Levitiko

17 Ua fetalai mai foʻi Ieova iā Mose e faapea: 2 “Ia e fai atu iā Arona ma ona atalii, atoa ma le fanauga uma a Isaraelu, ia e faapea atu iā i latou, ‘O le mea lenei na poloaʻi mai ai Ieova:

3 “ʻ“O so o se tagata o le nuu o Isaraelu na te fasi se povi poʻa, po o se tamaʻi mamoe poʻa, po o se ʻoti i le togālauapi pe fasi foʻi i fafo o le togālauapi, 4 ae e lē aumaia i le faitotoʻa o le faleʻie o le feiloaʻiga,+ ina ia avatu e fai ma taulaga iā Ieova i luma o le faleʻie paia o Ieova, e nofosala lea tagata i le toto. Ua ia faamasaatoto, ma e ao ona fasiotia o ia,+ 5 ina ia aumaia e le fanauga a Isaraelu a latou taulaga ia ua masani ona latou faia i le laufanua,+ ma e ao ona latou aumai iā Ieova i le faitotoʻa o le faleʻie o le feiloaʻiga i le ositaulaga,+ ma e ao ona latou avatu ia taulaga e fai ma taulaga faifaatasi iā Ieova.+ 6 E ao i le ositaulaga ona sausau le toto i luga o le fata faitaulaga+ o Ieova i le faitotoʻa o le faleʻie o le feiloaʻiga, ma susunu ai le gaʻo+ e fai ma mea e manogi e faamalieina ai Ieova.+ 7 E lē tatau ona latou toe faia a latou taulaga i temoni*+ o ē ua latou faitaaga+ faatasi i ai. E fai lenei mea ma tulafono iā te outou mo se taimi umi, i o outou tupulaga o loo mulimuli mai.”’

8 “E te fai atu foʻi iā i latou, ‘O so o se tasi o le nuu o Isaraelu, po o se tagata ese lea e aumau iā te outou, e na te faia se taulaga mū+ po o se isi taulaga 9 ae e lē aumaia i le faitotoʻa o le faleʻie o le feiloaʻiga e avatu ai iā Ieova,+ e tatau ona fasiotia lea tagata.+

10 “‘O so o se tasi o le nuu o Isaraelu po o se tagata ese lea e aumau iā te outou na te ʻaina so o se toto,+ ou te teena lea tagata+ ua ʻai i le toto, ma ou te fasiotia o ia. 11 Auā o le ola o le meaola ua iai i lona toto,+ ma ua ou tuuina le toto i luga o le fata faitaulaga mo outou e fai ai le togisala+ mo o outou ola, auā o le toto+ e fai ai le togisala+ ona ua iai le ola i le toto. 12 O le mea lea, ua ou fai atu ai i le fanauga a Isaraelu: “Aua lava neʻi ʻai se tasi o outou i le toto ma aua foʻi neʻi ʻai ai se tagata ese o aumau iā te outou+ i le toto.”+

13 “‘O so o se tasi o le fanauga a Isaraelu, po o se tagata ese o aumau iā te outou e alu e tulimanu ma maua se manu o le vao, po o se manulele e ʻaina, e ao ona ia faaalu lona toto+ ma tanu i le eleele.+ 14 Auā o le ola o ituaiga uma o meaola, o lona toto lea, ua iai le ola i le toto. O le mea lea, ua ou fai atu ai i le fanauga a Isaraelu: “Aua tou te aai i le toto o ituaiga uma o meaola, auā o le ola o so o se ituaiga o meaola, o lona toto lea.+ E fasiotia so o se tasi e ʻai ai.”+ 15 O so o se tasi e ʻai i le aano o se manu ua mate fua po o se manu ua saeia e se manu o le vao,+ e tusa po o se tagatānuu po o se tagata ese ua aumau iā te outou, e ao ona ia tatā ona ofu, ma tāʻele i le vai, ma e lē mamā o ia seʻia oo i le afiafipō;+ ona mamā ai lea o ia. 16 Ae afai e na te lē tatāina ona ofu ma e lē tāʻele lona tino, e ao ona ia tali atu mo lana mea sesē.’”+