Esoto

12 Ua fetalai mai Ieova iā Mose ma Arona i le atunuu o Aikupito: 2 “E avea lenei masina ma uluaʻi masina iā te outou. O le masina muamua lava lea o le tausaga iā te outou.+ 3 Ia fai atu i le faapotopotoga uma o Isaraelu, ‘I le aso lona sefulu o lenei masina, ia taʻitasi aiga mai i le ʻauaiga* ona aumai se tamaʻi mamoe,+ o le aiga ma le tamaʻi mamoe. 4 Ae afai e toʻaitiiti le aiga e lē uma sa latou tamaʻi mamoe, ona latou faasoa atu lea i lo latou tuaoi e lata ane ua sau i lo latou fale e tusa ma le faitau aofaʻi o tagata. Ia vaevae le tamaʻi mamoe e tusa ma le aofaʻiga o tagata e aai ai. 5 E tatau ona matuā lelei+ la outou mamoe poʻa, e tasi le tausaga le matua. Ia outou filifilia mai se tamaʻi mamoe poʻa po o se tamaʻi ʻoti. 6 Ia tausi pea seʻia oo i le aso lona 14 o lenei masina,+ ona fasia lea o ia manu e le faapotopotoga atoa o Isaraelu i le afiafipō.*+ 7 Ia latou ave le toto ma sausau i pou e lua o le faitotoʻa, ma pou faalava i luga o le mea e ulufale atu ai i fale e latou te aai ai i le manu.+

8 “‘E ao ona latou aai i le aano o manu i lea pō.+ E tatau foʻi ona tunu i le afi, ma ‘ai faatasi ma falaoa e lē faafefeteina+ ma fualaau ʻaina oona.+ 9 Aua neʻi ʻaina mata, faapuna, pe saka i le vai, ae ia tunu i le afi, o lona ulu, o ona vae* atoa ma ona totoga. 10 E lē tatau ona outou faatotoe se mea seʻia oo i le taeao, ae afai o le a iai se mea e totoe i le taeao, ia outou susunu i le afi.+ 11 Ia faapea ona outou aai ai, ia fusia o outou puimanava, ia see o outou seevae, ia uu o outou tootoo i o outou lima; ma ia faavave ona outou aai. O le Paseka lea iā Ieova. 12 Ou te ui ane i le atunuu o Aikupito i lenā pō ma taia ulumatua uma o le atunuu o Aikupito, e mai i tagata e oo lava i manu;+ ma ou te faaoo atu faasalaga i atua uma o Aikupito.+ O aʻu o Ieova. 13 E fai le toto ma faailoga iā te outou i fale o loo outou iai; ou te vaai i le toto ma sopoloa iā te outou, ma lē oo ai iā te outou le mala e fano ai pe a ou taia le atunuu o Aikupito.+

14 “‘Ia fai lea aso ma faamanatuga iā te outou, ia outou faamanatu o se tausamiga iā Ieova i o outou tupulaga o loo mulimuli mai. E ao ona outou faamanatuina, auā o se tulafono tumau. 15 E fitu aso tou te aai ai i falaoa e lē faafefeteina.+ O le aso muamua tou te aveese ai le paluga ua fefete mai i o outou fale, auā o le a fasiotia so o se tasi i Isaraelu e ʻai i se mea ua faafefete, e mai i le aso muamua seʻia oo i le aso lona fitu. 16 I le aso muamua e tou te faia ai se tauaofiaga paia, ia faia foʻi i le aso lona fitu se isi tauaofiaga paia. E lē faia ai ni galuega i ia aso.+ E pau le mea e tou te faia, o le saunia o meaʻai ina ia lava mo tagata taʻitoʻatasi.

17 “‘Ia outou tausia le Tausamiga o Falaoa e Lē Faafefeteina,+ auā o lea aso ou te aumai ai o outou tagata e to‘atele* mai i le atunuu o Aikupito. Ia outou tausia lenei aso e fai ma tulafono tumau, i o outou tupulaga o loo mulimuli mai. 18 O le masina muamua, i le afiafipō o le aso 14 o le masina, e tou te aai ai i le falaoa e lē faafefeteina seʻia oo i le afiafipō+ o le aso lona 21 o lea masina. 19 O aso e fitu, aua neʻi maua i o outou fale se paluga ua fefete, auā o so o se tasi e tofo i se mea faafefete, e tusa lava po o ia o se tagata ese po o se tagatānuu,+ e ao ona fasiotia ma aveese mai i le faapotopotoga o Isaraelu.+ 20 Aua ne‘i outou aai i so o se mea ua faafefeteina. E na o falaoa e lē faafefeteina e tou te aai ai i mea uma tou te nonofo ai.’”

21 Ona aami loa lea e Mose o toeaina uma o Isaraelu+ ma faapea atu: “Ia outou ō ma filifili tamaʻi manu* mo o outou aiga, ona outou fasia ai lea o ia manu mo le Paseka. 22 Ia outou fufui se fusi lālā isopo i le toto ua i le tanoa ma sausau ai pou faalava i luga o le mea e ulufale atu ai, ma pou e lua o le faitotoʻa; ia aua neʻi ulufafo se isi mai i le faitotoʻa o lona fale seʻia oo i le taeao. 23 Pe a afio ane Ieova e faaoo le malaia i tagata Aikupito ma silafia le toto i luga o pou faalava o le mea e ulufale atu ai, ma pou e lua o le faitotoʻa, ona sopoloa lea o Ieova i lea faitotoʻa ma e na te lē tuu atu ia oo le mala e oti ai i o outou fale.+

24 “Ia outou tausia lenei tausamiga e fai ma poloa‘iga tumau mo oe ma ou atalii.+ 25 Pe a outou oo i le laueleele o le a foaʻiina mai e Ieova iā te outou, e pei ona ia fetalai mai ai, ia outou tausia lenei faamanatuga.+ 26 Pe a fesili mai o outou atalii iā te outou, ‘O le ā le uiga o lenei faamanatuga iā te outou?’+ 27 ona outou tali atu lea, ‘O le taulaga o le Paseka iā Ieova, o lē na sopoloa i fale o le fanauga a Isaraelu i Aikupito ina ua ia faaoo le malaia i tagata Aikupito, ae faasaoina o tatou aiga.’”

