Levitiko

14 Ua toe fetalai mai Ieova iā Mose e faapea: 2 “O le tulafono lenei i le tagata lepela i le aso e faailoa atu ai ua mamā o ia, pe a avatu o ia i le ositaulaga.+ 3 E alu atu le ositaulaga i tua o le togālauapi ma vaai o ia. Afai ua teʻa le maʻi lepela mai i le tagata na maua i le lepela, 4 ona faatonuina lea o ia e le ositaulaga ia aumai ni manulele ola se lua e mamā, o se lālā arasi, o mea ua vali mūmū sesega, ma le isopo mo lona faamamāina.+ 5 Ona poloaʻi atu lea o le ositaulaga ia fasia se manulele i luga o le tanoa omea ua iai vai mai i le vaipuna. 6 Ae e na te ave le manulele o loo ola faatasi ma le lālā arasi, o le mea ua vali mūmū sesega, ma le isopo, ma lolō ia mea i le toto o le manulele lea na fasia i luga o le vai mai i le vaipuna. 7 E ao ona ia sausau ai faafitu i luga o lē o loo faamamāina mai i le lepela, ma faailoa atu ua mamā o ia, ma e na te tuu atu le manulele o loo ola i le fanua.+

8 “E ao i lē o loo faamamāina ona tatā ona ofu, ia tafi ona fulufulu uma ma tāʻele i le vai, ona mamā ai lea. Mulimuli ane, ona sau ai lea o ia i le togālauapi, ae e ao ona nofo o ia i fafo o lona faleʻie mo aso e fitu. 9 I le aso lona fitu, e ao ona tafi ona lauulu uma i lona ulu, ma lana ʻava, ma ona fulufulu mata. Pe a uma ona ia tafi ona fulufulu uma, ona tatā lea o ona ofu, ma tāʻele i le vai, ona mamā ai lea o ia.

10 “I le aso lona valu, e na te ave ai ni tamaʻi mamoe poʻa se lua e matuā lelei lava, o se tamaʻi mamoe fafine e matuā lelei lava+ e faatoʻā atoa le tausaga, o le tolu vaesefulu o le efa* o le falaoamata lelei ua iai sina suāuu, e fai ma taulaga i meaʻai,+ ma le fua e tasi le loka* o le suāuu;+ 11 ma e ao i le ositaulaga o lē na te faailoa atu ua mamā le tagata, ona avatu lē o loo faamamāina faatasi ma taulaga i luma o Ieova, i le faitotoʻa o le faleʻie o le feiloaʻiga. 12 E ave e le ositaulaga le tamaʻi mamoe poʻa e tasi, ma avatu e fai ai le taulaga o le nofosala,+ faatasi ma le fua e tasi le loka o le suāuu, ma lūlū i le isi itu ma le isi itu, e fai ma taulaga lūlū i luma o Ieova.+ 13 Ona ia fasi lea o le tamaʻi mamoe poʻa i le nofoaga e masani ona fasi ai manu+ mo le taulaga o agasala ma le taulaga mū i se nofoaga paia, auā e pei ona fai mo le ositaulaga le taulaga o agasala, e faapena foʻi le taulaga o le nofosala.+ O le mea lea e sili ona paia.+

14 “Ona ave lea e le ositaulaga sina toto o le taulaga o le nofosala, ma e tuu e le ositaulaga i le lautaliga o le taliga taumatau o lē o loo faamamāina, i luga foʻi o le limamatua o lona lima taumatau, ma le vaematua o lona vae taumatau. 15 E ao i le ositaulaga ona ave sina vaega o le fua o le loka o le suāuu,+ ma sasaa i luga o le alofilima o lona lava lima tauagavale. 16 Ona fufui lea e le ositaulaga le tamatamaʻilima o lona lima taumatau i le suāuu ua i le alofilima o lona lima tauagavale, ma sausau faafitu i lona tamatamaʻilima sina vaega o le suāuu i luma o Ieova. 17 A o le suāuu ua totoe i le alofilima o le ositaulaga, e na te tuuina sina vaega i le lautaliga o le taliga taumatau o lē o loo faamamāina, i luga o le limamatua o lona lima taumatau, i luga o le vaematua o lona vae taumatau, ma i luga o le toto o le taulaga o le nofosala. 18 A o le suāuu ua totoe i le alofilima o le ositaulaga, e na te tuuina i luga o le ulu o lē o loo faamamāina, ma e faia e le ositaulaga le togisala mo ia i luma o Ieova.+

