Esekielu

5 “A o oe, le atalii e o le tagata, ia e tago i se pelu maʻai, ma faaaogā e pei o se tafi a se tagata sele ʻava. Ia e tafi ai lou ulu ma lau ʻava, ma ia avane ni fua faatautau ina ia fua ma vaevaeina ai lauulu o le ʻava ma le ulu i ni vaega se tolu. 2 E te susunuina le tasi vaetolu i le afi i le aai pe a atoa aso e siʻomia ai.+ Ia e ave foʻi le isi tasi vaetolu, ma tāina i le pelu ia soo faataamilo ai le aai,+ a o le tasi vaetolu mulimuli, ia faasalalau solo i le matagi, ae ou te toina aʻe le pelu e tuliloaina i latou.+

3 “Ia e ave foʻi ni nai lauulu mai i le vaega mulimuli ma afīfī i lou pito ofu. 4 A ia e ave nisi lauulu ma togi i le afi ma susunuina ai. O le a salalau atu le afi mai i lea mea i le aiga uma o Isaraelu.+

5 “O le fetalaiga lenei a le Alii Pule Silisili Ese o Ieova: ‘O Ierusalema lenei. Ua ou tuuina o ia i totonu o nuu ma atunuu o loo siʻomia ai o ia. 6 Ae ua fouvale o ia i iʻuga o aʻu faamasinoga ma aʻu tulafono, ma ua sili atu ona amioleaga nai lo o isi nuu ma atunuu o loo siʻomia ai o ia.+ Auā ua latou teena iʻuga o aʻu faamasinoga, ma na latou lē savavali e tusa ma aʻu tulafono.’

7 “O le mea lea, o le fetalaiga lenei a le Alii Pule Silisili Ese o Ieova: ‘Talu ai ua sili atu lo outou leaga nai lo o nuu o loo siʻomia ai outou, ma e tou te leʻi savavali e tusa ma aʻu tulafono pe tausia iʻuga o aʻu faamasinoga, ae ua outou mulimuli i iʻuga o faamasinoga a nuu o loo siʻomia ai outou,+ 8 o lea, o le fetalaiga lenei a le Alii Pule Silisili Ese o Ieova: “Le aai e, o aʻu lava ou te faasagatau atu iā te oe,+ ma o aʻu lava e faaooina atu le sala faafaamasinoga i lou lotolotoi i luma o nuu.+ 9 Ou te faia iā te oe le mea ou te leʻi faia lava muamua, ma ou te lē toe faia foʻi se mea faapea, ona o mea inosia uma ua e faia.+

10 “ʻ“O le mea lea o le a ʻaina ai e tamā i lou lotolotoi o latou atalii,+ ma e ʻaina foʻi e atalii o latou tamā, ma o le a ou faaoo iā te oe faasalaga ma faataapeapeina ē o totoe mai iā te oe i itu uma.”’*+

11 “‘O le mea lea, ou te tautō iā te aʻu lava,’ ua fetalai mai ai le Alii Pule Silisili Ese o Ieova le Atua soifua, ‘talu ai ua e faaleagaina loʻu malumalu i au tupua inosia uma ma au gaoioiga ou te ʻinoʻino i ai,+ o le a ou teena* lava oe; ou te lē faapelepele iā te oe ma ou te lē alofa mutimutivale foʻi.+ 12 O le tasi vaetolu ua iā te oe, o le a feoti i latou i le faamaʻi pe feoti i lou lotolotoi ona o le oge. O le isi tasi vaetolu, o le a feoti i itu uma o loo siʻomia ai oe ona o le pelu.+ A o le tasi vaetolu mulimuli, ou te faataapeapeina i itu uma,* ae ou te toina aʻe le pelu e tuliloaina i latou.+ 13 Ona uma ai lea o loʻu ita, o le a faaitiitia foʻi loʻu ita tele iā i latou, ma o le a faamalieina ai aʻu.+ Pe a uma ona faaoo loʻu ita tele iā i latou, ona latou iloa ai lea o aʻu lava o Ieova, ma ua ou fai atu ma loʻu maumauaʻi e tapuaʻi mai tau lava o aʻu.+

14 “‘Ou te faia oe ma se nofoaga o faatafunaga ma se mea e faifai i ai nuu e siʻomia ai oe, ma i luma o i latou uma e ui ane ai.+ 15 O le a avea oe ma mea e faifai ma tauemu i ai,+ o se faaaʻoaʻoga lapataʻi ma o se mea e fefefe ai nuu o loo siʻomia oe, pe a ou faaoo atu iā te oe sala faafaamasinoga i loʻu ita, ma loʻu ita tele, ma faasalaga ogaoga. O aʻu lava o Ieova, ua ou fai atu ai.

16 “‘O le a ou fana atu iā te outou aū e oti ai o le oge, ina ia faaumatia ai outou. O aū ou te auina atu e fano ai outou.+ O le a ou faateleina le oge iā te outou e ala i le taofia o le mauaina o a outou meaʻai.*+ 17 Ou te auina atu iā te outou le oge ma manufeʻai,+ ma e faaumatia e ia mea a outou fanau ma outou faanoanoa ai. O le a lofia outou i faamaʻi ma le faamasaatoto, ma o le a ou tuuina atu foʻi i o outou luga le pelu.+ O aʻu lava o Ieova, ua ou fai atu ai.’”