Iopu
4 Ona tali mai lea o Elifasa+ le Timanu, ua faapea mai:
2 “Pe a fai atu e se tasi se upu iā te oe, pe e te vaivai ai ea?
A o ai sē na te mafaia ona taofi o ana upu?
3 Faauta! E toʻatele o ē na e aʻoaʻia,+
Sa masani ona e faamalosia ai lima ua vaivai.+
4 O au upu na toe faatulaʻi ai lē ua tautevateva;+
Ma faamalosia ai foʻi tulivae ua vaivai.+
5 A o lenei ua oo mai iā te oe ma ua e vaivai ai;
Ua papaʻi atu foʻi iā te oe, ma ua e atuatuvale ai.
6 Po ua e mautinoa ea ona o lou migao i le Atua?
Po ua e faamoemoe ea ona o ou ala faamaoni?+
7 Ia manatua: Po ua fano ea lē ua amio mamā?
Po ua faaumatia ea lē ua amio saʻo?+
8 E tusa ai ma mea na ou vaaia, o i latou ua fafauina mea e tigā ai
Ma i latou e lūlūina mea leaga, o le a latou seleseleina mai lava.+
9 E fano i latou i le mānava a le Atua,
E oti foʻi i latou pe a sasao aʻe lona toʻasā.
10 E tagi le leona, ma e lagona foʻi le leo o le tamaʻi leona,
Ae e gauia nifo o leona taanoa.
11 Ua fano le leona auā ua lē maua sana meaʻai,
Ma ua faataapeapeina foʻi le toloaʻi a le leona.
12 Ua oo mai faalilolilo iā te aʻu se tala,
Ua lagona e oʻu taliga le fāfā tala,+
13 I popolega ona o mea na vaaia i le pō,
Ina ua momoegase tagata.
14 Na oo mai iā te aʻu le fefe ma le gatete,
Ma na gatete ai oʻu ivi uma.
15 Na ui ane i oʻu luma se agaga;
Na mogea ai loʻu tino.
16 Na tū o ia,
Ae ou te leʻi iloa ona foliga mai;
Sa ataata mai se mea i oʻu luma;
Ona toʻafilemu ai lea, ma ou faalogo ai i se leo e faapea:
17 ‘Pe e sili ea le tonu o le tagata i lo o le Atua?
Pe e sili atu ea foʻi le mamā o le tagata i lo o Lē na Faia o ia?’
18 Faauta! E na te lē faatuatuaina ana auauna,
Ma e na te tuuaʻia ana avefeʻau i mea sesē.
19 E sili atu ai ona faia faapea i ē ua nonofo i fale omea,
Ua faavaeina i le eleele!+
E vave ona tuʻimomomoina i latou e se tasi i lo o se lelefua.*
20 E tuʻimomomoina i latou mai i le taeao e oo i le afiafipō;
E fano foʻi i latou e faavavau e lē toe manatuaina e se tasi.
21 Pe e leʻi motusia ea manoa o o latou faleʻie?
E oti i latou ona o le leai o se atamai.