Kalatia

3 Tagata Kalatia vālea e, o ai na faasesēina outou,+ ae ua outou malamalama lelei i le tutuʻiina o Iesu Keriso i luga o le laau?+ 2 O le mea lenei ua ou fia iloa mai iā te outou: Pe na outou mauaina le agaga+ ona o galuega o le tulafono,+ po ona o le faatuatua i mea ua faalogo+ i ai? 3 Po ua outou matuā vālea ea? Na outou amata i le faaleagaga,+ po ua outou faaiʻu ea i le faaletino?+ 4 Pe na oo fua ea iā te outou le tele o mafatiaga?+ E mautinoa e leʻi oo fua na mea. 5 O lē na te avatu le agaga+ iā te outou ma faia galuega mamana+ iā te outou, pe na ia faia ea ona o galuega o le tulafono, po ona o le faatuatua i mea ua faalogo i ai? 6 E pei o Aperaamo, “na faatuatua o ia iā Ieova, ma na ia silasila ai iā te ia o lē e amiotonu.”+

7 E moni, ua outou iloa o i latou o ē e taofimau i le faatuatua,+ o i latou ia o atalii o Aperaamo.+ 8 Ina ua muaʻi iloa i Tusitusiga Paia e taʻuamiotonuina e le Atua tagata o nuu ese ona o le faatuatua, ona ia muaʻi folafolaina lea o le tala lelei iā Aperaamo e faapea: “E maua e nuu uma faamanuiaga ona o oe.”+ 9 O i latou ua taofimau i le faatuatua, e faamanuiaina+ i latou e pei ona faia i le tagata faatuatua o Aperaamo.+

10 E malaia i latou uma e faalagolago i galuega o le tulafono; auā ua tusia: “E malaia i latou e lē tausia mea uma ua tusia i le tusi tāʻai o le Tulafono ina ia faia.”+ 11 Ua faamaonia e lē taʻuamiotonuina+ e le Atua se tasi ona o le tulafono, auā “e ola lē e amiotonu i lona faatuatua.”+ 12 E lē manaʻomia e le Tulafono le faatuatua, a “o lē e tausia nei poloaʻiga, e ola ai o ia e tusa ma nei mea.”+ 13 O le faatauina+ o i tatou e Keriso, ua faasaʻolotoina+ ai i tatou mai i le malaia o le Tulafono, ma ua malaia+ o ia e sui ai i tatou, auā ua tusia: “E faamalaia i latou uma ua faatautauina i se laau.”+ 14 Ina ia oo ai i nuu ese le faamanuiaga o Aperaamo lea e ala mai iā Iesu Keriso,+ ina ia mafai ona tatou maua le agaga ua folafolaina+ mai e ala i lo tatou faatuatua.+

15 Le ʻauuso e, ou te faamatala atu se talafaatusa e masani ai tagata: O se feagaiga ua faamauina, e ui e faia e tagata, ae e leai se tasi e na te aveesea pe faaopoopoina i ai se mea.+ 16 O lenei, na faia ia folafolaga iā Aperaamo+ ma lana fanau.+ E lē o faapea mai: “O ana fanau,” e peiseaʻī e toʻatele, ae e toʻatasi lava:+ “O lau fanau,”+ o le Keriso lea.+ 17 Ou te fai atu foʻi: O le feagaiga lea na faamauina muamua e le Atua,+ e leʻi faalēaogāina e le Tulafono, lea na oo mai e tusa ma le fā selau tolu sefulu tausaga+ mulimuli ane, ina ia soloia ai le folafolaga.+ 18 Afai ua maua le tofi ona o le tulafono, ua lē maua la ona o le folafolaga,+ ae ua tuuina atu ma le agalelei e le Atua iā Aperaamo e ala i le folafolaga.+

19 O le ā la le aogā o le Tulafono? Na faaopoopo mai lea ina ia faaalia ai solitulafono+ seʻia oo mai le fanau+ na folafola i ai, na tuuina mai e agelu+ e ala mai i le puluvaga.*+ 20 E leai se puluvaga pe a na o le toʻatasi e aofia ai, ae e na o le toʻatasi le Atua.+ 21 Pe e tetee le Tulafono i folafolaga a le Atua?+ Ia aua lava neʻi faapea! Auā ana tuuina mai se tulafono e mafai ona maua ai e se tasi le ola,+ semanū e maua ai le amiotonu ona o le tulafono.+ 22 A ua punitia e Tusitusiga Paia+ mea uma lava i le pule a le agasala,+ ina ia tuuina atu i ē faatuatua le folafolaga ua maua ona o le faatuatua iā Iesu Keriso.+

23 A o leʻi oo mai le faatuatua,+ na puipuia i tatou e le tulafono,+ na taofiofia faatasi i tatou e le pule a le tulafono, ma tepa taulaʻi atu i le faatuatua o le a faaalia mai.+ 24 O lenei, ua avea le Tulafono ma o tatou taʻitaʻitama* e taʻitaʻia i tatou iā Keriso,+ ina ia taʻuamiotonuina+ ai i tatou ona o le faatuatua. 25 A o lenei ua oo mai le faatuatua,+ ua lē toe pule la le taʻitaʻitama iā i tatou.+

26 O le mea moni, o outou uma o atalii+ o le Atua, ona o lo outou faatuatua iā Keriso Iesu. 27 Auā o outou uma ua papatisoina iā Keriso,+ ua oofu iā Keriso.+ 28 E leai se Iutaia po o se Eleni,+ e leai se pologa po o sē e saʻoloto,+ e leai foʻi se tane po o se fafine,+ auā ua tasi outou uma i lo outou autasi ma Keriso Iesu.+ 29 Afai ua outou autasi ma Keriso, o outou la o le fanau a Aperaamo,+ o suli o le mea na folafolaina mai.+