1 Nofoaiga a Tupu

22 Ua fai atu Tavita: “O le fale+ lenei o Ieova le Atua moni, ma o le fata faitaulaga+ foʻi lenei mo le taulaga mū mo Isaraelu.”

2 Ua fai atu Tavita e faapotopoto faatasi mai tagata ese+ sa i le nuu o Isaraelu, ona ia tofia lea o i latou e avea o tufuga e tipiina maa,+ e tipiina maa+ faatafafā mo le fausiaina o le fale o le Atua moni. 3 Ua saunia foʻi e Tavita o uʻamea e tele mo fao o faitotoʻa o pā ma mea e sosoo ai, atoa ai ma ʻapamemea e tele ua lē mafai ona fuaina,+ 4 o laupapa arasi+ foʻi e lē mafaitaulia; auā na aumai e tagata Saitonu+ ma tagata Turo+ o laupapa arasi e tele lava iā Tavita. 5 Ona fai atu lea o Tavita: “O Solomona loʻu atalii, e laʻitiiti ma e lē lava lona poto masani,+ a o le fale o le a fausia iā Ieova e matuā sili+ ma matagofie,+ e ese mai i nuu uma. Ou te faia ni sauniuniga mo ia.” O lea na faia ai e Tavita le tele o sauniuniga a o leʻi oti o ia.+

6 Ua ia valaau atu foʻi iā Solomona lona atalii, ina ia poloaʻi atu iā te ia e fausia se fale iā Ieova le Atua o Isaraelu. 7 Ua fai atu foʻi Tavita iā Solomona lona atalii: “Sa naunau lava loʻu loto+ e fausia se fale mo le suafa+ o Ieova loʻu Atua. 8 A ua oo mai le afioga a Ieova iā te aʻu, e faapea, ‘Ua tele le toto ua e faamaligiina,+ ua tele foʻi taua ua e tauina.+ E te lē fausia se fale mo loʻu igoa,+ auā ua matuā tele le toto ua e faamaligiina i luga o le laueleele i oʻu luma. 9 Faauta! Ua fanau mai se atalii+ iā te oe. O ia o se tagata toʻafilemu, ma ou te avatu lava iā te ia le mapusaga mai i ona fili uma;+ o lona igoa o Solomona,+ ou te tuuina atu le filemu+ ma le toʻafimālie iā Isaraelu i ona aso. 10 O ia na te fausia se fale mo loʻu igoa,+ e fai o ia ma oʻu atalii,+ e fai foʻi aʻu ma ona tamā.+ Ou te matuā faatumauina lava le nofoālii+ o lona malo iā Isaraelu i aso uma.’

11 “O lenei, loʻu atalii e, ia faatasi Ieova ma oe, ia e manuia ma ia e fausia le fale o Ieova lou Atua, e pei ona ia fetalai mai ai e faatatau iā te oe.+ 12 Tau ina ia foaʻi atu e Ieova iā te oe le faautauta ma le malamalama,+ ma ia tuuina atu e ia iā te oe o poloaʻiga e faatatau iā Isaraelu, ma ia e tausia le tulafono a Ieova lou Atua.+ 13 Ona manuia+ ai lea o oe pe afai e te tausia tulafono,+ ma iʻuga o faamasinoga+ na poloaʻi+ mai ai Ieova iā Mose e faatatau iā Isaraelu. Ia lototele ma ia faamalosi.+ Aua le fefe+ pe atuatuvale.+ 14 O lenei, ua ou saunia ma loʻu tigā+ mo le fale o Ieova le selau afe o taleni auro,+ ma le miliona o taleni siliva, o ʻapamemea,+ ma uʻamea,+ ua lē mafai lava ona fuatia na mea auā ua matuā tele lava; ua ou saunia foʻi laupapa ma maa, ae ia e faaopoopo i ai nisi mea. 15 Ua iā te oe foʻi tagata e toʻatele e faia galuega, o tufuga e tipiina maa, o le ʻaufaigaluega i maa+ ma laupapa, ma tagata tomai uma i so o se galuega.+ 16 E lē mafaitaulia+ lava auro, o siliva, o ʻapamemea, ma uʻamea. Inā tulaʻi ia ma galue,+ ma ia faatasi Ieova ma oe.”+

17 Na poloaʻi atu Tavita i perenise uma o Isaraelu e fesoasoani iā Solomona lona atalii, e faapea: 18 “Po ua lē iā te outou ea Ieova lo outou Atua,+ ma po ua lē avatua ea e ia le mapusaga mo outou i itu uma?+ Auā ua tuuina mai e ia i loʻu lima tagata o le nuu, ma ua faatoʻilaloina le nuu i luma o Ieova+ ma luma o lona nuu. 19 O lenei, ia uaʻi atu o outou loto ma lo outou malosi+ e fesili atu iā Ieova lo outou Atua,+ inā tulaʻi ia ma fausia le malumalu+ o Ieova le Atua moni,+ e avatu i ai le atolaau+ o le feagaiga a Ieova, ma ipu paia a le Atua moni i le fale na faia mo le suafa+ o Ieova.”