O le Tusi Lona Lua o Tupu

15 O le tausaga lona 27 o le nofoaiga a Ierepoamo* le tupu o Isaraelu, na fai ai ma tupu Asaraia*+ le atalii o Amasia+ le tupu o Iuta.+ 2 E 16 ona tausaga ina ua fai o ia ma tupu, ma e 52 tausaga na pule ai o ia mai i Ierusalema. O le igoa o lona tinā o Iekalia mai i Ierusalema. 3 Na faia pea e Asaraia mea ua tonu i le silafaga a Ieova, e pei lava ona faia e lona tamā o Amasia.+ 4 Peitaʻi, e leʻi aveesea mea maualuluga,+ ma na faia pea e le nuu taulaga ma faamū taulaga i luga o mea maualuluga.+ 5 Ua taia e Ieova le tupu i se mala, ma ua avea ai pea o ia ma lepela+ e oo lava i le aso na oti ai, ma sa nofo ese pea o ia i lona fale.+ A o Iotama+ le atalii o le tupu, na ia vaavaaia le aiga ma faamasinoina tagata o le nuu.+ 6 A o le olaga uma o Asaraia+ ma mea uma na ia faia, po ua lē o tusia ea i le tusi o le talafaasolopito o tupu o Iuta? 7 Ona taoto lea o Asaraia faatasi ma ona augātamā,+ ma ua latou tanu o ia faatasi ma ona augātamā i le Aai a Tavita; ona avea lea o Iotama lona atalii ma tupu e sui iā te ia.

8 O le tausaga lona 38 o le nofoaiga a Asaraia+ le tupu o Iuta, na avea ai Sakaria+ le atalii o Ierepoamo ma tupu i Isaraelu mai i Samaria, ma na pule o ia mo masina e ono. 9 Na ia faia pea mea leaga i le silafaga a Ieova, e pei ona faia e ona augātamā. E leʻi liliuese o ia mai i agasala a Ierepoamo le atalii o Nepata, lea na faapogaia ai Isaraelu e agasala.+ 10 Ona foua lea o ia e Saluma le atalii o Iapese, ma fasia o ia+ i Ipelamo.+ Ina ua uma ona fasiotia o ia e Saluma, ona avea ai lea o Saluma ma tupu e sui iā te ia. 11 A o le olaga uma o Sakaria, ua tusia ia i le tusi o le talafaasolopito o tupu o Isaraelu. 12 Ona faataunuuina ai lea o le afioga a Ieova na ia fetalai atu ai iā Ieʻu e faapea: “O le a nonofo ou atalii i le nofoālii o Isaraelu,+ e oo atu lava i lona fā o tupulaga.”+ O le mea tonu lenā na tupu.

13 Ua avea Saluma le atalii o Iapese ma tupu i le tausaga lona 39 o le pulega a Usia+ le tupu o Iuta, ma na pule o ia mo le masina atoa mai i Samaria. 14 Ona alu aʻe lea o Manaema le atalii o Kati mai i Tiresa,+ ma alu atu i Samaria ma fasia Saluma+ le atalii o Iapese i Samaria. Ina ua uma ona fasiotia o ia e Manaema, ona avea lea o Manaema ma tupu e sui iā te ia. 15 A o le olaga uma o Saluma ma lana fouvalega lea na fouvale ai, ua tusia ia i le tusi o le talafaasolopito o tupu o Isaraelu. 16 O le taimi lea na sau ai Manaema mai i Tiresa ma faaumatia Tipasa ma i latou uma sa iai faapea ma ona oganuu, ona e latou te leʻi tatalaina ona faitotoʻa iā te ia. Na ia faaumatiaina Tipasa ma faatiau fafine totō uma sa iai.

17 O le tausaga lona 39 o le nofoaiga a Asaraia le tupu o Iuta, na avea ai Manaema le atalii o Kati ma tupu o Isaraelu, ma na pule o ia mo tausaga e sefulu mai i Samaria. 18 Na faia pea e ia o mea leaga i le silafaga a Ieova. E leʻi liliuese o ia i ona aso uma mai i agasala uma a Ierepoamo le atalii o Nepata, lea na faapogaia ai Isaraelu e agasala.+ 19 Ua sau Pula+ le tupu o Asuria i le nuu, ona avatu lea e Manaema iā Pula o taleni* siliva e 1,000, e fesoasoani mai ai ina ia faatumauina le malo iā te ia.+ 20 Ina ia maua siliva e avatu i le tupu o Asuria, ua aoina e Manaema mai i tagata mau‘oa+ o Isaraelu, e taʻi 50 sekeli* siliva a tagata ta‘ito‘atasi. Ona toe fo‘i ai lea o le tupu o Asuria, e le‘i nofo ai i le nuu. 21 A o le olaga uma o Manaema,+ ma mea uma na ia faia, po ua lē o tusia ea i le tusi o le talafaasolopito o tupu o Isaraelu? 22 Ona taoto ai lea o Manaema faatasi ma ona augātamā, ma ua avea Pekasia lona atalii ma tupu e sui iā te ia.

