2 Korinito

13 O le faatolu lenei+ ona ou alu atu iā te outou. “E faamaonia mataupu uma i le molimau a le toʻalua po o le toʻatolu.”+ 2 Na ou fai atu muamua, e peiseaʻī ua ou iai faalua a ua ou lē iai i le taimi nei, ou te muaʻi fai atu iā i latou o ē na agasala muamua ma ē uma o totoe, pe afai ou te toe alu atu, ou te lē faapalepale lava,+ 3 talu ai ua outou saʻilia se faamaoniga ua fetalai mai Keriso iā te aʻu,+ ua lē vaivai Keriso iā te outou, ae ua malosi iā te outou. 4 O le mea moni, na tutuʻi o ia i luga o le laau+ ona o le vaivai,*+ ae ua soifua o ia ona o le mana o le Atua.+ E moni foʻi, e ui ina matou vaivai e pei ona sa vaivai o ia, ae e matou te ola faatasi ma ia+ ona o le mana o le Atua+ ua iā te outou.

5 Ia tofotofo pea iā te outou po o outou iai i le faatuatua, ia suʻesuʻe ifo pea iā te outou po o faapeʻī outou.+ Pe tou te lē iloa ea o loo outou autasi ma Iesu Keriso?+ Ae seʻi vaganā ai e lē o taliaina outou. 6 Ou te faamoemoe o le a outou iloa, ua taliaina i matou.

7 Matou te tatalo+ i le Atua ina neʻi o outou faia se mea sesē, e lē peiseaʻī ua taliaina i matou, ae ina ia outou faia le mea lelei, e ui lava e peiseaʻī e lē o taliaina i matou. 8 Auā e lē mafai ona matou faia se mea e leaga ai le upu moni, ae na o mea e lelei ai le upu moni.+ 9 E matou te olioli pe a outou malolosi e ui ina matou vaivai,+ ma ua matou tatalo+ ina ia toe faasaʻoina o outou manatu. 10 Ua ou tusi atu i nei mea ae ou te lē o iai, ina ia ou lē faia ma le ʻinaʻinā+ se mea pe a ou iai, e tusa ma le pule ua tuuina mai e le Alii iā te aʻu e atiaʻe ai,+ ae lē ia faavaivai ai.

11 O laʻu toe upu lenei le ʻauuso e, ia faaauau ona outou olioli, ia toe faasaʻo o outou manatu, ia faamāfanafanaina,+ ia tutusa o outou mafaufau,+ ia nonofo ma le filemu,+ ona faatasi lea iā te outou o le Atua o le alofa ma le filemu.+ 12 Ia faafeiloaʻi e le tasi le isi i le sogi paia.+ 13 O loo alolofa uma atu lava le ʻaupaia iā te outou.

14 Ia iā te outou uma le agalelei faifua o le Alii o Iesu Keriso, ma le alofa o le Atua, ma ia outou maua aogā mai i le agaga paia.+