2 Nofoaiga a Tupu

13 I le tausaga lona sefulu valu o le nofoaiga a le Tupu o Ierepoamo, na amata ai ona pule Avia i Iuta.+ 2 E tolu tausaga na pule ai o ia i Ierusalema, ma o le igoa o lona tinā o Mekaio+ le afafine o Urielu mai i Kipea.+ Sa faia foʻi le taua i le va o Avia ma Ierepoamo.+

3 Ona alu atu lea o Avia i le taua faatasi ma le ʻautau e toʻafā selau afe tagata malolosi o le taua,+ o tane ua filifilia. Ua sauni foʻi Ierepoamo e tau le taua faasaga iā te ia, ma tane ua filifilia e toʻavalu selau afe, o tagata totoa ma malolosi.+ 4 Ua tulaʻi Avia i luga o le Mauga o Semaraima o loo i le vaega maugā o Efaraima,+ ua faapea atu: “Ierepoamo e, ma Isaraelu uma, inā faalogo mai ia iā te aʻu. 5 Pe e tou te lē iloa ea ua foaʻi mai e Ieova le Atua o Isaraelu iā Tavita le malo+ e pule ai iā Isaraelu i aso uma lava,+ o ia ma ona atalii+ e ala i le feagaiga masima?+ 6 A ua tulaʻi Ierepoamo+ le atalii o Nepata, le auauna+ a Solomona le atalii o Tavita, ua fouvale+ i lona alii.+ 7 Ua faapotopoto faatasi atu pea iā te ia o tagata e leai ni mea e faia+ ma e leai so latou aogā.+ Mulimuli ane, ua sili atu foʻi i latou nai lo o Reopoamo le atalii o Solomona, talu ai e laʻitiiti ma lotovaivai+ Reopoamo,+ ma e leʻi mafai foʻi ona ia tetee atu iā i latou.

8 “O lenei, ua outou mafaufau e tetee atu i le malo o Ieova i le lima o atalii o Tavita,+ ina ua toʻatele+ outou ma ua iā te outou o tamaʻi povi poʻa auro na faia e Ierepoamo e avea ma o outou atua.+ 9 Po ua outou lē tuliesea ositaulaga a Ieova,+ o atalii o Arona, ma sa Levī, ma ua outou lē faia pea ea ositaulaga mo outou e pei o tagata o isi nuu?+ A o se tasi na sau ma tofia o ia lava e fai ma ositaulaga e ala i le ofoina atu o se tamaʻi povi poʻa, ma ni mamoe poʻa se fitu, na avea o ia ma ositaulaga i mea e lē o ni atua.+ 10 A o i matou, o Ieova o lo matou Atua+ ia, matou te leʻi tuua o ia; ae o loo auauna ositaulaga iā Ieova, o le fanauga a Arona, atoa foʻi ma le ʻau sa Levī i le galuega.+ 11 Ua latou susunuina asu o taulaga mū iā Ieova i lea taeao ma lea taeao, ma lea afiafi ma lea afiafi,+ ua faamūina foʻi mea manogi;+ o falaoa ua faaputuina ua i luga o le laulau e faia i le auro māoʻi,+ ua iai foʻi tuugāmolī+ ma o latou molī e faamalamalama ai i lea afiafi ma lea afiafi;+ auā o loo matou tausia pea lo matou tiute tauave+ iā Ieova lo matou Atua, a ua tuua e outou o ia.+ 12 Faauta! e muamua iā i matou le Atua moni+ faatasi ma ona ositaulaga,+ ma pū+ mo le faaleoina mai o le taua iā te outou. Le fanauga a Isaraelu e, aua tou te tau ma Ieova le Atua o o outou augātamā,+ auā e tou te lē taulau manuia.”+

13 Ona tuuina atu lea e Ierepoamo o ʻautau e faalalafi solo ina ia osofaʻi mai i o latou tua, o lea, sa latou iai i luma o Iuta, ma sa iai foʻi le ʻau i o latou tua.+ 14 Ina ua tetepa i tua ʻau a Iuta, vaai foʻi, ua iai ʻautau i o latou luma ma o latou tua.+ Ona latou alalaga atu lea iā Ieova,+ a o ili leotetele pū e ositaulaga. 15 Ua alalaga tagata o Iuta i le alaga o le taua. Ina ua alalaga tagata o Iuta i le alaga o le taua,+ ona faatoʻilaloina+ lea e le Atua moni o Ierepoamo ma Isaraelu uma, i luma o Avia+ ma Iuta. 16 Ua sosola le fanauga a Isaraelu mai i luma o Iuta, ona tuuina atu lea e le Atua o i latou i o latou lima.+ 17 Ua ō atu Avia ma ona tagata ua fasiotia i latou i le fasi e matuā tele lava; ma e toʻalima selau afe tagata ua filifilia o Isaraelu na paʻuʻū ina ua fasia i latou. 18 Na faamaulalo le fanauga a Isaraelu i lenā taimi, a ua sili atu le fanauga a Iuta, auā na latou faalagolago+ iā Ieova le Atua o o latou augātamā. 19 Ua tuliloa pea e Avia ia Ierepoamo ma faoa aai nei mai iā te ia, o Peteli+ ma ona tamaʻi aai, o Iesana ma ona tamaʻi aai, ma Efaraima ma ona tamaʻi aai.+ 20 Ua lē toe iai foʻi se malosi+ iā Ierepoamo i aso o Avia; ae na taia+ o ia e Ieova ma ua oti ai.

21 Ua faamalosia pea e Avia o ia+ lava. O lea, na ia faia ai ni avā se toʻasefulu fā,+ ona ia fanauina ai lea o atalii e toʻalua sefulu lua+ ma afafine e toʻasefulu ono. 22 O le olaga uma foʻi o Avia, e oo lava i ona ala ma ana upu, ua tusia ia i le faamaumauga a le perofeta o Ito.+