Tanielu

1 O le tausaga lona tolu o le nofoaiga a Ioakima+ le tupu o Iuta, na alu atu ai Nepukanesa le tupu o Papelonia i Ierusalema ma siʻomia le aai.+ 2 Ona tuuina atu lea e Ieova i lona lima+ o Ioakima le tupu o Iuta, ma nisi o ipu o le fale* o le Atua moni, ma ua ia aumaia i le atunuu o Senara*+ i le fale* o lona atua. Ua ia tuuina ia ipu i le fale e teu ai oloa a lona atua.+

3 Ona faatonuina lea e le tupu Asepenasa, o lē e sili o ona tagata aloaʻia, ina ia aumai nisi o tagata Isaraelu,* e aofia ai ē na tupuga mai i tupu ma tamālii.+ 4 O i latou o tama talavou* e leai ni faalētonu i o latou tino, ae e aulelei, e atamamai ma popoto, e iai foʻi le faautaga loloto,+ ma e agavaa e auauna i le maota o le tupu. E ao ona ia aʻoaʻoina i latou i tusi ma le gagana a tagata Kaletaia. 5 Ua faatonuina foʻi e le tupu ia avatu iā i latou meaʻai mai i taumafa lelei a le tupu i aso taʻitasi, ma ia feinu i le uaina e inu ai o ia. E ao ona toleni* i latou mo tausaga e tolu, ma e latou te auauna i le tupu i le faaiʻuga o na tausaga.

6 Ua iā i latou o nisi mai i le ituaiga* o Iuta: o Tanielu,*+ o Hanania,* o Mesaelu,* ma Asaraia.*+ 7 Ua faaigoa* i latou e lē e sili o tagata aloaʻia; ua ia faaigoa Tanielu iā Peletisara,+ ua ia faaigoa Hanania iā Sataraka, ua ia faaigoa Mesaelu iā Mesako, ae ua ia faaigoa Asaraia iā Apeteniko.+

8 Peitaʻi, ua maumauaʻi Tanielu i lona loto e lē leaga o ia i taumafa lelei a le tupu po o le uaina e inu ai o ia. Ua ia talosaga atu ai i lē e sili o tagata aloaʻia mo se faatagaga ina ia lē faaleagaina ai o ia i nei mea. 9 Ua faapogaia e le Atua moni o lē e sili o tagata aloaʻia ina ia fiafia* iā Tanielu ma alofa mutimutivale iā te ia.+ 10 Ae ua faapea mai lē e sili o tagata aloaʻia iā Tanielu: “Ou te fefe i loʻu alii le tupu, o lē ua faatonuina a outou meaʻai ma meainu. E faapefea pe a vaai mai o ia ua outou tino leaga atu i isi talavou* o ē e tutusa o outou tausaga? O oe o le a lamatia ai aʻu* i luma o le tupu.” 11 Ae ua fai atu Tanielu i le leoleo, o lē na tofia e lē e sili o tagata aloaʻia e vaavaaia Tanielu, Hanania, Mesaelu, ma Asaraia: 12 “Faamolemole, ia tofotofo au auauna mo aso e sefulu, ma ia aumai iā i matou ni fualaau faisua ina ia matou aai ai ma vai e feinu ai; 13 ona faatusatusa lea o o matou foliga ma foliga o talavou* ua aai i taumafa lelei a le tupu, ona e faia lea i au auauna e tusa ma mea ua e silafia.”

14 Ona malie lea o ia i la latou talosaga, ma tofotofoina i latou mo aso e sefulu. 15 I le faaiʻuga o aso e sefulu, ua sili atu ona lelei ma malolosi* o latou foliga nai lo o talavou* uma ua aai i taumafa lelei a le tupu. 16 O lea, ua avatu e le leoleo iā i latou o fualaau faisua nai lo o taumafa lelei ma le uaina a le tupu. 17 A o ia talavou* e toʻafā ua avatu i ai e le Atua moni le poto ma le tofā mamao i tusi uma ma le atamai; a o Tanielu ua avatu iā te ia le malamalamaga i ituaiga uma o vaaiga ma miti.+

18 Ua oo i le faaiʻuga o aso na fai atu le tupu e aami mai ai i latou,+ ona aumaia lea o i latou e lē e sili o tagata aloaʻia i luma o Nepukanesa. 19 Ona talanoa lea o le tupu ma i latou, ma e leai se tasi o i latou ua pei o Tanielu, o Hanania, o Mesaelu, ma Asaraia;+ ua latou auauna pea i luma o le tupu. 20 Ua fesili atu le tupu iā i latou i so o se mataupu e manaʻomia ai le atamai ma le malamalama, ma ua ia iloa ai ua faasefulu ona sili atu lo latou poto nai lo o ositaulaga uma e faia faiga faaagaga, ma ē uma e valaau atu i ē ua oti+ i lona malo atoa. 21 Ua iai pea Tanielu i inā seʻia oo i le uluaʻi tausaga o Kuresa+ le tupu.