Teuteronome
18 “E leai se fanua po o se tofi e maua e ositaulaga i Isaraelu, o le ʻau sa Levī, o le ituaiga uma ia o Levi.+ O taulaga iā Ieova ua faia i le afi, o lona tofi lea, e latou te aai ai.+ 2 E lē maua sona tofi faatasi ma ona uso. O Ieova o lona tofi lea,+ e pei ona ia fetalai mai ai iā te ia.
3 “O le mea lenei e ao ona maua pea e ositaulaga mai i le nuu, mai i ē e fai taulaga, po o se povi poʻa po o se mamoe: E ao ona ave i le ositaulaga le alagalima, o le ʻauvaealalo ma le puta. 4 E ao ona e avatu iā te ia le uluaʻi fua o lau saito,* o lau uaina fou, o lau suāuu ma le selega muamua o fulufulu mamoe o lau lafu.+ 5 Auā o ia lea ua filifilia e Ieova lou Atua mai i ou ituaiga uma, ina ia tū e auauna pea i le suafa o Ieova, o ia ma ona atalii.+
6 “Ae afai e alu ese se sa Levī mai i se tasi o ou aai o Isaraelu uma, mai i le mea sa nofo ai mo sina taimi,+ ma e alu atu o ia ma le manaʻo atoatoa o lona loto i le nofoaga o le a filifilia e Ieova,+ 7 e ao foʻi la ona ia auauna i le suafa o Ieova lona Atua e pei ona faia e ona uso uma, o le ʻau sa Levī, o ē e tutū i lea mea i luma o Ieova.+ 8 E tutusa lana tufaaga e ao ona ʻai ai,+ e ese mai i mea e maua e ia i lona faatau atu o oloa sa i lona tamā.
9 “Pe a e ulu atu i le laueleele ua tuuina mai e Ieova lou Atua iā te oe, aua neʻi e faataʻitaʻi i mea inosia ua faia e na nuu.+ 10 Aua neʻi maua iā te oe o se tasi e faaui* ane lona atalii po o lona afafine i le afi,+ o sē e faia valovaloga faataulāitu,+ o sē e faia faiga faaagaga,+ po o se tasi e saʻili i ni faailoilo+ o mea o le a tutupu po o se faataulāitu,+ 11 po o se tasi e na te faalauatau i isi,+ po o se tasi e alu atu i sē e saʻili i agaga,*+ po o lē e vavalo i mea e tutupu i le lumanaʻi,+ po o se tasi e fesili atu i ē ua oti.+ 12 E inosia e Ieova i latou uma e faia na mea, e tuliesea foʻi e Ieova lou Atua mai i ou luma i latou ona o ia mea inosia.+ 13 Ia lē ponā lau amio iā Ieova lou Atua.+
14 “Auā ua masani nuu ia e te faatoʻilaloina ona faalogo i ē e faia faiga faaagaga,+ ma ē e faia valovaloga faataulāitu;+ a o oe, e leʻi faatagaina oe e Ieova lou Atua e faia faapea.+ 15 Ae e tofia e Ieova lou Atua mo oe se perofeta e pei o aʻu mai iā te oe, mai i ou uso, e ao ona outou faalogo iā te ia,+ 16 e tusa ai ma au talosaga uma iā Ieova lou Atua i Horepa i le aso na faapotopoto ai le faapotopotoga+ e faapea, ‘Aua neʻi oʻu toe faalogo i le siʻufofoga o Ieova loʻu Atua, ma aua foʻi neʻi oʻu toe vaai i lenei afi tele neʻi oʻu oti.’+ 17 Ona fetalai mai lea o Ieova iā te aʻu, ‘Ua lelei le mea ua latou fai mai ai.+ 18 Ou te tofia se perofeta mo i latou mai i o latou uso, e pei o oe;+ ou te tuu foʻi aʻu upu i lona gutu,+ ma o le a ia tautala atu iā i latou i mea uma ou te poloaʻi atu ai iā te ia.+ 19 O le tagata e lē faalogo i aʻu upu a ua ia tautala i loʻu igoa, ou te tāpā se tali mai iā te ia e tusa ma lea mea.+
20 “‘Peitaʻi o se perofeta e faamaualuga ma tautala i loʻu igoa i se upu ou te leʻi poloaʻi atu e tautala+ ai pe tautala i se igoa o isi atua,+ e ao ona oti lenā perofeta.+ 21 Afai e te faapea ifo i lou loto: “E faapefea ona matou iloa upu e leʻi fetalai mai ai Ieova?”+ 22 pe a tautala le perofeta i le igoa o Ieova ma e lē taunuu upu pe e lē oo foʻi lea mea, o upu ia e leʻi fetalai mai ai Ieova. O le faamaualuga o lea perofeta ua tautala ai o ia.+ Aua e te fefe iā te ia.’+