Esekielu

34 Ua toe oo mai le afioga a Ieova iā te aʻu e faapea: 2 “Le atalii e o le tagata, ia e faia valoaga e faasagatau atu i leoleo mamoe o Isaraelu. Ia faia valoaga, ma fai atu i leoleo mamoe, ‘O le fetalaiga lenei a le Alii Pule Silisili Ese o Ieova: “Oi talofa i leoleo mamoe o Isaraelu,+ o ē ua fafagaina i latou lava! Pe e lē o le lafu ea, e ao ona fafaga e leoleo mamoe?+ 3 Ua outou ʻai le gaʻo, ma ua outou faaofu iā te outou lava i fulufulu o mamoe ma outou fasia le manu e sili ona peti,+ ae ua outou lē fafagaina le lafu.+ 4 Ua outou lē faamalosia lē ua vaivai, pe faamālōlō i lē ua maʻi, pe fusifusia lē ua manuʻa, pe toe aumaia lē ua sē, pe saʻilia foʻi lē ua leiloa,+ ae ua outou pule iā i latou ma le pulepuletutū ma le sauā.+ 5 Na oo ina faataapeapeina i latou ona ua leai so latou leoleo mamoe;+ na faataapeapeina i latou ma na fai ma meaʻai a manufeʻai uma o le fanua. 6 Na fesēaʻi aʻu mamoe i mauga uma ma i luga o aʻega maualuluga uma; na faataapeapeina aʻu mamoe i le fogāeleele uma, ae e leai se tasi na saʻili i ai, pe suʻeina ina ia maua i latou.

7 “ʻ“O lea, o outou leoleo mamoe inā faalogo mai ia i le afioga a Ieova: 8 ʻ“Ou te tautō iā te aʻu lava,” o le fetalaiga lenei a le Alii Pule Silisili Ese o Ieova le Atua soifua, “talu ai ua fai aʻu mamoe ma manu ua saeia e fai ma meaʻai mo manufeʻai uma o le fanua, auā ua leai se leoleo mamoe, ma e leʻi suʻeina e aʻu leoleo mamoe aʻu mamoe, ae ua fafaga pea e leoleo mamoe i latou lava, nai lo o le fafagaina o aʻu mamoe,”’ 9 o le mea lea, o outou leoleo mamoe, inā faalogo mai ia i le afioga a Ieova. 10 O le fetalaiga lenei a le Alii Pule Silisili Ese o Ieova: ‘Ou te faasagatau atu i leoleo mamoe, ma ou te toe taui atu iā i latou e tusa ma le auala na latou tausia ai aʻu mamoe,* ma ou te lē toe faatagaina i latou e fafaga* aʻu mamoe,+ e lē toe fafagaina foʻi e leoleo mamoe i latou lava. O le a ou laveaʻia aʻu mamoe mai i o latou gutu, ma e lē toe avea i latou ma meaʻai mo i latou.’”

11 “‘O le fetalaiga lenei a le Alii Pule Silisili Ese o Ieova: “O aʻu lenei, ma o aʻu lava, o le a ou saʻili i aʻu mamoe ma o le a ou tausia i latou.+ 12 O le a ou tausia aʻu mamoe, e pei o se leoleo mamoe ua maua ana mamoe na taapeape solo ma fafagaina i latou.+ O le a ou laveaʻiina i latou mai i mea uma na faataapeapeina i ai i le aso faamalumalu ma pogisa.+ 13 O le a ou aumaia i latou mai i nuu, ma aoaoina i latou mai i atunuu ma avatu i lo latou laueleele, ma fafaga i latou i mauga o Isaraelu,+ i autafa o ālia, ma autafa o mea e ʻaināina e le nuu. 14 O le a ou fafagaina i latou i laufanua lauolaola, ma e fai mauga maualuluga o Isaraelu ma fanua e aai ai.+ O le a latou taooto ai i inā i se laufanua lelei e aai ai,+ ma o le a latou aai i laufanua lauusiusi i luga o mauga o Isaraelu.”

