Esekielu

12 Ua toe oo mai le afioga a Ieova iā te aʻu e faapea: 2 “Le atalii e o le tagata, o loo e nofo faatasi ma le aiga fouvale. Ua iai o latou mata, ae e latou te lē vāai, ua iai foʻi o latou taliga, ae e latou te lē faalogo,+ auā o i latou o le aiga fouvale.+ 3 A o oe le atalii e o le tagata, ia e sauni ni ato mo oe e pei o le a ave faapagota oe. A o ao, ia e alu atu e pei o le a ave faapagota oe a o latou vaavaai mai. Ia e alu faapagota mai i lou fale i se isi mea a o latou vaavaai mai. Atonu o le a latou malamalama ai, e ui o i latou o le aiga fouvale. 4 Ia e aumaia au ato ua saunia e ave pe a ave faapagota, a o ao ma o loo latou vaavaai mai; i le afiafipō, ia e alu e pei o se tasi ua aveina faapagota a o latou vaavaai mai.+

5 “Ia eli se pū i le pā o le fale a o latou vaavaai mai, ma aumai ai au ato mai i lea mea.+ 6 Ia tauave i ou tauʻau au ato a o latou vaavaai mai, ma ia e aumaia au ato a o pogisa. Ia ufiufi ou mata ina ia lē mafai ona e vaai i le eleele, auā ua ou faia oe ma faailoga i le aiga o Isaraelu.”+

7 Ona ou faia lea e pei lava ona faatonuina ai aʻu. I le ao, na ou aumaia ai aʻu ato e pei o ato e ave pe a ave faapagota, ae i le pō, na ou eliina ai i oʻu lima se pū i le pā o le fale. Ona ou aumaia lea i fafo o aʻu ato a o pogisa, ma tauave i oʻu tauʻau a o latou vaavaai mai.

8 Ua oo mai foʻi le afioga a Ieova iā te aʻu i le taeao e faapea: 9 “Le atalii e o le tagata, pe e leʻi fesili atu ea iā te oe le aiga o Isaraelu, o le aiga fouvale e faapea, ‘O ā au mea o fai?’ 10 Ia fai atu iā i latou, ‘O le fetalaiga lenei a le Alii Pule Silisili Ese o Ieova: “O le feʻau lenei faasaga i le taʻitaʻi+ i Ierusalema, ma le aiga uma o Isaraelu o loo i le aai.”’

11 “Ia fai atu, ‘E fai aʻu ma faailoga iā te outou.+ E pei ona ou faia, e faapea lava ona faia iā i latou. O le a tuliesea i latou ma ave faapagota.+ 12 O le taʻitaʻi o loo iā te i latou, o le a ia tauave i lona tauʻau ana ato ma alu ese a o pogisa. O le a ia eli se pū i le pā ma aumai ai ana ato mai i lea mea.+ O le a ia ufiufi ona mata ina ia lē mafai ona ia vaai i le eleele.’ 13 O le a ou lafo laʻu upega i ona luga, ma o le a maua o ia i laʻu upega e tuli ai manu.+ Ona ou aumaia lea o ia i Papelonia i le atunuu o tagata Kaletaia, ae e lē vaai i ai o ia; ma o le a oti o ia i inā.+ 14 O ē uma o loo siʻomia o ia, o ana fesoasoani ia ma ana ʻautau, o le a ou faataapeapeina i itu uma+ ma tō aʻe le pelu e tuliloaina i latou.+ 15 Ona latou iloa ai lea o aʻu lava o Ieova pe a ou faataapeapeina i latou i nuu, ma ou faasalalau solo i latou i atunuu eseese. 16 Ae o le a ou faatotoe ni nai tagata o i latou mai i le pelu, o le oge, ma le faamaʻi, ina ia latou faamatala atu a latou mea inosia uma na faia i atunuu latou te ō atu i ai; ona latou iloa ai lea o aʻu lava o Ieova.”

17 Ua toe oo mai le afioga a Ieova iā te aʻu e faapea: 18 “Le atalii e o le tagata, ia e ʻai au meaʻai ma le gatete, ia inu foʻi au vai ma le atuatuvale ma le popole.+ 19 Ia fai atu i tagata o le laueleele, ‘O le fetalaiga lenei a le Alii Pule Silisili Ese o Ieova i tagata o nonofo i Ierusalema, i le laueleele o Isaraelu: “E ʻai a latou meaʻai ma le popole, e inu foʻi a latou vai ma le fefefe, auā o le a matuā faatafunaina lo latou laueleele+ ona o amioga sauā a ē uma o loo nonofo ai.+ 20 O le a faagaogaoina aai o loo nonofo ai tagata, o le a faatafunaina foʻi le laueleele;+ ona outou iloa ai lea o aʻu lava o Ieova.”’”+

21 Ua toe oo mai le afioga a Ieova iā te aʻu e faapea: 22 “Le atalii e o le tagata, o le ā lenei faaupuga masani o loo iā te outou i Isaraelu e faapea, ‘Ua faaumiumi aso ae e lē o taunuu lava se faaaliga e tasi’?+ 23 O lea, ia fai atu iā i latou, ‘O le fetalaiga lenei a le Alii Pule Silisili Ese o Ieova: “O le a ou faamutaina lenei faaupuga, ma o le a lē toe faaaogā e i latou lenei faaupuga masani i Isaraelu.”’ Ae ia fai atu iā i latou, ‘Ua lata mai aso+ ma o le a faataunuuina faaaliga uma.’ 24 Auā o le a lē toe iai ni faaaliga pepelo po o ni valovaloga faaʻoleʻole* faataulāitu i le aiga o Isaraelu.+ 25 ‘“Auā o aʻu o Ieova, o le a ou tautala atu, ma o le upu lava ou te tautala atu ai, e faataunuuina lava e aunoa ma le faatuai.+ Le aiga fouvale e, ou te tautala atu i le upu ma e faataunuuina lava i o outou aso,”+ ua fetalai mai ai le Alii Pule Silisili Ese o Ieova.’”

26 Ua toe oo mai le afioga a Ieova iā te aʻu e faapea: 27 “Le atalii e o le tagata, ua faapea ane le nuu* o Isaraelu, ‘O le faaaliga ua ia vaai i ai e leʻi taitai oo mai, ma ua ia faia valoaga e faatatau i se taimi i le lumanaʻi e leʻi taitai oo i ai.’+ 28 O lea, ia fai atu iā i latou, ‘O le fetalaiga lenei a le Alii Pule Silisili Ese o Ieova: “‘E leai saʻu upu e tolopōina le faataunuuina. O so o se upu ou te tautala atu ai, o le a taunuu lava,’ o le fetalaiga lea a le Alii Pule Silisili Ese o Ieova.”’”