O le Tusi Muamua o Nofoaiga a Tupu

23 Ua toeaina lava Tavita ma ua faafualoa ona aso,* ona ia faia lea o Solomona lona atalii ma tupu iā Isaraelu.+ 2 Ua ia faapotopoto foʻi perenise uma o Isaraelu, o ositaulaga,+ ma le ʻau sa Levī.+ 3 Ona faitauina lea o sa Levī mai i ē e taʻi 30 tausaga ma matutua atu,+ ma o lo latou faitau aofaʻi e 38,000. 4 E mai iā i latou nei, e toʻa 24,000 sa auauna o ni pule i le galuega o le fale o Ieova, e toʻa 6,000 sa avea ma leoleo ma faamasino,+ 5 e toʻa 4,000 leoleo faitotoʻa,+ ma e toʻa 4,000 ē e vivii atu+ iā Ieova i meafaifaaili, ia na faapea mai ai Tavita, “Na ou faia ia mea ina ia avatu ai viiga.”

6 Ona faamaopoopoina* lea o i latou e Tavita i vaega+ e tusa ai o atalii o Levi: o Keresona, o Koato, ma Merari.+ 7 E mai i tagata Keresona, o Latana, ma Semi. 8 O atalii o Latana o Ikielu le alii sili, o Setama, ma Ioelu,+ e toʻatolu i latou. 9 O atalii o Semi o Selome, o Asielu, ma Karana, e toʻatolu i latou. O alii sili ia o aiga o tamā o Latana. 10 O atalii o Semi o Iata, o Sina,* o Iuso, ma Peria. O atalii nei e toʻafā o Semi. 11 O Iata o le alii sili, a o Sisee e lona lua atu i ai. Talu ai e le‘i toʻatele ni atalii o Iuso ma Peria, o le mea lea ua faitauina ai i la‘ua e tasi lo la aiga o tamā, ma tuuina i ai le tofiga e tasi.

12 O atalii o Koato o Amaramo, o Isara,+ o Heperona, ma Usialu,+ e toʻafā i latou. 13 O atalii o Amaramo o Arona+ ma Mose.+ Ae na vavaeesea+ Arona ina ia faapaia le Mea e Sili Ona Paia, ma faamūina e ia ma ona atalii taulaga i luma o Ieova, auauna atu iā te ia, ma vivii atu i lona suafa i aso uma lava.+ 14 A o Mose le tagata o le Atua moni, sa faitauina faatasi ona atalii ma le ituaiga o Levi. 15 O atalii o Mose, o Keresoma+ ma Elisara.+ 16 E mai i atalii o Keresoma, o Sepuelu+ le alii sili. 17 E mai i le fanauga a* Elisara, o Reapea+ le alii sili; e leʻi iai nisi atalii o Elisara, ae na matuā toʻatele lava atalii o Reapea. 18 E mai i atalii o Isara,+ o Selomita+ le alii sili. 19 O atalii o Heperona o Ieria le alii sili, o lona lua o Amaria, o lona tolu o Iaaseelu, ma lona fā o Ikamamo.+ 20 O atalii o Usialu+ o Mika le alii sili, ma Isea le lona lua.

21 O atalii o Merari, o Maali ma Muse.+ O atalii o Maali, o Eleasaro ma Kiso. 22 Ua oti Eleasaro, ae e leʻi iai ni ona atalii, ua na o afafine. Ona ave lea o i latou e atalii o Kiso le uso o lo latou tamā, e fai ma a latou avā. 23 O atalii o Muse, o Maali, o Eteru, ma Ierimota, e toʻatolu i latou.

24 O atalii nei o Levi na lesitalaina e tusa ai ma o latou aiga ma alii sili o aiga o o latou tamā. Na faitauina ma lisiina igoa o tagata sa Levī e ta‘i 20 tausaga ma matutua atu, mo le auaunaga i le fale o Ieova. 25 Auā na faapea atu Tavita: “Ua foaʻi mai e Ieova le Atua o Isaraelu le mapusaga i lona nuu,+ ma e nofo o ia i Ierusalema e faavavau.+ 26 E lē mana‘omia foʻi ona aveina e le ʻau sa Levī le faleʻie paia po o so o se mea e faaaogā i le tapuaʻiga.”+ 27 E tusa ai ma poloaʻiga faaiʻu a Tavita, na faitauina ai le aofaʻi o atalii o Levi e mai i ē ua taʻi 20 tausaga ma matutua atu. 28 Auā o lo latou tofiga, o le fesoasoani i atalii o Arona+ i le auaunaga i le fale o Ieova, ma vaavaaia le lotoā,+ o potu ʻai, le faamamāina o mea paia uma, ma so o se galuega e manaʻomia i le auaunaga i le fale o le Atua moni. 29 Na latou fesoasoani fo‘i i le saunia o falaoa ua faaputuina,*+ o le falaoamata lelei e faia ai taulaga i meaʻai, o falaoa manifinifi e lē faafefeteina,+ o falaoa e faia i luga o uʻamea mafolafola, o le falaoamata ua palu ma le suāuu,+ ma galuega uma o le fuaina o le tele ma le lapopo‘a o nei mea. 30 E tutū foʻi i lea taeao ma lea taeao+ e faafetai ma vivii atu iā Ieova, ma e faapena foʻi i afiafi.+ 31 Na latou fesoasoani fo‘i i so o se taimi e ofoina atu ai taulaga mū iā Ieova i Sapati,+ i masina faatoʻā vaaia,+ ma tausamiga,+ e tusa ai ma lo latou faitau aofaʻi e pei ona faatulagaina i le tulafono, ma e latou te faia faapea e lē aunoa i luma o Ieova. 32 Na latou faataunuuina fo‘i o latou tiute tauave e faia i le faleʻie o le feiloaʻiga ma i le mea paia. Na latou fesoasoani fo‘i i o latou uso, o atalii ia o Arona, i le fale o Ieova.