Iopu
41 “Pe e mafai ona e toso ese le korokotaila*+ i se mātau,
Pe e mafai foʻi ona e taofia lona laulaufaiva i se maea?
2 Pe e mafai ona e tuu se maea e fai mai i le vao i ona pogaʻiisu,+
Pe e mafai foʻi ona e tui lona auvae i se laau tuitui?
3 Pe e faatele ea ona ʻaiʻoi atu o ia iā te oe,
Pe e tautala atu iā te oe i upu mālū?
4 Pe e lua te osia ea se feagaiga ma ia,
Ina ia avea ai o ia ma pologa i aso uma lava?
5 Pe e te lua taaalo ma ia e pei ona taaalo ma se manulele,
Pe e te nonoa o ia e faafiafia ai lau fanau teine lāiti?
6 Pe e faia ai e tagata ni fefaatauaʻiga?
Pe e latou te vaevaeina ea i ē e faia fefaatauaʻiga?
7 Pe e te faatumuina lona paʻu i mea maamaʻai,+
Po o lona ulu i tao e velo ai iʻa?
8 Ia tuu ai i luga lou lima.
Ia manatua le taua. Aua le toe faia.
9 Faauta! E mautinoa lava le lē taulau o se tasi e faamoemoe e na te puʻea o ia.
E paʻū foʻi se tasi pe a vaai atu iā te ia.
10 E leai se tasi e fia toa e na te faateʻi iā te ia.
Ma o ai foʻi se tasi e mafai ona tū mai i oʻu luma?+
11 O ai na ia muaʻi tuuina mai se mea iā te aʻu, ina ia ou tauia ai o ia?+
O mea uma o i lalo o le lagi, o aʻu ia.+
12 Ou te lē filemu e uiga i ona vaega
Po o lona malosi foʻi ma le matagofie o lona tino.
13 O ai e na te susuʻeina lona ofu tele?
O ai foʻi e mafai ona ulu atu i lona gutu?
14 O ai e na te tatalaina le faitotoʻa o lona gutu?
E mataʻutia ona nifo.
15 O atu una, o lona faasausili lea,
Ua tapunia e pei o se faamaufaailoga ua faamauina.
16 E putuputu le tasi i le isi,
E oo lava i le ʻea e lē mafai ona sao i ai.
17 Ua pipii faatasi le tasi i le isi;
Ua taofimau e le tasi le isi ma e lē mafai ona tuueseese.
18 E emo mai le malamalama pe a mafatua,
O ona mata foʻi e pei o le susulu mai o le tafa o ata.
19 E emo mai i lona gutu le uila,
E alu atu foʻi aloiafi mai i lona gutu.
20 E alu atu le asu mai i ona pogaʻiisu,
E pei o se ogaumu ua mū i vao.
21 O lana mānava e mū ai malala,
E alu atu foʻi le afi mai i lona gutu.
22 E i lona ua le malosi,
E matataʻu foʻi i latou o loo i ona luma.
23 E malō le paʻu i lalo o lona manava;
E pei o se uʻamea, e lē mafai ona aveesea.
24 O lona fatu e malō e pei o le maa,
Ioe, e malō e pei o le maa pito i lalo e olo ai saito.
25 Pe a tulaʻi o ia e fefe ai le tagata malosi;+
Ona o le atuatuvale ua lē mautonu ai i latou.
26 E lē mafai ona faatoʻilaloina o ia e le pelu,
E faapena foʻi le tao, o le tamaʻi aū, ma le aū.+
27 E manatu o ia i le uʻamea+ e na o se vao mago,
O le ʻapamemea foʻi e na o se laau pala.
28 E lē tuliesea o ia e le aū;
Ua suia foʻi maatā+ e avea e na o ni tagutugutu o saito.
29 E manatu o ia i le uatogi* e na o ni tagutugutu o saito,+
E ʻataʻata o ia i le tete o le tao.
30 O lona pito i lalo e pei o taʻega omea maamaʻai;
E faaloloa atu o ia e pei o se mea e soli ai saito+ i luga o le palapala.
31 E na te faapupuna le mea loloto e pei o se ulo;
Ma avea ai le sami e pei o se ulo o loo iai le suāuu.
32 Ua ia faamalamalamaina le ala i ona tua;
E manatu ai se tasi ua ulusinā le vai loloto.
33 E leai se mea e pei o ia i luga o le eleele,
Na faia o ia ina ia lē mataʻu.
34 E na te vaai i mea maualuluga uma.
O ia foʻi o le tupu o manufeʻai mataʻutia uma lava.”