Ona punonou lea o le nuu ma faapaʻuʻū faō. 28 Ona ō lea o le fanauga a Isaraelu ma fai e pei ona poloaʻi mai ai Ieova iā Mose ma Arona.+ Ua faapea lava ona latou faia.

29 Ua oo i le vaeluapō, ona taia lea e Ieova o ulumatua uma o le atunuu o Aikupito,+ e mai i le ulumatua a Farao o lē o loo nofo i le nofoālii, e oo i le ulumatua a le pagota ua i le falepuipui, atoa ma ulumatua uma a manu.+ 30 Ona tulaʻi lea o Farao i le pō, o ia ma ana auauna uma ma isi tagata uma o Aikupito; ua iai le tagiauē tele i tagata Aikupito, auā e leai se fale e aunoa ma se tasi ua oti.+ 31 Ona ia aami loa lea o Mose ma Arona+ i le pō ma faapea atu: “Ia tulaʻi, ma ō ese mai i oʻu tagata, o oulua ma isi o le fanauga a Isaraelu. Ia ō e auauna iā Ieova, e pei ona oulua fai mai ai.+ 32 Ia ō ma ave a outou lafu mamoe ma lafumanu e pei ona oulua fai mai ai.+ Ae ia oulua faamanuia mai foʻi iā te aʻu.”

33 Ua tauanau e tagata Aikupito le nuu ia ō ese vave+ mai i le atunuu, “auā,” ua latou faapea ane, “ua pei i tatou o ni tagata ua feoti!”+ 34 Ona ave lea e le nuu o a latou paluga a o leʻi faafefeteina, ua afīfī foʻi a latou tanoa e palu ai falaoa i o latou ofu, ma amo i o latou tauʻau. 35 Ua faia e le fanauga a Isaraelu e pei o upu a Mose, ua latou talosaga atu i tagata Aikupito mo mea siliva, o mea auro ma ofu.+ 36 Ua faapogaia e Ieova tagata Aikupito ina ia fiafia i le nuu, ona latou aumaia lea o mea ua latou talosaga atu ai, ma ua latou faamativaina ai tagata Aikupito.+

37 Ona malaga loa lea o le fanauga a Isaraelu mai i Ramese+ e agaʻi i Sukota,+ e tusa ma le to‘a 600,000 tane matutua ua savavali, ae e lē faitaulia ai tamaiti.+ 38 Ua latou ō faatasi foʻi ma le toʻatele o isi tagata,*+ atoa ma lafu mamoe, o lafumanu, ma le anoanoaʻi o manu eseese. 39 Ua latou tao paluga falaoamata na latou aumaia mai i Aikupito i ni falaoa lapotopoto e lē faafefeteina. E leʻi faafefeteina auā na faafuase‘i ona tuliesea i latou mai i Aikupito, ua lē lava ai se taimi e aoao mai ai nisi mea‘ai mo i latou.+

40 O le taimi na nonofo ai le fanauga a Isaraelu i Aikupito,+ e 430 tausaga.+ 41 Ua oo i le faaiʻuga o le 430 tausaga, o lea lava aso na ō ese mai ai tagata uma o Ieova* mai i le atunuu o Aikupito. 42 O se pō e latou te faamanatu ai le aumaia e Ieova o i latou mai i le atunuu o Aikupito. O lenei pō e faamanatu mo Ieova e tagata uma o Isaraelu ma o latou tupulaga o loo mulimuli mai.+

43 Ua toe fetalai mai Ieova iā Mose ma Arona: “O le tulafono lenei o le Paseka: E sā ona ʻai ai se tagata ese.+ 44 Ae afai o iai se tane pologa na faatauina mai, ia e peritomeina o ia.+ Ona faatoʻā mafai lea ona ʻai i le Paseka. 45 E lē aai ai o lē e aumau ma lē e galue totogi. 46 E tofu le fale ma le tamaʻi mamoe e aai ai. Aua neʻi aveina i fafo mai i le fale le aano o le tamaʻi mamoe, ma aua tou te gauia se ponaivi.+ 47 E ao ona faamanatuina e le faapotopotoga atoa o Isaraelu lea mea. 48 Pe afai o aumau se tagata ese iā te oe, ae e manaʻo e faamanatu le Paseka iā Ieova, ia peritomeina tane uma ua iā te ia, ona mafai lea ona ia faalatalata ane ma faamanatu le Paseka, ma avea ai o ia e pei o se tagatānuu. E sā ona ʻai ai se tagata e leʻi peritomeina.+ 49 E tasi le tulafono mo tagatānuu ma tagata ese ua aumau iā te outou.”+

50 Ua faia lava e le fanauga uma a Isaraelu e pei ona poloaʻi mai ai Ieova iā Mose ma Arona. Ua faapea lava ona latou faia. 51 O lea lava aso, na aveese ai e Ieova le fanauga a Isaraelu faatasi ma o latou tagata e to‘atele* mai i le atunuu o Aikupito.