19 “E osi e le ositaulaga le taulaga o agasala+ ma fai le togisala mo lē o loo faamamāina mai i lona tulaga lē mamā, ae mulimuli ane e na te fasi le manu e fai ai le taulaga mū. 20 E ao i le ositaulaga ona fai le taulaga mū ma le taulaga i meaʻai+ i luga o le fata faitaulaga, ma e faia e le ositaulaga le togisala mo ia,+ ona mamā ai lea o ia.+

21 “Ae afai e mativa o ia ma lē gafatia ia mea, e ao ona ia ave se tamaʻi mamoe poʻa e fai ma taulaga o le nofosala, ina ia lūlūina e fai ai le togisala mo ia, atoa ma le tasi vaesefulu o le efa* o le falaoamata lelei ua iai sina suāuu e fai ma taulaga i meaʻai, o le fua o le loka o le suāuu, 22 ma manutagi e lua po o tamaʻi lupe e lua e tusa ma mea e gafatia e ia. O le tasi e fai ai le taulaga o agasala, a o le isi e fai ai le taulaga mū.+ 23 I le aso lona valu,+ e na te aumaia ai ia mea i le ositaulaga i le faitotoʻa o le faleʻie o le feiloaʻiga i luma o Ieova, ina ia faailoa atu ai ua mamā o ia.+

24 “E ave e le ositaulaga le tamaʻi mamoe poʻa o le taulaga o le nofosala+ ma le fua o le loka o le suāuu, ma e na te lūlū ia mea i le isi itu ma le isi itu e fai ma taulaga lūlū i luma o Ieova.+ 25 Ona ia fasia lea o le tamaʻi mamoe poʻa o le taulaga o le nofosala, ona ave lea e le ositaulaga sina toto o le taulaga o le nofosala, ma tuu i le lautaliga o le taliga taumatau o lē o loo faamamāina, i luga foʻi o le limamatua o lona lima taumatau, ma le vaematua o lona vae taumatau.+ 26 E liligi foʻi e le ositaulaga sina suāuu i le alofilima o lona lava lima tauagavale,+ 27 ona ia sausau lea faafitu i luma o Ieova i le tamatamaʻilima o lona lima taumatau o sina vaega o le suāuu ua i le alofilima o lona lima tauagavale. 28 E tuu e le ositaulaga sina vaega o le suāuu ua i lona alofilima i luga o le lautaliga o le taliga taumatau o lē o loo faamamāina, i luga o le limamatua o lona lima taumatau, i luga o le vaematua o lona vae taumatau, o mea lava ia sa ia tuu ai le toto o le taulaga o le nofosala. 29 A o le suāuu ua totoe i le alofilima o le ositaulaga, e na te tuuina i luga o le ulu o lē o loo faamamāina, ina ia faia ai le togisala mo ia i luma o Ieova.

30 “E fai taulaga le ositaulaga i manutagi e lua po o tamaʻi lupe e lua e tusa ma mea ua ia gafatia,+ 31 o le tasi o ia mea ua ia gafatia e fai ai le taulaga o agasala, a o le isi e fai ai le taulaga mū+ faatasi ma le taulaga i meaʻai; ma e faia e le ositaulaga le togisala mo lē o loo faamamāina i luma o Ieova.+

32 “O le tulafono lenei mo lē na maua i le maʻi o le lepela, ae na te lē gafatia mea e tatau mo le faailoaina atu ua mamā o ia.”

