Esekielu

14 Ua ō mai nisi o toeaina o Isaraelu ma nonofo i oʻu luma.+ 2 Ona oo mai lea o le afioga a Ieova iā te aʻu e faapea: 3 “Le atalii e o le tagata, ua maumauaʻi nei tamāloloa e mulimuli i a latou tupua inosia,* ma ua latou faia se mea e tautevateva ai lea e faapogaia ai tagata ia agasala. Aiseā la o le a ou faataga ai i latou e fesili mai iā te aʻu?+ 4 O lea, ia e talanoa atu iā i latou ma faapea atu, ‘O le fetalaiga lenei a le Alii Pule Silisili Ese o Ieova: “Afai e maumauaʻi se tagata Isaraelu e mulimuli i ana tupua inosia, ma faia se mea e tautevateva ai lea e faapogaia ai tagata ia agasala, ma ua sau o ia ma fesili i se perofeta, o aʻu, o aʻu lava o Ieova, ou te tali atu iā te ia e tusa ma le tele o ana tupua inosia. 5 Auā o le a ou faatupuina le fefe i loto o le aiga o Isaraelu, ona ua ō ese i latou uma mai iā te aʻu, ma ua latou mulimuli i a latou tupua inosia.”’+

6 “O lea ia fai atu i le aiga o Isaraelu, ‘O le fetalaiga lenei a le Alii Pule Silisili Ese o Ieova: “Inā foʻi mai ia ma ia liliuese mai i a outou tupua inosia, ma liliuese o outou mata mai i a outou mea inosia uma na faia.+ 7 Auā o so o se tagata Isaraelu po o sē e aumau o se tagata ese i Isaraelu, e vavaeese mai iā te aʻu ma maumauaʻi e mulimuli i ana tupua inosia, ma faia se mea e tautevateva ai lea e faapogaia ai tagata ia agasala, ma ua sau o ia ma fesili i laʻu perofeta,+ o aʻu, o aʻu lava o Ieova, ou te tali atu lava iā te ia. 8 O le a ou teena lea tagata, ma fai o ia ma faailoga lapataʻi ma o se faaupuga masani, ou te faaumatia foʻi o ia mai i loʻu nuu;+ ma o le a outou iloa ai o aʻu lava o Ieova.”’

9 “‘Ae afai e faasesēina le perofeta ma ua ia avatu se tali, o aʻu lava o Ieova, o lē na faasesēina lenā perofeta.+ Ou te faaloaloa atu loʻu lima faasaga iā te ia, ma faaumatia o ia mai i loʻu nuu o Isaraelu. 10 E latou te selesele i āuga o a latou mea sesē. O le mea sesē a lē na fesili mai, ua tutusa ma le mea sesē a le perofeta, 11 ina ia lē toe ō ese ai le aiga o Isaraelu mai iā te aʻu, ma lē toe faaleagaina ai i latou lava i a latou solitulafono. Ona avea ai lea o i latou ma oʻu nuu ma fai aʻu ma o latou Atua,’+ ua fetalai mai ai le Alii Pule Silisili Ese o Ieova.”

12 Ua toe oo mai foʻi le afioga a Ieova iā te aʻu e faapea: 13 “Le atalii e o le tagata, afai e agasala mai se atunuu iā te aʻu e ala i le gaoioi ma le lē faamaoni, ou te faaloaloa atu loʻu lima faasaga i ai ma taofia le mauaina o a latou meaʻai,*+ ou te auina atu foʻi le oge i le aai+ ma faaumatia ai tagata ma manu.”+ 14 “‘E tusa pe e iai i le aai nei tamāloloa e toʻatolu, o Noa,+ o Tanielu+ ma Iopu,+ e na o i latou lava e mafai ona latou laveaʻiina ona o la latou amiotonu,’+ ua fetalai mai ai le Alii Pule Silisili Ese o Ieova.”

15 “‘Seʻi faapea foʻi ou te faaui ane manufeʻai i le laueleele, ma faaumatia ai le toʻatele o tagata* ma ua faagaogaoina ai le laueleele, e aunoa ma se isi e toe ui ane ai ona o manufeʻai.+ 16 Ou te tautō iā te aʻu lava,’ ua fetalai mai ai le Alii Pule Silisili Ese o Ieova le Atua soifua, ‘e tusa pe e iai i le aai nei tamāloloa e toʻatolu, e lē mafai ona latou laveaʻiina o latou atalii po o afafine; e na o i latou lava e mafai ona latou laveaʻiina, ma o le a faatafunaina le laueleele.’”

17 “‘Seʻi faapea foʻi ou te faaoo atu le pelu i le atunuu,+ ma ou fai atu: “Ia ui atu le pelu i le atunuu,” ma ua faaumatia ai tagata ma manu.+ 18 E tusa pe e iai i le aai nei tamāloloa e toʻatolu, ou te tautō iā te aʻu lava,’ ua fetalai mai ai le Alii Pule Silisili Ese o Ieova le Atua soifua, ‘e lē mafai ona latou laveaʻiina o latou atalii po o afafine; e na o i latou lava e mafai ona latou laveaʻiina.’”

19 “‘Seʻi faapea foʻi ou te faaoo atu le faamaʻi i lea atunuu,+ ma ou sasaa ifo i ai loʻu ita tele e ala i le faamasaatoto ma ua faaumatia ai tagata ma manu. 20 E tusa pe e iai i le aai Noa,+ Tanielu+ ma Iopu,+ ou te tautō iā te aʻu lava,’ ua fetalai mai ai le Alii Pule Silisili Ese o Ieova le Atua soifua, ‘e lē mafai ona latou laveaʻiina o latou atalii po o afafine; e na o i latou lava e mafai ona latou laveaʻiina ona o la latou amiotonu.’”+

21 “Auā o le fetalaiga lenei a le Alii Pule Silisili Ese o Ieova, ‘E faapena foʻi pe a ou tuuina atu aʻu faasalaga e fā,*+ o le pelu, o le oge, o manufeʻai ma faamaʻi+ faasaga iā Ierusalema, ina ia faaumatia ai tagata ma manu mai i le aai.+ 22 Peitaʻi, o le a iai nisi e totoe i le aai o le a faasaoina ma taʻitaʻiina ese mai i le aai,+ o atalii ia ma afafine. O le a latou ō atu iā te outou, ma pe a outou vāai i o latou ala ma a latou mea e fai, ona faamāfanafanaina ai lea o outou ona o le mala na ou faaoo iā Ierusalema, o mea uma lava na ou faia i le aai.’”

23 “‘O le a latou faamāfanafana iā te outou pe a outou vāai i o latou ala ma a latou mea e fai, ma o le a outou iloa ai ou te leʻi faia fua ia mea na ou faia i le aai,’+ ua fetalai mai ai le Alii Pule Silisili Ese o Ieova.”