Iopu
3 Ua mavae ia mea, ona tautala atu lea o Iopu ma fetuu i le aso na fanau mai ai.+ 2 Ona tali atu lea o Iopu, ua faapea atu:
3 “Ia fano le aso na ou fanau mai ai,+
Ia fano le pō na faapea ane ai se tasi, ‘Ua afuafua le tagata i le manava!’
4 Ia faapouliuligia lea aso.
Aua neʻi silasila mai i ai le Atua mai i lugā,
Aua foʻi neʻi susulu atu i ai le malamalama.
5 Ia toe faafoʻi mai e le pōuliuli ma le pogisa lea aso.
Ia faamalumalu i ona luga le ao.
Ia faamataʻu ane mea e pogisa ai le aso.+
6 Ia ufitia e le pōuliuli tele lenā pō;+
Aua neʻi fiafia o ia faatasi ma aso o le tausaga;
Aua foʻi neʻi iai i le faitauina o masina.
7 Faauta! Ia faagaogaoina lava lea pō;
Aua neʻi iai se alaga fiafia.+
8 Ia faamalaiaina lenā aso e ē ua fetuuina,
O ē ua sauni e fafagu le korokotaila.*+
9 Ia faapouliuligia fetu o lona tafa o ata;
Ia faatalitali foʻi i le malamalama ae e leai lava;
Aua foʻi neʻi vaai atu i le tafa mai o ata o le vaveao.
10 Auā na te leʻi punitia faitotoʻa o le manava o loʻu tinā,+
Ma natia faafitauli mai i oʻu mata.
11 Aiseā na ou lē oti ai i le manava o loʻu tinā?+
Aiseā na lē tō ai laʻu mānava ina ua ou sau mai i le manava?
12 Aiseā na talia ai aʻu e tulivae,
Aiseā foʻi na talia ai aʻu e susu+ ou te susu ai?
13 Auā po o penei ua ou taoto e aunoa ma le faalavelave mai o se tasi;+
Semanū ua ou moe; ma ou mālōlō+
14 Faatasi ma tupu ma ē e faufautua o le lalolagi,+
O ē e faia nofoaga tuufua mo i latou,+
15 Po o perenise o ē e iai auro,
O ē ua faatumu o latou fale i siliva;
16 Pe e pei o se fanau lē au+ ua natia, ua leai lava aʻu,
E pei o le fanau ua lē vāai i le malamalama.+
17 O i inā ua teʻa ai le atuatuvale o ē e amioleaga,+
Ma mālōlō ai o ē ua mou atu le malosi.+
18 Ua toʻafilemu faatasi pagota;
Ua lē faalogoina foʻi le leo o lē e faamalosia i latou e galulue.+
19 Ua faapea ona iai i inā o ē e faatauvaa ma ē e sili,+
Ua faasaʻolotoina foʻi le pologa mai i lona matai.
20 Aiseā ua ia avatu ai le malamalama i lē e mafatia,
Ma le ola i ē ua matuā tigā o latou loto?+
21 Aiseā ua lē oo mai ai le oti i ē ua faatalitali i ai,+
E ui lava ina latou eli pea i ai e sili atu i lo o oloa ua natia?
22 O ē ua olioli ma fiafia,
Ua olioli auā ua latou maua se mea e tanu ai.
23 Aiseā ua ia avatu ai le malamalama i le tagata, o lē ua natia lona ala,+
Ma ua taofia o ia e le Atua i se pā?+
24 Auā ua muamua ona oo mai o loʻu ōi ae ou te leʻi ʻai,+
Ua maligi mai foʻi loʻu faataiō e pei o vai;+
25 Auā ua ou mataʻu i le mea mataʻutia, ua oo mai iā te aʻu;
Ua oo mai foʻi iā te aʻu le mea na ou fefe ai.+
26 Na lofia aʻu i popolega ma faafitauli,
Ou te leʻi mapu lava, ae na oo mai pea le atuatuvale.”