Esekielu

45 “‘Pe a outou vaevaeina le laueleele e fai ma tofi,+ e ao ona outou avatu se foaʻi iā Ieova,+ o se vaega paia mai i le laueleele;+ e lua sefulu lima afe kupita le umi, ma e sefulu afe kupita le lautele.+ O le a avea o se vaega paia i ona itu uma e soo ai. 2 E mai i lenei mea o le a iai se fasi fanua mo le mea paia e lima selau kupita i le lima selau kupita, e faatafafā ona itu uma;+ ma e lima sefulu kupita e fai ma fanua e aai ai lafumanu i itu uma.+ 3 E mai lenei laueleele ia e fua mai ai le umi e lua sefulu lima afe ma le lautele e sefulu afe, o le a iai le malumalu i lea mea, o se mea e matuā paia.+ 4 E fai ma vaega paia mai i le laueleele mo ositaulaga,+ o auauna ia o le malumalu, o ē e faalatalata atu e auauna iā Ieova.+ E fai ma mea e fausia ai o latou fale ma o se mea paia e fausia ai le malumalu.

5 “‘O le a iai se fasi fanua e lua sefulu lima afe le umi ma le lautele e sefulu afe.+ E fai mo le ʻau sa Levī’, o ē e auauna i le Fale. E latou te maua ai foʻi potu ʻai e lua sefulu e fai ma o latou tofi.+

6 “‘E tou te avatu le fanua mo le aai e lima afe le lautele ma le umi e lua sefulu lima afe, e tutusa lelei ma le foaʻi paia.+ E fai foʻi lea mo le aiga uma o Isaraelu.

7 “‘E fai foʻi ma tofi o le taʻitaʻi lenei itu ma le isi itu o le foaʻi paia ma le fanua o le aai, i tala ane o le foaʻi paia+ ma tala ane o le fanua o le aai, o se fanua i le itu i sisifo e agaʻi atu i sisifo, ma se fanua foʻi i le itu i sasaʻe e agaʻi atu i sasaʻe. O le umi o lenei fanua e tutusa lelei ma vaega a ituaiga, e mai i le tuaoi i sisifo e oo atu i le tuaoi i sasaʻe.+ 8 E fai lona tofi i le laueleele o Isaraelu. E lē toe faasauā oʻu taʻitaʻi i loʻu nuu,+ ma e latou te avatu i le aiga o Isaraelu le laueleele e tusa ma o latou ituaiga.’+

9 “O le fetalaiga lenei a le Alii Pule Silisili Ese o Ieova, ‘Taʻitaʻi e o Isaraelu! Ua lava ia mea ua outou faia.’+

“‘Inā tuu ia le faasauā ma le faasaunoa,+ ia faia le mea tonu ma le amiotonu.+ Aua tou te toe faaaogā sesē la outou pule i loʻu nuu,’+ ua fetalai mai ai le Alii Pule Silisili Ese o Ieova. 10 ‘E ao ona iā te outou o fua faatautau e saʻo, ma ia saʻo fua o le efa* atoa ma le fua o le paita.*+ 11 E ao ona tasi le fua o le efa ma le fua o le paita, o le paita o le tasi vaesefulu lea o le somera,* ma o le efa+ o le tasi vaesefulu lea o le somera; e ao ona fua le aofaʻiga o mea manaʻomia e tusa ma le fua o le somera. 12 O le sekeli+ e lua sefulu kire.*+ O le lua sefulu sekeli, o le lua sefulu lima sekeli, ma le sefulu lima sekeli, e fai ia ma o outou mane.’*

13 “‘O le foaʻi lenei e ao ona outou avatu, o le tasi vaeono o le efa mai i le somera o saito ma le tasi vaeono o le efa mai i le somera o karite; 14 ma o le fua o le suāuu, ia avatu le fua o le paita o le suāuu. O le paita o le tasi vaesefulu lea o le kori.* E sefulu paita ona maua ai lea o le somera e tasi; auā o le sefulu o paita o le somera lea. 15 E ao ona avatu se mamoe e tasi mai i le lafu, o le mamoe lea mai i mamoe e taʻilua selau uma o lafumanu a Isaraelu.+ O nei taulaga e faaaogā mo taulaga i meaʻai,+ o taulaga mū,+ ma taulaga faifaatasi+ ina ia faia ai le togisala mo le nuu,’+ ua fetalai mai ai le Alii Pule Silisili Ese o Ieova.

16 “‘O tagata uma o le atunuu, o latou ia e gafa ma lenei foaʻi+ i le taʻitaʻi o Isaraelu.+ 17 O le taʻitaʻi+ o le a gafa foʻi o ia ma le vaavaaia o le taulaga mū,+ o taulaga i meaʻai+ ma le taulaga i meainu,+ i aso o tausamiga,+ i taimi o masina+ faatoʻā vaaia, ma taimi o sapati,+ ma aso o tausamiga uma a le aiga o Isaraelu.+ O ia lea na te saunia le taulaga o agasala ma taulaga i meaʻai, o le taulaga mū, ma le taulaga faifaatasi, ina ia togisala ai le aiga o Isaraelu.’

18 “O le fetalaiga lenei a le Alii Pule Silisili Ese o Ieova, ‘O le masina muamua, i le aso muamua o le masina, ia e aumai se tamaʻi povi taanoa e matuā lelei lava mai le lafu,+ ma e ao ona e faamamāina le malumalu mai i le agasala.+ 19 E ave e le ositaulaga sina toto o le taulaga o agasala ma tuu i le pou o le faitotoʻa+ o le Fale, i luga foʻi o tulimanu e fā o tafatafa faasili o loo siʻo ai le fata faitaulaga,+ ma luga o le pou o le faitotoʻa i le lotoā pito i totonu. 20 O le mea lea e te faia i le aso lona fitu o le masina, ona o se tasi ua faia se mea sesē+ ma ona o se tasi ua faia ma le lē iloa se mea sesē; e tou te faia le togisala mo le Fale.+

21 “‘O le masina muamua, i le aso sefulu fā o le masina, ia outou tausia ai le paseka.+ O le faamanatuga o aso e fitu e tou te aai ai i falaoa e lē faafefeteina.+ 22 O lea aso, e ao i le taʻitaʻi ona saunia se povi poʻa taanoa e fai ma taulaga o agasala mo ia lava ma tagata uma o le atunuu.+ 23 O aso e fitu o le faamanatuga,+ e na te saunia ai se taulaga mū iā Ieova i povi poʻa taanoa e fitu ma mamoe poʻa e fitu e matuā lelei lava, i aso taʻitasi mo aso e fitu,+ e tatau foʻi ona avatu se ʻoti poʻa i aso taʻitasi e fai ma taulaga o agasala.+ 24 E ao ona ia saunia mo le taulaga i meaʻai le fua o le efa e tasi mo le povi poʻa taanoa, ma le fua o le efa e tasi mo le mamoe poʻa, a o le suāuu, e tasi le sinu* i le efa.+

25 “‘O le masina lona fitu, i le aso sefulu lima o le masina, i le taimi o le tausamiga,+ e ao ona ia saunia ai mea lava ia na ia saunia mo aso e fitu,+ e tusa ma le taulaga o agasala, e tusa ma le taulaga mū, e tusa ma le taulaga i meaʻai ma e tusa foʻi ma le suāuu.’”