O le Tusi i le Faapotopotoga i Filipi

1 O i maʻua o Paulo ma Timoteo, o pologa a Keriso Iesu, o le tusi lenei i le ʻaupaia uma o loo autasi ma Keriso Iesu o ē o i Filipi,+ atoa ma ovasia ma auauna o le faiva:*+

2 Tau ina ia iā te outou le agalelei faifua ma le filemu mai i le Atua lo tatou Tamā, ma le Alii o Iesu Keriso.

3 Ou te faafetai pea i loʻu Atua pe a ou manatua outou 4 i aʻu talosaga uma mo outou uma. Ou te faia ma le olioli aʻu talosaga taʻitasi,+ 5 ona o le fesoasoani ua outou faia i le* tala lelei mai lava i le uluaʻi aso seʻia oo mai i le asō. 6 Auā ua ou mautinoa i lenei mea, o lē na amataina le galuega lelei iā te outou, e na te faaiʻuina foʻi+ seʻia aulia le aso o Keriso Iesu.+ 7 Ua tatau iā te aʻu ona manatu i lenei mea e faatatau iā te outou uma, ona ou te manatua pea outou i loʻu loto, o outou uma o ē na tofusia faatasi ma aʻu i le agalelei faifua e lē gata i oʻu noanoataga,+ ae i le puipuia ma le faamautūina faaletulafono o le tala lelei.+

8 Auā ua silafia e le Atua loʻu matuā naunau iā te outou uma ma le alofa faapelepele, e pei ona faaalia e Keriso Iesu. 9 O le mea lenei ua faaauau ai ona ou tatalo, ina ia faatuputeleina pea lo outou alofa+ faatasi ma le poto saʻo+ ma le faautaga loloto;+ 10 ina ia outou faamautinoa o mea e sili ona tāua,+ ina ia outou lē ponā ma lē tausuai ai isi+ e oo i le aso o Keriso; 11 ia faatumuina foʻi outou i fua o le amiotonu e ala iā Iesu Keriso,+ ina ia faamamaluina ma viia ai le Atua.

12 O lenei le ʻauuso e, ou te manaʻo ina ia outou iloa, o le mea o loo tupu iā te aʻu ua iʻu ina agaʻigaʻi ai i luma le tala lelei, 13 o le mea lea, ua iloa ai e leoleo uma o le Emeperoa o Roma ma isi tagata uma+ oʻu noanoataga+ ona o Keriso. 14 Ua lototetele le toʻatele o le ʻauuso ua auauna i le Alii ona o oʻu noanoataga, ma ua atili ai ona latou faamalolosi e tautatala atu ma le lē fefefe i le afioga a le Atua.

15 E moni, o nisi tagata ua latou talaʻia le Keriso ona o le matauʻa ma le faatautavā, ae ua talaʻia e isi ona o le lelei o o latou loto. 16 O ē ua lelei o latou loto, ua latou folafola atu le Keriso ona o le alofa, auā ua latou iloa ua tofia aʻu e puipuia le tala lelei;+ 17 ae o ē o talaʻi ona o le matauʻa ma le faatautavā, ua latou faia ma le finauvale, ae e lē i se uunaʻiga lelei, auā ua latou naunau e faatupu faafitauli iā te aʻu i oʻu noanoataga. 18 O le ā na iʻu i ai? Ua faalogo tagata i le feʻau e uiga iā Keriso e tusa lava pe na folafolaina atu i se auala faatagāfai po o le auala saʻo, ma o le mea lenā ua ou olioli ai. O lea, e faaauau pea ona ou olioli, 19 auā ua ou iloa o lenei mea e iʻu i loʻu faaolataga, ona o a outou talosaga+ ma le fesoasoani mai o le agaga o Iesu Keriso.+ 20 E tusa lenei mea ma loʻu faatalitali ma le naunautaʻi, ma ou faamoemoe ina ia ou lē mā lava i se mea e tasi, ae ia ou saʻoloto e tautala atu, ina ia viia Keriso i le taimi nei e pei o le taimi ua teʻa e ala i loʻu nei tino, e tusa lava po o le ola po o le oti.+

21 Auā o loʻu ola ua iā Keriso lea,+ a o loʻu oti o loʻu manuia lea.+ 22 Afai e faaauau ona ou ola i le tino, o le fua lenei o laʻu galuega; ae ou te lē faailoa atu po o lē fea mea ou te filifilia. 23 Ua ou lē mautonu i nei mea e lua, auā ua ou naunau lava ina ia faasaʻoloto aʻu ma ia ma faatasi ma Keriso,+ lea e sili atu ona lelei.+ 24 Peitaʻi, e sili ona lelei mo outou pe a faaauau ona ou ola i le tino. 25 O lea, o loʻu mautinoa i lenei mea, ua ou iloa ai e tumau pea ona ou ola ma nonofo faatasi ma outou uma, mo lo outou agaʻigaʻi i luma ma lo outou olioli i le faatuatua, 26 ina ia faatuputeleina ai lo outou olioli iā Keriso Iesu ona o aʻu, pe a ou toe faatasi ma outou.

27 Ia ōgatusa a outou gaoioiga* ma le tala lelei i le Keriso,+ ma pe a ou alu atu e feiloaʻi ma outou po ou te lē alu atu foʻi, tau ina ia ou faalogo i mea e faatatau iā te outou, ua outou tutū mausalī i le mafaufau e tasi ma le tino e tasi,*+ a o galulue soosootauʻau mo le faatuatua i le tala lelei, 28 ma ia lē fefefe i ē o loo tetee mai iā te outou. O le mea tonu lenei e faamaonia ai lo latou faaumatiaga,+ ae o le faaolataga mo outou;+ ma o le faailoga lenei mai i le Atua. 29 Auā ua tuuina atu iā te outou le faaeaga ona o Keriso, e lē gata ina ia outou faatuatua ai iā te ia, ae ia puapuagatia foʻi ona o ia.+ 30 Auā o loo outou tauivi ma mea na outou vāai na ou tauivi ai foʻi,+ lea ua outou faalogo o loo oʻu fesagaʻia pea.