Esekielu

3 Ua ia fetalai mai iā te aʻu: “Le atalii e o le tagata, inā ʻai ia i le mea ua i ou luma.* Ia ʻai lenei tusi tāʻai, ma e alu atu ma tautala atu i le aiga o Isaraelu.”+

2 Ona faamaga lea o loʻu gutu, ma ua ia fafaga aʻu i le tusi tāʻai. 3 Ua ia toe fetalai mai iā te aʻu: “Le atalii e o le tagata, inā ʻai ia lenei tusi tāʻai ua ou avatu iā te oe, ma ia tumu ai lou laualo.” Ona ou ʻai ai lea ma ua suamalie i loʻu gutu e pei o le meli.+

4 Ua ia fetalai mai iā te aʻu: “Le atalii e o le tagata, ia e alu atu i le aiga o Isaraelu, ma taʻu atu aʻu upu iā i latou. 5 Auā e lē o auina atu oe i se nuu e tautatala i se gagana e faigatā ona malamalama i ai, pe e faigatā foʻi le auala e tautatala ai, ae i le aiga o Isaraelu. 6 E lē o auina atu oe i nuu e tele, e tautatala i se gagana e faigatā ona malamalama i ai, pe e faigatā foʻi le auala e tautatala ai, ma o a latou upu e lē faigofie ona e malamalama ai. Ana ou auina atu oe iā i latou na, semanū latou te faalogo iā te oe.+ 7 A o le aiga o Isaraelu, e latou te mumusu e faalogo iā te oe, auā latou te lē fia faalogo mai foʻi iā te aʻu.+ O le aiga uma o Isaraelu ua ulu malō ma lotomaaa.+ 8 Faauta! ua ou faia ou foliga ia malō e pei o o latou foliga, ma lou muāulu ia malō e pei o o latou muāulu.+ 9 Ua ou faia lou muāulu e pei o se taimane, ia sili ona malō nai lo o se maa malō.+ Aua lava e te fefe iā i latou pe mataʻu i o latou foliga,+ auā o i latou o le aiga fouvale.”

10 Ua ia toe fetalai mai iā te aʻu: “Le atalii e o le tagata, ia faalogo i upu uma ua ou fai atu ai iā te oe, ma ia talia i lou loto. 11 Ia e alu atu i tagata o lou nuu*+ na ave faapagota ma tautala atu iā i latou. Ia e faapea atu iā i latou, ‘O le fetalaiga lenei a le Alii Pule Silisili Ese o Ieova,’ e tusa lava pe e latou te faalogo mai pe e mumusu e faalogo.”+

12 Ona sii lea o aʻu e le agaga*+ ma ua ou faalogoina i oʻu tua le leo o se taalili tele o faapea mai: “Ia viia le mamalu o Ieova mai i lona afioaga.” 13 Ua iai foʻi ma le taalili o apaʻau o foafoaga agaga a o fepaʻiaʻi apaʻau,+ ma le paʻō o uili i o latou autafa,+ ma le leo o le taalili tele. 14 Ua sii aʻu e le agaga* ma aveina aʻu, ma ua ou alu ma le tigā ma le ita o loʻu loto, ae na ou lagona le galue malosi o le mana o Ieova iā te aʻu. 15 Ona ou alu atu lea i tagata ua ave faapagota i Tele-apipa, o ē o loo nonofo i autafa o le vaitafe o Kepara,+ ma ou nofo ai i le mea o loo latou nonofo ai; ona ou nofo ai lea i inā iā i latou ma le matuā faateʻia,+ mo aso e fitu.

16 I le faaiʻuga o aso e fitu, ona oo mai lea iā te aʻu o le afioga a Ieova:

17 “Le atalii e o le tagata, ua ou tofia oe e fai ma tagata vāai i le aiga o Isaraelu;+ ma pe a e faalogo i se upu mai i loʻu gutu, e tatau ona e avatu se lapataʻiga iā i latou mai iā te aʻu.+ 18 Pe a ou fai atu i lē e amioleaga, ‘O le a e oti lava,’ ae e te lē lapataʻia o ia ma tautala atu i ai ina ia lapataʻia ai lē e amioleaga ia liliuese mai i lona ala leaga, ina ia faasaoina ai o ia,+ e oti lenā tagata amioleaga ona o lana mea sesē,+ a o lona toto ou te taui atu lea iā te oe.*+ 19 Ae pe afai e te lapataʻia lē e amioleaga ae e lē liliuese o ia mai i lana amioleaga ma lona ala leaga, e oti o ia ona o lana mea sesē, a o oe, ua e faasaoina lou lava ola.+ 20 Ae pe a lafoaʻia e le tagata amiotonu lana amiotonu ae fai le mea sesē,* ona ou tuuina lea i ona luma o se mea e tautevateva ai o ia ma oti ai.+ Pe afai e te leʻi lapataʻia o ia, o le a oti o ia ona o lana agasala, ma e lē manatuaina foʻi ana galuega amiotonu, a o lona toto ou te taui atu lea iā te oe.*+ 21 Ae afai e te lapataʻia lē e amiotonu ina ia aua neʻi agasala, ma ua lē agasala ai o ia, o le a ola pea lava o ia auā na lapataʻia o ia,+ a o oe, ua e faasaoina lou lava ola.”

22 Ua oo mai le aao o Ieova i oʻu luga i lea mea, ma ua ia fetalai mai iā te aʻu: “Inā tulaʻi ia ma e alu i le fanua laugatasi,* ma o i inā ou te tautala atu ai iā te oe.” 23 Ona ou tū lea ma alu atu i le fanua laugatasi, faauta! ua iai i inā le mamalu o Ieova,+ e pei o le mamalu lea na ou vaaia i tala ane o le vaitafe o Kepara,+ ona ou faapaʻū faō ai lea. 24 Ua faatumuina aʻu i le agaga, ona faatūina ai lea o aʻu i luga i oʻu vae,+ ma ua fetalai mai le Atua iā te aʻu e faapea:

“Alu ia, inā nofo i totonu o lou fale. 25 A o oe, le atalii e o le tagata, o le a latou saisaia oe i maea ma nonoa oe, ina ia lē mafai ai ona e alu atu iā i latou. 26 Ou te faapipii aʻe foʻi lou laulaufaiva i lou gutu, ma o le a e gūgū lava, ma e lē mafai ona e aʻoaʻia i latou, auā o i latou o le aiga fouvale. 27 Ae pe a ou tautala atu iā te oe, ou te tatala lou gutu, ma e ao ona e fai atu iā i latou,+ ‘O le fetalaiga lenei a le Alii Pule Silisili Ese o Ieova.’ O lē e faalogo, inā faalogo mai ia,+ a o lē e musu e faalogo, ia musu ai pea, auā o i latou o le aiga fouvale.+