Luka

17 Ua fetalai atu o ia i ona soo: “E lē mafai lava ona lē oo mai o mea e tausuai ai.+ Ae peitaʻi, oi talofa i lē e māfua ai!+ 2 E lelei pe a nonoa se maa e olo ai saito i lona ua, ma lafo o ia i le sami,+ nai lo o lona faatausuai i se tasi o i latou nei e faatauvaa.+ 3 Ia outou uaʻi iā te outou lava. Afai ua faia e sou uso se agasala, ia e aʻoaʻi+ iā te ia, afai e salamō o ia, ia faamagalo i ai.+ 4 E tusa lava pe e agasala faafitu o ia iā te oe i le aso, ma ua foʻi mai faafitu iā te oe ma faapea mai, ‘Ua ou salamō,’ ia e faamagalo iā te ia.”+

5 Ona fai mai lea o aposetolo i le Alii: “Ia e faatuputeleina lo matou faatuatua.”+ 6 Ona fetalai atu lea o le Alii: “Afai e pei lo outou faatuatua o le fatu o le sinapi, tou te fai atu i lenei laau o le sukamina, ‘Ia liaʻiina ma totō i le sami!’ ma e usitaʻi mai o ia iā te outou.+

7 “O ai se tasi o outou e iai se pologa o loo suatia le fanua, po o leoleo i le lafu, e faapea atu iā te ia pe a sau mai le fanua, ‘Sau loa ma taoto e ʻai’? 8 Pe e lē faapea atu ea o ia iā te ia, ‘Ia sauni se mea mo aʻu ina ia fai ai laʻu ʻaiga o le pō, ia faamaulu lou ofu kuka ma auauna mai iā te aʻu seʻia uma ona ou ʻai ma ou inu, ona e ʻai ai lea ma e inu’? 9 Na te lē talisapaia mea ua faia e le pologa, auā o mea ia e tatau ona ia faia. 10 O lea, pe a uma ona outou faia o mea uma ua tofia atu e tou te faia, ona outou faapea ane lea, ‘O i matou o ni pologa e lē aogā.+ O mea ua matou faia, o mea ia e tatau ona matou faia.”’

11 A o malaga atu o ia i Ierusalema, ua ui atu i Samaria ma Kalilaia.+ 12 Ua oo atu o ia i se tasi nuu, ona latou fetaui ai lea ma ni tagata lepela+ se toʻasefulu o loo tutū mamao mai. 13 Ua latou alalaga ma faapea mai: “Iesu e, le Faiaʻoga, ia e alofa*+ mai iā i matou!” 14 Ua ia silafia atu i latou, ona ia fetalai atu lea: “Ia outou ō ma faaali atu outou i ositaulaga.”+ Ua latou ō, ona faamamāina lea o i latou.+ 15 Ina ua iloa e se tasi o i latou ua faamālōlōina o ia, ona ia toe foʻi mai lea ma vivii+ leotele atu i le Atua. 16 Ua faapaʻū faō o ia i vae+ o Iesu ma faafetai mai iā te ia; ma o ia o se Samaria.+ 17 Ua tali atu Iesu: “Na faamamāina le toʻasefulu, a ea? A o fea la o iai le isi toʻaiva? 18 Pe e leai ea se isi o i latou ua toe foʻi mai e vivii i le Atua, ae ua na o lenei tagata mai nuu ese?” 19 Ua ia fetalai atu iā te ia: “Inā tulaʻi ia ma e alu, auā ua e malosi ona o lou faatuatua.”+

20 Ae ina ua fesili mai le ʻau Faresaio iā te ia, po o afea e oo mai ai le malo o le Atua,+ ua ia tali atu iā i latou: “E lē oo mai le malo o le Atua i se auala mataʻina. 21 E lē faapea ane tagata, ‘Vaai o loo i inei!’ pe ‘O loo i ilā!’+ Auā faauta, o loo i lo outou lotolotoi le malo o le Atua.”+

22 Ona ia fetalai atu lea i le ʻausoo: “E oo mai aso o le a outou mananaʻo ai e fia vāai i se aso se tasi o le Atalii o le tagata, ae e tou te lē vāai i ai.+ 23 O le a fai atu tagata iā te outou, ‘Vaai ua i ilā!’ pe ‘Vaai ua i inei!’+ Aua tou te ō atu i ai pe mulimuli atu iā i latou.+ 24 Auā e pei ona emo mai o le uila,+ ma susulu atu mai i le tasi itulagi i le isi itulagi, e faapena foʻi le Atalii o le tagata.+ 25 O lea, e tatau ona oo muamua puapuaga e tele iā te ia, ma teena o ia e lenei tupulaga.+ 26 E pei o aso o Noa,+ o le a faapena foʻi aso o le Atalii o le tagata:+ 27 na latou aai, na latou feinu, na faaipoipo alii ma tamaʻitaʻi, seʻia oo lava i le aso na ulu atu ai Noa i le vaa, na oo mai le lolo ma faaumatia ai i latou uma.+ 28 E pei foʻi ona faia i aso o Lota:+ na latou aai, na latou feinu, na faatau mai ma faatau atu, na latou totō, ma fau fale. 29 A ua oo i le aso na alu ese ai Lota mai i Sotoma, ona totō ifo ai lea o le afi ma le teiō mai i le lagi, ma faaumatia ai i latou uma.+ 30 E faapena foʻi le aso o le a faaalia+ mai ai le Atalii o le tagata.

31 “I lenā aso, o lē o i luga o le fale, aua neʻi alu ifo i totonu e ave ni mea o iai, ma o lē o i le fanua, aua neʻi toe foʻi i mea o i tua. 32 Ia outou manatua le avā a Lota.+ 33 O sē e fia faasaoina lona ola, e lē maua e ia, a o sē e oti, e toe ola o ia.+ 34 Ou te fai atu iā te outou, O lenā pō, e taooto ai tamāloloa e toʻalua i le moega e tasi; e avea le tasi, ae tuua le isi.+ 35 E olo saito faatasi fafine e toʻalua i le mea e olo ai saito: e avea le tasi ae tuua le isi.”+ 36 * —— 37 Ua latou tali mai iā te ia: “Le Alii e, o fea e fai ai?” Ona ia fetalai atu lea iā i latou: “O le mea e iai le tino,+ o le mea foʻi lenā e potopoto i ai aeto.”+