15 “ʻ“O aʻu lava e fafagaina aʻu mamoe,+ ou te faataooto foʻi i latou i lalo,”+ ua fetalai mai ai le Alii Pule Silisili Ese o Ieova. 16 “O le a ou saʻilia lē ua leiloa,+ o le a ou toe aumaia lē ua sē, o le a ou fusifusia lē ua manuʻa, o le a ou faamalosia foʻi lē ua vaivai; a o lē ua peti ma malosi o le a ou faaumatiaina o ia. O le a ou fafaga iā te ia i le faamasinoga.”

17 “‘A o outou o aʻu mamoe, o le fetalaiga lenei a le Alii Pule Silisili Ese o Ieova: “O le a ou faia le faamasinoga mo lea mamoe ma lea mamoe, o mamoe poʻa ma ʻoti poʻa.+ 18 Po ua lē lava ea mo outou le aai i laufanua e sili ona lelei? Pe e ao ea ona outou solia foʻi i o outou vae, le vaega o totoe o o outou laufanua? Pe a uma ona outou feinu i vai e sili ona mamā, pe e ao ea ona outou faapalapalā le vai e ala i le tatū ai o o outou vae? 19 Pe e tatau ea ona aai aʻu mamoe i laufanua ua solia e o outou vae, ma feinu i vai ua faapalapalā i le tatū i ai o o outou vae?”

20 “‘O lea, o le fetalaiga lenei a le Alii Pule Silisili Ese o Ieova iā i latou: “O aʻu lenei, o aʻu lava o le a faamasinoina le mamoe peti ma le mamoe paee, 21 auā ua outou tūlei atu pea e faaaogā ai o outou itu ma tauʻau, ma faaaogā o outou seu e sua ai pea ē uma ua mamaʻi seʻia outou faataapeapeina solo i latou. 22 O le a ou faaolaina aʻu mamoe ma e lē toe faia i latou ma mea e saeia;+ ma o le a ou faamasino i lea mamoe ma lea mamoe. 23 O le a ou faatūina se leoleo mamoe e toʻatasi e vaavaaia i latou,+ ma e na te fafagaina i latou, o laʻu auauna lea o Tavita.+ O le a ia fafagaina i latou, ma avea ma o latou leoleo mamoe.+ 24 O aʻu o Ieova, o le a avea aʻu ma o latou Atua,+ ma e fai Tavita laʻu auauna ma taʻitaʻi iā i latou.+ O aʻu o Ieova, ua ou fai atu ai.

25 “ʻ“O le a ou osia foʻi se feagaiga o le filemu ma i latou,+ ma o le a ou aveesea manufeʻai o le laueleele,+ ina ia latou nonofo ai i le toafa ma le saogalemu ma momoe i le vaomatua.+ 26 O le a ou faia i latou faapea ma mea e siʻomia ai loʻu mauga ma faamanuiaga,+ o le a ou faatotō ifo foʻi timuga i le taimi talafeagai. O le a totō ifo faamanuiaga e pei o timuga.+ 27 O le a fua mai e laau o le fanua o latou fua, e fua mai foʻi e le laueleele ona fua,+ ma o le a latou nonofo ma le saogalemu i le laueleele. O le a latou iloa ai o aʻu lava o Ieova pe a ou gausia a latou amo,+ ma laveaʻiina i latou mai i lima o ē na faapologaina i latou. 28 O le a lē toe avea i latou ma mea e saeia e nuu, e lē toe faatamaʻia foʻi i latou e manufeʻai o le laueleele, ma o le a latou nonofo ma le saogalemu, e leai se isi e faamataʻu i ai.+

29 “ʻ“O le a ou faia mo i latou se faatoʻaga taʻutaʻua,* o le a lē toe feoti i latou ona o le oge i le laueleele,+ ma o le a lē toe faalumaina i latou e nuu.+ 30 ‘Ona latou iloa ai lea o aʻu lava o Ieova lo latou Atua, ua ou faatasi ma i latou, ma o i latou o loʻu nuu, o le aiga o Isaraelu,’+ ua fetalai mai le Alii Pule Silisili Ese o Ieova.”’

31 “‘A o outou, o aʻu mamoe,+ o mamoe o loo oʻu tausia, ua na o ni tagata outou, ae o aʻu o lo outou Atua,’ ua fetalai mai ai le Alii Pule Silisili Ese o Ieova.”