e le fafine le tane.”

23 O le mea lenei ua fetalai mai ai Ieova o ʻau, o le Atua o Isaraelu: “Latou te toe fai atu lenei upu i le nuu o Iuta ma ona aai, pe a ou toe faapotopoto faatasi mai i latou na ave faapagota, ‘O oe le fale e iai le amiotonu,+ ia faamanuia oe e Ieova,+ le mauga paia e.’+ 24 E nonofo faatasi uma ai lava Iuta ma ona aai uma, o le ʻaufaifaatoʻaga ma i latou o ē e feoaʻi faatasi ma le lafu.+ 25 Auā ou te faafouina le tagata ua vaivai, ou te faamalosia foʻi tagata uma ua leai so latou malosi.”+

26 Ona ou ala ai lea ma ou vaai; na ou fiafia foʻi i laʻu moe.

27 “Faauta! E oo mai aso,” ua fetalai mai ai Ieova, “ou te lūlū ai i le aiga o Isaraelu ma le aiga o Iuta le fua o le tagata, ma le fua o le manu.”+

28 “E pei ona ou mataala pea iā i latou+ ina ia liaʻiina ma talepe i lalo, ia faaumatia ma faaleagaina,+ e faapea foʻi ona ou mataala pea iā i latou ina ia atiina aʻe ma totōina,”+ ua fetalai mai ai Ieova. 29 “I na aso, latou te lē toe fai mai, ‘E ʻaina e tamā vine moto, ae e magiagia ai nifo o le fanau.’+ 30 Ae e taʻitasi le tagata ma oti ona o lana mea sesē.+ O so o se tagata e ʻaina le vine moto, e magiagia ai ona lava nifo.”

31 “Faauta! E oo mai aso,” ua fetalai mai ai Ieova, “ou te osia ai se feagaiga fou+ ma le aiga o Isaraelu+ ma le aiga o Iuta;+ 32 e lē pei o le feagaiga na ou osia ma o latou augātamā, i le aso na ou tago ai i o latou lima ma taʻitaʻi ese i latou mai i le nuu o Aikupito,+ ‘o laʻu feagaiga lea na latou solia,+ e ui ina avea aʻu ma tane+ o lē e ona i latou,’ ua fetalai mai ai Ieova.”

33 “Auā o le feagaiga+ lenei ou te osia ma le aiga o Isaraelu pe a mavae na aso,”+ ua fetalai mai ai Ieova. “Ou te tuuina laʻu tulafono i totonu iā i latou,+ ma ou te tusiaina foʻi i o latou loto.+ E fai aʻu ma o latou Atua, e fai foʻi i latou ma oʻu nuu.”+

34 “E lē toe aʻoaʻo atu foʻi se tasi i lana aumea, e lē toe aʻoaʻo atu foʻi se tasi i lona uso,+ e faapea atu, ‘Ia outou iloa Ieova!’+ auā e iloa aʻu e i latou uma, e amata mai i lē e aupito faatauvaa e oo i lē e sili o i latou,”+ ua fetalai mai ai Ieova. “Auā ou te faamagaloina a latou mea sesē, ma ou te lē toe manatuaina a latou agasala.”+

35 O le mea lea ua fetalai mai ai Ieova, O Lē na tuuina mai le lā ina ia malamalama ai le ao,+ o tulafono+ o le masina+ ma fetu ina ia malamalama ai le pō,+ o Lē e faagaepu le sami ina ia ū mai ona galu,+ o Lē foʻi o lona suafa o Ieova o ʻau:+ 36 “‘Afai e mafai ona aveesea nei tulafono mai i oʻu luma,’+ ua fetalai mai ai Ieova, ‘e mafai foʻi la ona lē toe avea i latou o le fanau a Isaraelu ma nuu i oʻu luma i aso uma.’”+

37 O le mea lenei ua fetalai mai ai Ieova: “‘Afai e mafai ona fuatia le lagi i lugā, ma suʻesuʻeina faavae o le lalolagi i lalō,+ o aʻu foʻi, e mafai ona ou teena le fanau atoa a Isaraelu ona o mea uma na latou faia,’+ ua fetalai mai ai Ieova.”

38 “Faauta! E oo mai aso,” ua fetalai mai ai Ieova, “e fausia ai lava le aai+ iā Ieova, e amata mai i le ʻOlo o Hananiali+ e oo atu i le Faitotoʻa o le Tulimanu.+ 39 E alu atu lava le manoa e fua ai,+ e alu atu saʻo i luma o le aʻega o Karepa, ma faataamilo ane ai i Koata. 40 E avea o se mea e paia iā Ieova+ o fanua laugatasi uma ua iai tino oti,+ o lefulefu gaʻoa,+ o fanua uma e oo atu i le vanu o Ketarono,+ e oo atu i le tulimanu o le Faitotoʻa o Solofanua,+ ma agaʻi atu i le mea e oso aʻe ai le lā. E lē liaʻiina, pe e toe soloia foʻi i lalo e oo lava i le faavavau.”+