Salamo

34 Ou te vivii atu iā Ieova i taimi uma;+

E lē aunoa foʻi ona viiga i loʻu gutu.+

 2 E mitamita loʻu loto iā Ieova;+

E faalogo ai o ē e agamalu ma olioli ai i latou.+

 3 O outou le nuu e, ia outou faasilisilia Ieova faatasi ma aʻu,+

Ma seʻi o tatou faaeaina faatasi lona suafa.+

 4 Na ou fesili atu iā Ieova, ona tali mai lea o ia iā te aʻu,+

Na ia laveaʻiina foʻi aʻu mai i mea uma na ou fefe ai.+

 5 Na latou vāai atu iā te ia ma na latou fiafia ai,+

Ma e lē mafai foʻi ona māsiasi o latou mata.+

 6 Na valaau atu lē ua tigāina, ona faafofogaina lea e Ieova.+

Na Ia faaolaina foʻi o ia mai i ona mafatiaga uma.+

 7 E tolauapi le agelu a Ieova e siʻosiʻomia ai i latou o ē e matataʻu iā te ia,+

Ma e na te laveaʻiina foʻi i latou.+

 8 O outou le nuu e, inā outou tofotofo ia ma iloa ai e lelei Ieova;+

E fiafia foʻi le tagata e sulufaʻi atu iā te ia.+

 9 Ia matataʻu iā Ieova, outou o ona tagata paia,+

Auā e leai ni mea e matitiva ai i latou e matataʻu iā te ia.+

10 Ua leai ni meaʻai a tamaʻi leona taanoa ma ua fia aai i latou;+

A o i latou e saʻili iā Ieova, e leai se mea lelei e matitiva ai i latou.+

11 Le fanau e, inā ō mai ia ma faalogo mai iā te aʻu;+

Ou te aʻoaʻo atu iā te outou ina ia matataʻu iā Ieova.+

12 O ai ea le tagata e fiafia i le ola,+

Ma ua naunau ia tele ona aso ina ia iloa ai mea lelei?+

13 Ia leoleo lou laulaufaiva mai i mea leaga,+

Ma ou laugutu mai i le tautala i mea taufaasesē.+

14 Ia liliuese mai i mea leaga ma fai mea lelei;+

Ia saʻili e maua le filemu ma tausisi i ai.+

15 O loo silasila mai fofoga o Ieova i ē e amiotonu,+

Ma e faafofoga mai foʻi ona taliga i la latou alaga atu mo se fesoasoani.+

16 E faasagatau atu fofoga o Ieova i ē o faia mea leaga,+

Ina ia lē toe taʻua i latou i le lalolagi.+

17 Ua latou alalaga atu ma ua faafofogaina e Ieova,+

Ua ia laveaʻiina foʻi i latou mai i o latou mafatiaga uma.+

18 E latalata mai Ieova iā i latou o ē e loto momomo;+

Ma e faaola e ia i latou o ē ua loto nutimomoia.+

19 E tele puapuaga o le tagata amiotonu,+

Ae e laveaʻiina e Ieova o ia mai i na mea uma.+

20 E leoleo e ia o ona ivi uma;

E leai lava se ivi e tasi ua gau.+

21 E fasiotia i le mala lē ua amioleaga;+

E taʻusalaina foʻi o ē ua ʻinoʻino i lē e amiotonu.+

22 E laveaʻiina e Ieova ana auauna;+

E lē taʻusalaina foʻi i latou uma o ē e sulufaʻi atu iā te ia.+