23 O le tausaga lona 50 o le nofoaiga a Asaraia le tupu o Iuta, na avea ai Pekasia le atalii o Manaema ma tupu o Isaraelu mai i Samaria, ma na pule o ia mo tausaga e lua. 24 Na faia pea e ia o mea leaga i le silafaga a Ieova. E leʻi liliuese o ia mai i agasala a Ierepoamo le atalii o Nepata, lea na faapogaia ai Isaraelu e agasala.+ 25 Ona foua lea o ia e lana auauna o Peka+ le atalii o Remalia. Ua fasiotia o ia e Peka i Samaria, i le ʻolo o le fale o le tupu faatasi ai ma Arakopo ma Arie. Na iā Peka tagata e toʻa 50 mai i Kiliata; ma ina ua uma ona fasiotia o ia e Peka, ona avea lea o Peka ma tupu e sui iā te ia. 26 A o le olaga uma o Pekasia ma mea uma na ia faia, ua tusia ia i le tusi o le talafaasolopito o tupu o Isaraelu.

27 O le tausaga lona 52 o le nofoaiga a Asaraia le tupu o Iuta, na avea ai Peka+ le atalii o Remalia ma tupu o Isaraelu mai i Samaria, ma na pule o ia mo tausaga e 20. 28 Na ia faia pea mea leaga i le silafaga a Ieova. E leʻi liliuese o ia mai i agasala a Ierepoamo le atalii o Nepata, lea na faapogaia ai Isaraelu e agasala.+ 29 I aso o Peka le tupu o Isaraelu, na sau ai Tikila-pilesa+ le tupu o Asuria ma osofaʻia ma faoa Iono, o Apelapete-maaka,+ o Ianoka, o Ketesa,+ o Hasora, o Kiliata,+ ma Kalilaia, o le nuu uma o Nafatali,+ ma ave faapagota i latou i Asuria.+ 30 Ona taupulepule lea o Hosea+ le atalii o Ele e fouvale iā Peka le atalii o Remalia, ua fasia e Hosea o ia ma ua oti ai; ona avea lea o Hosea ma tupu e sui iā te ia i le tausaga lona 20 o le pulega a Iotama+ le atalii o Usia. 31 A o le olaga uma o Peka, ma mea uma na ia faia, ua tusia ia i le tusi o le talafaasolopito o tupu o Isaraelu.

32 O le tausaga lona lua o le nofoaiga a Peka le atalii o Remalia le tupu o Isaraelu, na fai ai ma tupu Iotama+ le atalii o Usia+ le tupu o Iuta. 33 E 25 ona tausaga ina ua fai o ia ma tupu, ma e 16 tausaga na pule ai o ia mai i Ierusalema. O le igoa o lona tinā o Ierusa le afafine o Satoka.+ 34 Na faia pea e Iotama mea ua tonu i le silafaga a Ieova, e pei ona faia e Usia lona tamā.+ 35 Peitaʻi, e leʻi aveesea mea maualuluga, ma na faia pea e le nuu taulaga ma faamū taulaga i luga o mea maualuluga.+ O ia fo‘i na fausia le faitotoʻa pito i luga o le fale o Ieova.+ 36 A o le olaga uma o Iotama ma mea na ia faia, po ua lē o tusia ea i le tusi o le talafaasolopito o tupu o Iuta? 37 O aso na, na aauina mai ai e Ieova o Resina le tupu o Suria, ma Peka+ le atalii o Remalia e siitaua iā Iuta.+ 38 Ona taoto lea o Iotama faatasi ma ona augātamā, ma ua tanu o ia faatasi ma ona augātamā i le Aai a Tavita lona augātamā; ona avea lea o Aasa lona atalii ma tupu e sui iā te ia.