Kenese
22 Ua mavae ia mea, ona tofotofoina lea o Aperaamo e le Atua moni.+ Ua ia fetalai mai iā te ia: “Aperaamo e!” Ona ia tali atu ai lea: “O aʻu lenei!”+ 2 Ua ia fetalai mai foʻi: “Faamolemole, ia ave lou atalii, o lou atalii e toʻatasi, o lē e te alofa faapelepele i ai+ o Isaako,+ ma malaga atu i le laueleele o Moria+ ma ofo mai ai o ia e fai ma taulaga mū, i se tasi o mauga ou te faasino atu iā te oe.”+
3 Ua usupō Aperaamo ma faanofoa lana asini, ua ave ana auauna e toʻalua faatasi ma ia ma lona atalii o Isaako;+ ua ia tātā foʻi fafie e fai ai le taulaga mū. Ona ia agaʻi atu lea i le mea na faasino atu e le Atua moni iā te ia. 4 Ua tepa aʻe Aperaamo i le aso lona tolu, ma faatoʻā iloa atu ai le nofoaga ae e mamao. 5 Ona fai atu lea o Aperaamo i ana auauna:+ “Ia oulua faatali atu i inei ma le asini, ae seʻi ma ō atu ma le tama i o e tapuaʻi+ ai i le Atua, ona ma toe ō mai ai lea.”
6 Ua tago Aperaamo i fafie e fai ai le taulaga mū ma faaee atu iā Isaako lona atalii,+ ae ua ia uu i ona lima le afi ma le naifi, ona la ō faatasi ai lea.+ 7 Ua fai mai Isaako iā Aperaamo lona tamā: “Loʻu tamā e!”+ Ua ia tali atu: “O aʻu lenei, loʻu atalii e!”+ Ua ia toe faapea mai: “O le afi lea ma fafie, ae o fea le mamoe e fai ai le taulaga mū?”+ 8 Ua tali atu Aperaamo: “Lou atalii e, e saunia e le Atua le mamoe mo ia e fai ai le taulaga mū.”+ Ona la savavali faatasi ai lea.
9 Ua la oo i le mea na faasino mai e le Atua moni iā te ia, ua fausia ai e Aperaamo le fata faitaulaga+ i inā, ua ia faatulaga fafie ona ia saisai lea o lima ma vae o lona atalii o Isaako, ma faataatia o ia i luga o fafie+ o le fata faitaulaga. 10 Ua aapa atu le lima o Aperaamo ma aumai le naifi e fasioti ai lona atalii.+ 11 A ua valaau mai i le lagi le agelu a Ieova iā te ia e faapea:+ “Aperaamo, Aperaamo e!” ona ia tali atu lea: “O aʻu lenei!” 12 Ua ia fetalai atili mai: “Aua neʻi oo lou lima i le tama, aua foʻi e te faia se mea iā te ia,+ auā ua ou iloa nei o oe o sē e mataʻu i le Atua auā ua e lē taofia lou atalii, o lou atalii e toʻatasi, mai iā te aʻu.”+ 13 Ua tepa aʻe Aperaamo ma iloa atu i se mea e lē mamao tele, le mamoe poʻa ua lavelavea ona seu i le laau. Ona alu atu lea o Aperaamo ma aumai le mamoe poʻa ma fai ai le taulaga mū, e sui ai lona atalii.+ 14 Ona faaigoa lea e Aperaamo o lea nofoaga o Ieova-irae.* O le mea lea ua iai se faaupuga masani i aso nei: “I le mauga o Ieova, e na te saunia mea e manaʻomia.”+
15 Ua toe valaau faalua mai i le lagi le agelu a Ieova iā Aperaamo, 16 e faapea: “‘Ou te tautō aʻu iā te aʻu lava,’ ua fetalai mai ai Ieova,+ ‘ona o lou faia o lenei mea ma lou lē taofia o lou atalii, o lou atalii e toʻatasi lava,+ 17 ou te matuā faamanuia ai iā te oe, ou te matuā faatoʻateleina lau fanau e pei o fetu o le lagi, e pei foʻi o oneone o le matafaga;+ e pule foʻi lau fanau i le faitotoʻa* o ona fili.+ 18 O lau fanau+ e maua ai e nuu uma o le lalolagi faamanuiaga* talu ai ua e faalogo i loʻu leo.’”+
19 Ua toe foʻi atu Aperaamo i ana auauna, ona latou ō faatasi ai lea i Peresepa;+ ua nofo ai pea Aperaamo i Peresepa.
20 Mulimuli ane ua logotala Aperaamo e faapea: “Ua fanaua e Meleka+ o atalii mai i lou uso o Nakori:+ 21 O Usa le ulumatua, o Pusa+ lona uso, o Kimueli le tamā o Arama, 22 o Kiseta, o Haso, o Pilitaso, o Itelafo ma Petueli.”+ 23 O Petueli o le tamā o Repeka.+ O le fanau lea e toʻavalu a Meleka iā Nakori le uso o Aperaamo. 24 Ua iai foʻi lana palake* o lona igoa o Reuma. Mulimuli ane, ua ia fanaua foʻi o Tepa, o Kaamo, o Taaso, ma Maaka.+