Isaia

34 O outou nuu e, inā faalatalata mai ia ma faalogo mai;+ o outou atunuu e,+ inā uaʻi mai ia. Ia faalogo+ mai foʻi le lalolagi ma mea o loo tumu ai,+ o le fogāeleele ma mea uma o loo ola ai.+ 2 Auā ua toʻatamaʻi Ieova faasaga i nuu uma,+ ma ua maʻemaʻeā i a latou ʻautau uma.+ E tatau ona ia faaumatia i latou; e ao foʻi ona ia tuuina atu i latou ia fasiotia.+ 3 E lafoina o latou tagata ua fasiotia; o le a alu aʻe le elo mai i o latou tino oti;+ e liusuavai foʻi mauga ona o lo latou toto.+ 4 E pala i latou uma o ʻau o le lagi.+ E taataʻai le lagi e pei o se tusi tāʻai;+ ma o le a mamae o latou ʻau e pei ona mamae ma toʻulu o lau o le vine, e pei foʻi ona mamae ma toʻulu o lau o le mati.+

5 “Auā o le a matuā susū laʻu pelu+ i le lagi. Faauta! o le a paʻū ifo iā Etoma,+ ma luga o le nuu e ao ona ou fasiotia+ e tusa ma le faamasinotonu. 6 O loo iā Ieova le pelu; e ao ona faasūsūina i le toto;+ e ao ona gaʻoa i le gaʻo,+ i le toto o tamaʻi mamoe poʻa ma ʻoti poʻa, ma le gaʻo o fatugaʻo o mamoe poʻa. Auā ua saunia e Ieova le taulaga i Posara, ma le fasiotiga tele i le atunuu o Etoma.+ 7 E paʻuʻū povi poʻa+ o le vao faatasi ma i latou, o tamaʻi povi poʻa faatasi ma povi poʻa malolosi;+ o le a matuā susū lo latou laueleele i le toto, ma o le a gaʻoa le efuefu i le gaʻo.”+

8 Auā e iai le aso o le tauimasui a Ieova,+ e taui atu ai mo le tausaga atoa e tusa ma le mataupu faaletulafono ona o Siona.+

9 E liua ona vaitafe i le tā, e liu teiō* ona efuefu ma avea ai lona laueleele ma tā ua mumū.+ 10 E lē tineia i le pō po o le ao; o le a pusa aʻe pea lona asu.+ O le a faatafunaina ia mai i lea tupulaga i lea tupulaga;+ e lē toe ui ai se tasi e oo i le faavavau.+ 11 O le a nofo ai le manulele o le kati ma le manu o le kifota, e nonofo ai foʻi lulu e uumi taliga ma le manulele o le oreva;+ ma e ao ona ia fofola i ona luga le fua+ faataoto o le gaogao ma maa o le fua tautau e tuufua ai. 12 E leai sona tamālii e toe avea ma tupu, ma o le a lē toe iai ni ona perenise.+ 13 E sosolo laau tuitui i ona maota, e ola foʻi laau ogoogo ma vao tuitui i ona nofoaga malupuipuia;+ e avea o ia ma mea e nonofo ai taʻifau o le vao,+ ma lotoā mo iaena.+ 14 Ua fetaiaʻi manu o le vao ma manu ua uiō leotetele i laueleele ua leai ni vai, o le a valaau atu foʻi le temoni*+ mo sana uō. Ioe, o le a mālōlō ai i inā le lilita* ma maua ai sona mapusaga.+ 15 O i inā foʻi e fai ai le faamoega o le gata oso, e tuu ai ona fua, e fofoa ai foʻi ona fua ma ufiufi ai i ana fanau. Ioe o i inā e potopoto ai manulele taufeʻai,*+ e taʻitasi ma lana paaga.

16 Ia outou saʻiliʻili i le tusi+ a Ieova ma faitau leotele i ai: e leai se isi o i latou e leiloa;+ e leai se isi e lē o iai sana paaga, auā o le fofoga o Ieova ua fetalai mai ai lenei poloaʻiga,+ ma o lona agaga foʻi ua faapotopoto faatasi ai i latou.+ 17 Ua Ia faia foʻi le vili mo i latou, o lona aao foʻi ua faatulagaina lea mea mo i latou e ala i le fua faataoto.+ O le a fai mo i latou i aso uma; e latou te nonofo ai i lea tupulaga ma lea tupulaga.