33 Ona fetalai mai lea o Ieova iā Mose ma Arona: 34 “Afai tou te ō atu i le atunuu o Kanana,+ lea ou te avatu iā te outou e fai mo o outou laufanua,+ ma ou tuuina le faama‘i o le lepela i se fale i lou atunuu,+ 35 e ao i lē e ona le fale ona alu atu i le ositaulaga ma taʻu atu e faapea, ‘Ua iai se pisia i le puipui o loʻu fale, e foliga mai o le mea leaga lea o le lepela.’ 36 E avatu e le ositaulaga faatonuga e laʻu ese mea mai i le fale a o leʻi alu atu o ia e vaai i le mea leaga, ina neʻi taʻu lē mamā uma ai mea ua i le fale; a mavae lea ona sau lea o le ositaulaga e vaai i le fale. 37 E vaai o ia i le vaega na aafia, ma afai o loo iai i puipui o le fale le mea leaga, o omoomo ia e samasama lanu meamata pe mūmū, ma iloa atu ua ati ia mea i le puipui, 38 ona ulufafo lea o le ositaulaga i le faitoto‘a o le fale ma pupuni le fale i aso e fitu.+

39 “Ona toe fo‘i lea o le ositaulaga i le aso lona fitu ma vaai i ai. Afai ua sosolo le mea leaga i puipui o le fale, 40 ona avatu lea e le ositaulaga o faatonuga, ma e ao ona aveese maa ia ua iai le mea leaga, ma ia tiaʻi i se nofoaga lē mamā i tua o le aai. 41 E na te faatonuina le sasali ese uma o le omea i puipui i totonu o le fale, ma e ao ona tiaʻi le omea na faapipii ai maa ua aveesea, i se nofoaga lē mamā i tua o le aai. 42 E ao ona latou ave isi maa ma toe tuu i tulaga o maa ua aveese, ma e na te ave foʻi isi paluga o omea ma faasimā ai le fale.

43 “Afai e toe tupu le mea leaga i le fale ina ua uma ona aveese maa, ma ua uma foʻi ona sasali ese totonu o le fale ma toe faasimā, 44 ona alu atu lea i totonu o le ositaulaga ma vaai i ai. Afai ua sosolo le mea leaga i le fale, o le lepela aati+ lea i le fale. Ua lē mamā le fale. 45 E ao ona ia tala i lalo le fale, o ona maa, o laupapa, o omea uma, ma avatu i se nofoaga lē mamā i tua o le aai.+ 46 A o se tasi e alu atu i le fale i aso ua pupuni ai,+ e lē mamā o ia seʻia oo i le afiafipō;+ 47 o se tasi foʻi e taoto i le fale e ao ona tatā ona ofu, ma o so o se tasi e ʻai i le fale e ao ona tatā ona ofu.

48 “Ae afai e alu atu le ositaulaga ma vaai i ai, e lē o sosolo le mea leaga i le fale ina ua uma ona toe faasimā, ona faailoa atu lea e le ositaulaga ua mamā le fale, auā ua teʻa le mea leaga. 49 Ina ia faamamā le fale mai i mea e lē mamā,* e na te avatu ni manulele se lua, se lālā arasi, o mea ua vali mūmū sesega, ma le isopo.+ 50 E na te fasia le isi manulele i luga o le tanoa omea ua iai vai mai i le vaipuna. 51 Ona ia ave lea o le lālā arasi, o le isopo, o le mea ua vali mūmū sesega, ma le manulele o loo ola, ma lolō ia mea i le toto o le manulele na fasia, ma i le vai mai i le vaipuna, ma e ao ona ia sausau ai faafitu agaʻi i le fale.+ 52 E na te faamamā le fale mai i mea e lē mamā* i le toto o le manulele, le vai mai i le vaipuna, le manulele o loo ola, le lālā arasi, le isopo, ma le mea ua vali mūmū sesega. 53 Ona ia tuu atu lea o le manulele o loo ola i fafo o le aai i le fanua, ma e na te faia le togisala mo le fale, ona mamā ai lea.

54 “O le tulafono lenei e tusa ai ma maʻi lepela uma, o le ma‘i o lauulu po o le ‘ava,+ 55 o le lepela o i le ofu+ po o le fale,+ 56 e tusa ai foʻi ma fulafula, o paʻupaʻu, ma ila,+ 57 ina ia iloa ai pe e lē mamā pe e mamā se mea.+ O le tulafono lea e faatatau i le maʻi o le lepela.”+