2 Nofoaiga a Tupu

20 Mulimuli ane, ona ō mai ai lea o le fanauga a Moapi+ ma le fanauga a Amoni,+ ua faatasi ma i latou nisi mai i Amonima+ e siitaua atu iā Iosefatu.+ 2 Ona ō mai lea o le nuu ma taʻu mai iā Iosefatu, e faapea: “O loo ō mai se motu o tagata e toʻatele e siitaua iā te oe mai i le itu o le sami, ma mai i Etoma+ foʻi; vaai, o loo iai i latou i Haseso-tamara, o Enokati lea.”+ 3 Ona fefe+ ai lea o Iosefatu ma ua maumauaʻi e saʻili atu iā Ieova.+ Ua ia talaʻi foʻi le anapogi+ iā Iuta uma. 4 Mulimuli ane, ua faapotopoto faatasi tagata o Iuta ina ia fesili atu iā Ieova.+ Ua ō mai foʻi i latou mai i aai uma o Iuta e fesili atu iā Ieova.+

5 Ona tulaʻi lea o Iosefatu i le faapotopotoga o Iuta ma Ierusalema i le fale o Ieova+ i luma o le lotoā fou,+ 6 ua ia faapea atu:+

“Ieova e, le Atua o o matou augātamā,+ pe e lē o oe ea o le Atua o le lagi,+ pe e te lē o pule ea foʻi i malo uma o nuu,+ po ua lē o i lou aao ea le mana ma le malosi, e leai foʻi se tasi e mafai ona faasagatau atu iā te oe?+ 7 Lo matou Atua e,+ pe e te leʻi tutuliesea ea tagata sa nonofo i lenei nuu mai i luma o lou nuu o Isaraelu,+ ma foaʻiina+ atu i le fanau a Aperaamo, o lē na alofa+ iā te oe i aso uma? 8 Ona latou nonofo lea i le nuu, ma ua latou faia mo oe le malumalu mo lou suafa,+ ua faapea atu, 9 ‘Afai e oo mai iā i matou ni mala,+ o le pelu, o le faasalaga mamafa, po o le faamaʻi,+ ma le oge,+ e matou te tutū atu i luma o lenei fale+ ma ou luma (auā o loo i lenei fale lou suafa),+ ina ia o matou valaau atu i lau fesoasoani i o matou puapuaga, ia e faafofoga mai ma e faaola mai.’+ 10 O lenei, o le fanauga a Amoni,+ o Moapi,+ ma vaega maugā o Seira,+ o ē na e lē tuuina atu iā Isaraelu ina ia osofaʻia ina ua latou ō mai mai i le nuu o Aikupito, ae na liliuese i latou mai iā i latou, ma e leʻi faaumatia i latou,+ 11 silasila, ua latou tauia+ mai i matou, e ala i le ō mai e tutuliese i matou mai i lou tofi na e foaʻiina mai iā i matou.+ 12 Lo matou Atua e, pe e te lē faamasinoina ea i latou?+ Auā ua leai se malosi iā i matou i luma o lenei motu o tagata, o loo ō mai e faasagatau iā i matou;+ ua matou lē iloa se mea e fai,+ a ua faasaga atu o matou mata iā te oe.”+

13 Ua tutū i latou uma i Iuta i luma o Ieova,+ e oo lava i o latou tamaiti,+ o a latou avā, ma o latou atalii.

14 A o Iaaseelu le atalii o Sakaria, le atalii o Penaia, le atalii o Ieielu, le atalii o Matania le sa Levī mai i le fanauga a Asafo,+ na i ona luga le agaga+ o Ieova i totonu o le faapotopotoga. 15 Ua ia faapea atu: “Inā uaʻi mai ia Iuta uma, ma outou o nonofo i Ierusalema, ma le Tupu o Iosefatu! O le mea lenei na fetalai mai ai Ieova iā te outou, ‘Aua tou te fefefe+ pe atuatuvale ona o lenei motu o tagata e toʻatele; auā e lē o outou e ona le taua, a o le Atua.+ 16 O a taeao e tou te ō ifo ai e tau ma i latou. Auā e ō aʻe i latou mai i le mafa o Susa; ma e tou te maua lava i latou i le pito o le ālia i luma o le toafa o Ieruelu. 17 E tou te lē tau i lenei taua.+ Inā tutū ia outou ma tutumau,+ ma vāai i le faaolataga+ a Ieova iā te outou. Iuta ma Ierusalema e, aua tou te fefefe pe atuatuvale.+ Inā ō atu ia a taeao e tau ma i latou, e faatasi foʻi Ieova ma outou.’”+

18 Ona ifo lea o Iosefatu ma faapaʻū faō i le eleele,+ ua faapaʻuʻū foʻi Iuta uma ma ē o nonofo i Ierusalema i luma o Ieova, ma ifo atu iā Ieova.+ 19 Ona tutulaʻi lea o sa Levī+ o le fanauga a Kato+ ma le fanauga a sa Korū,+ ua vivii atu iā Ieova le Atua o Isaraelu ma le matuā leotetele.+

20 Ua latou tutulaʻi i le taeaopō ma ō atu i le toafa+ o Tikoa.+ A o latou ō atu, ona tulaʻi lea o Iosefatu ua faapea atu: “Inā faalogo mai ia iā te aʻu, Iuta e, ma outou o loo nonofo i Ierusalema!+ Ia faatuatua+ atu iā Ieova lo outou Atua, ina ia faatumauina ai outou. Ia faatuatua atu foʻi i ana perofeta,+ ina ia manuia ai.”

