104 Loʻu loto e, inā vivii atu ia iā Ieova.+
Ieova e, loʻu Atua, e matuā silisili lava oe.+
Ua e ofu oe i le mamalu ma le matagofie,+
2 Ua e pulupulu foʻi i le malamalama e pei o se ofu,+
Ma fofola atu le lagi e pei o se ʻie,+
3 O Lē ua fausia ona potu i luga i laau faalava i totonu o vai,+
Ua faia ao ma ona kariota,+
Ua feafioaʻi foʻi i apaʻau o le matagi,+
4 Ua ia faia ana agelu o agaga,+
Ma ana auauna o se afi mumū.+
5 Ua ia faavaeina le lalolagi i luga o ona faavae malolosi;+
E lē maluelue e faavavau, faavavau lava.+
6 Ua e ufitia ia i le vai loloto e pei o se ofu.+
Ua ufitia foʻi mauga e vai.+
7 O lau aʻoaʻiga ua sosola ai i latou;+
O le leo foʻi o lau faititili ua taufetuli ai i latou i le fefefe
8 Ua manu aʻe mauga,+
Ua ō ifo foʻi vanu laugatasi
I le mea ua e saunia mo i latou.
9 Ua e faataatia le tuaoi ina ia latou lē sopoʻia,+
Ina ia latou lē toe lofia le laueleele.+
10 Ua ia aauina atu vaipuna i ālia;+
Ua tatafe pea i va o mauga.
11 Ua feinu ai pea manufeʻai uma o le vao;+
E malilie ai e lē aunoa le fia feinu o solofanua tusitusi.+
12 O luga aʻe o vai e nonofo ai manufelelei o le lagi;+
E lagona pea o latou leo mai i totonu o lālā o laau lauolaola.+
13 E faasūsū e ia mauga mai i ona potu i luga.+
O fua foʻi o au galuega ua faamalieina ai le laueleele.+
14 Ua faatutupu e ia le mutia lanu meamata mo manu,+
Ma laau ʻaina e faaaogā e tagata,+
Ina ia faatupu aʻe meaʻai mai i le laueleele,+
15 Ma le uaina e faafiafia ai le loto o le tagata,+
Ma le suāuu e faamomosi ai foliga,+
Ma le meaʻai e faamalosi ai le tino o le tagata.+
16 Ua malilie i vai laau a Ieova,+
O arasi foʻi o Lepanona na ia totōina,
17 E fai ai e manulele o latou ofaga.+
Ua fai foʻi laau o perosi ma fale o le kasita.+
18 O mauga maualuluga+ e mo ʻoti o le vao;+
O papa foʻi o le mea lea e sulufaʻi i ai sefanai.+
19 Ua faia e ia le masina e faailoga ai taimi atofaina;+
A ua iloa e le lā le mea e goto i ai.+
20 Ua e faia le pōuliuli ina ia avea ma pō;+
E feoaʻi ai manu tataa uma o le vaomatua.
21 E fetagisi tamaʻi leona taanoa mo ni meaʻai+
Ma saʻilia a latou meaʻai mai i le Atua.+
22 Ua amata susulu mai le lā,+ ona latou ō ese atu lea
Ma taooto i mea e latou te lalafi ai.
23 E alu atu ai le tagata i lana galuega+
Ma faia lana auaunaga seʻia oo i le afiafipō.+
24 Ieova e, ua matuā tele lava au galuega!+
Ua e faia ia mea uma i le atamai.+
Ua tumu foʻi le lalolagi i mea na e faia.+
25 A o lenei sami e matuā telē ma lautele,+
O loo iai i inā le lē mafaitaulia o mea o loo feoaʻi ai,+
O meaola lāiti atoa ma meaola lapopoʻa.+
26 O i inā e feoaʻi ai vaa;+
Na e faia foʻi le korokotaila+ e taalo ai i inā.+
27 O loo faatalitali atu pea ia mea uma iā te oe+
E avatu a latou meaʻai i ona taimi e tatau ai.+
28 E latou te ave mea e te avatu iā i latou.+
E te faamafola foʻi lou aao ma faamalieina ai i latou i mea lelei.+
29 Afai e natia ou fofoga, ona atuatuvale ai lea o i latou.+
Afai e te aveesea lo latou agaga, ona mamate ai lea,+
Ma toe foʻi atu i latou i le efuefu.+
30 Afai e te auina atu lou agaga, ona faia ai lea o i latou;+
Ma ua e faafouina ai foʻi le laueleele.
31 E faavavau le mamalu o Ieova.+
E olioli foʻi Ieova i ana galuega.+
32 Ua ia silasila mai i le lalolagi, ma ua gatete ai;+
Ua ia papaʻi mai foʻi i mauga, ma ua asu ai.+
33 Ou te pese iā Ieova i loʻu olaga atoa;+
Ou te fai pesega foʻi i loʻu Atua a o ou ola pea.+
34 Ia mālie iā te ia oʻu mafaufauga.+
O aʻu foʻi ou te fiafia iā Ieova.+
35 E faaumatia o ē e agasala mai i le lalolagi;+
A o ē e amioleaga, e lē toe iai i latou.+
Loʻu loto e, inā vivii atu ia iā Ieova. O outou le nuu e, inā vivii atu ia iā Ioa!+