Kenese

8 Ua manatua+ e le Atua Noa, o manu ʻaivao uma, ma manu lalata uma, ua iai faatasi ma ia i le vaa;+ ona faaagi mai ai lea e le Atua o le matagi i le lalolagi, ma ua amata ai ona māui atu le vai.+ 2 Ua punitia foʻi punāvai o vai loloto*+ ma pupuni o vai+ i le lagi, ona taofia ai lea o le maligi mai o timuga. 3 Ua faasolosolo ona māui atu le vai mai i le lalolagi, ma ua atili māui ai; ma i le faaiʻuga o le selau lima sefulu aso ua faaitiitia ai le vai.+ 4 Ina ua oo i le masina lona fitu, i le aso sefulu fitu o le masina, ona tū ai lea o le vaa+ i luga o mauga o Ararata.+ 5 Ua faasolosolo pea ona māui atu le vai seʻia oo i le masina lona sefulu. O le aso muamua o le masina lona sefulu, ua aliali mai ai tumutumu o mauga.+

6 I le faaiʻuga o aso e fā sefulu, ona tatala ai lea e Noa o le faamalama+ o le vaa na ia faia. 7 Mulimuli ane, ua ia faalele i fafo le manulele o le oreva+ ma ua fefoʻifoʻiaʻi seʻia oo ina mātūtū le laueleele.

8 Ona ia faalele lea i fafo o le lupe+ ina ia iloa ai po ua māui uma atu le vai mai i le fogāeleele. 9 A ua lē maua e le lupe se mea e tū ai ona vae,* ona toe foʻi atu lea iā te ia i le vaa, ona o loo iai pea le vai i le fogāeleele uma.+ Ona tuu lea e Noa i fafo o lona lima ma aumai le manulele i totonu o le vaa. 10 Ua faatalitali pea o ia seʻia mavae nisi aso e fitu, ona ia toe auina atu lea o le lupe mai i le vaa. 11 I le afiafi ua toe foʻi mai le lupe, faauta! o loo ū mai le lau olive+ mata i lona gutu, ona iloa ai lea e Noa ua papaʻu le vai mai i le laueleele.+ 12 Ua ia toe faatalitali i nisi aso e fitu. Ona ia faalele atu lea i fafo o le lupe, a ua lē toe foʻi mai iā te ia.+

13 O le tausaga e ono selau ma le tasi+ o le olaga o Noa, i le aso muamua o le masina muamua, ua matuā māui ese ai le vai mai i le laueleele; ona aveese lea e Noa o le ufi o le vaa ina ia vaai i fafo, ona ia iloa atu lea ua mātūtū le fogāeleele.+ 14 I le aso lua sefulu fitu o le masina lona lua, ua matuā mātūtū ai le laueleele.+

15 Ona fetalai mai ai lea o le Atua iā Noa e faapea: 16 “Inā ulufafo ia mai i le vaa, o oe ma lau avā, o ou atalii ma avā a ou atalii faatasi ma oe.+ 17 Inā aumaia ia i fafo o meaola+ uma faatasi ma oe, o manufelelei,+ o manu,+ ma meaola fetolofi uma o loo fetolofi i le eleele,+ ina ia matuā anoanoaʻi lava ia meaola i le lalolagi, ia fanafanau ma ia faateleina lava i le lalolagi.”+

18 Ona ulufafo lea o Noa, atoa foʻi ma ona atalii,+ o lana avā ma avā a ona atalii faatasi ma ia. 19 Ua ō mai foʻi i fafo o manu uma, o meaola fetolofi uma, o manufelelei uma ma manu uma e feoaʻi i le lalolagi e tusa ma o latou ituaiga.+ 20 Ona fausia lea e Noa o se fata faitaulaga+ iā Ieova, ma ia faia ai taulaga mū i nisi o manu mamā,+ ma nisi o manufelelei mamā+ i luga o le fata faitaulaga.+ 21 Ua lagona e Ieova le manogi+ ua faamalieina ai lona finagalo, ma ua faapea ifo Ieova iā te ia lava:+ “Ou te lē toe faamalaiaina le laueleele+ ona o tagata, auā e leaga faanaunauga+ o le loto o le tagata mai lava i lona laʻitiiti;+ ou te lē toe taia mea uma ua iai le ola e pei ona ou faia.+ 22 O aso uma e faaauau ona iai le lalolagi, e lē muta ai ona lūlū fatu ma selesele mai, o le mālūlū foʻi ma le vevela, o le tau māfanafana ma le tau mālūlū, o ao ma pō.”+