21 Ua ia filifili+ foʻi ma le nuu ma tofia tagata pepese+ iā Ieova, ma i latou e ofo atu viiga+ i ofu paia,+ a o latou ō atu e muamua atu i tagata ua faaauupegaina,+ ma faapea atu: “Ia outou vivii atu iā Ieova,+ auā e alofa faamaoni o ia e oo i le faavavau.”+

22 Ina ua amata ona latou alalaga olioli ma vivii atu, ona faalalafi+ lea e Ieova o ʻau e tau ma le fanauga a Amoni, o Moapi, ma le vaega maugā o Seira o ē na ō mai i Iuta, ua latou fefasiaʻi foʻi.+ 23 Ona tutū lea o le fanauga a Amoni ma Moapi ua faasagatau i ē o loo nonofo i vaega maugā o Seira,+ ina ia faaumatia i latou ma soloia; ma ina ua uma ona latou faaumatia ē o loo nonofo i Seira, ona fesoasoani lea o le tasi i le isi e faafanoina lona lava uso.+

24 A o Iuta, ua oo atu i le olomatamata o le toafa.+ Ina ua latou liliu atu i le motu o tagata, vaai foʻi iā i latou, ua taatitia o latou tino oti i le eleele,+ e leai se tasi na sao mai ai. 25 Ona ō atu lea o Iosefatu ma ona tagata, ua faoa le vete+ mai iā i latou, na maua foʻi e i latou mai i na mea le tele o oloa ma lavalava ma mea matagofie; ua latou ō atu ma talai ese mai na mea iā te i latou, seʻia oo ina lē mafai ona latou toe aveina ni mea.+ E tolu aso na latou faoa ai le vete, auā e matuā tele lava. 26 Ua latou faapotopoto faatasi foʻi i le aso lona fā i le fanua laugatasi o Peraka, auā ua latou vivii atu iā Ieova+ i inā. O le mea lea ua latou faaigoa+ ai lea nofoaga, o le Fanua Laugatasi o Peraka, seʻia oo mai i aso nei.

27 Ona toe foʻi mai lea o tagata uma o Iuta ma Ierusalema faatasi ma Iosefatu e muamua atu iā i latou, ua toe foʻi i Ierusalema ma le olioli, auā ua faafiafiaina i latou e Ieova ona o o latou fili.+ 28 Ua latou ō mai i Ierusalema ma meafaifaaili e iai uaua,+ o kitara,+ ma pū+ i le fale o Ieova.+ 29 Ua oo foʻi le mataʻu+ i le Atua i malo uma o nuu, ina ua latou faalogo ua tau Ieova faasaga i fili o Isaraelu.+ 30 Ua filemu foʻi le malo o Iosefatu mai i taua, ua tuuina atu pea e le Atua iā te ia le mapusaga i itu uma.+

31 Ua pule pea Iosefatu+ iā Iuta. E tolu sefulu lima ona tausaga ina ua fai o ia ma tupu, ma e lua sefulu lima tausaga na ia pule ai i Ierusalema. O le igoa o lona tinā o Asopa+ le afafine o Seleki. 32 Na savali pea o ia i le ala o Asa+ lona tamā, e leʻi liliuese mai ai lava o ia i le faia o le mea tonu i luma o Ieova.+ 33 E na o mea maualuluga+ e na te leʻi aveeseina; e leʻi saunia foʻi e le nuu o latou loto mo le Atua o o latou augātamā.+

34 A o le olaga uma o Iosefatu, o mea muamua ma mea mulimuli, ua tusia ia i upu a Ieu+ le atalii o Hanani,+ ia na taʻua i le Tusi+ o Tupu o Isaraelu. 35 Ua mavae ia mea, ona faifaimea faatasi ai lea o Iosefatu le tupu o Iuta ma Aasaia+ le tupu o Isaraelu, o lē na faia mea leaga.+ 36 Ona ia faifaimea faatasi ai lea ma ia i le faia o vaa e ō atu i Tasesa,+ ua latou faia foʻi vaa i Esiokape.+ 37 Ae peitaʻi, na tautala faavaloaga Elisara le atalii o Totava mai i Maresa, e faatatau iā Iosefatu, e faapea: “Ona ua lua faifaimea faatasi ma Aasaia,+ o le mea lea e faalēaogāina ai e Ieova au galuega,+ ona faaleagaina+ ai lea o vaa ma ua lē mafai ai ona ō atu i Tasesa.+