Esekielu

42 Ona ia taʻitaʻi atu lea o aʻu agaʻi i le lotoā pito i fafo i le itu i mātū,+ ma ua ia avatu aʻu i le vaega ua iai potu ʻai, lea e sosoo ma le vaega o loo avanoa,+ ma o loo i le itu i mātū o le fale i tua o le malumalu.*+ 2 Ina ua ia fuaina le itu i mātū o le vaega ua iai potu ʻai, lea e iai se mea e ulu atu ai, e 100 kupita* le umi ae 50 kupita le lautele. 3 O le vaega lea e iai potu ʻai, e iai i le vā o le lotoā pito i totonu, lea e 20 kupita le lautele,+ ma le paepae o le lotoā pito i fafo. E faafesagaʻi poletito o potu ʻai, ma e fogāfale tolu lona maualuga. 4 Ua iai se auala savali i luma o potu ʻai*+ e 10 kupita le lautele ae e 100 kupita le umi,* ma e iai se mea e ulu atu i ai i le itu i mātū. 5 E lāiti atu potu ʻai pito i luga, nai lo o potu ʻai na iai i le fogāfale ogatotonu ma le pito i lalo, ona o le avanoa na faaaogā mo poletito. 6 Auā e fogāfale tolu nei potu ʻai, ae e leai ni ona poutū e pei o poutū o le lotoā. O le mea lea ua faavāiti ai le fola o potu ʻai pito i luga, nai lo o le fogāfale ogatotonu ma le pito i lalo.

7 O le pā maa o loo i fafo e lata i potu ʻai, lea e i tala ane o le lotoā pito i fafo ma e faafesagaʻi ma isi potu ʻai, e 50 kupita lona umi. 8 O le umi o potu ʻai ia e latalata i le lotoā pito i fafo, e 50 kupita, ae o potu ʻai ia e latalata i le malumalu, e 100 kupita. 9 Na iai se mea e ulu atu ai i potu ʻai mai i le itu i sasaʻe, pe a sau mai i le lotoā pito i fafo.

10 Na iai foʻi potu ʻai i le itu i saute, ma na iai se pā maa i le itu i sasaʻe o ia potu ʻai. Na latalata nei potu ʻai i le vaega o loo avanoa ma le fale.+ 11 Ua iai se auala savali i luma o ia potu ʻai e pei o le auala savali i luma o potu ʻai i le itu i mātū.+ E tutusa foʻi le umi ma le lautele o potu ʻai, faapea ma mea e ulufafo ai ma o latou fausaga. O mea e ulu atu ai 12 i potu ʻai i le itu i saute, e tutusa ma mea e ulu atu ai i potu ʻai i le itu i mātū. I le pā maa i le itu i sasaʻe, e iai se mea e ulu atu ai i le amataga o le auala savali, lea e mafai ona ulu atu ai se tasi.+

13 Ona ia fai mai lea iā te aʻu: “O potu ʻai i le itu i mātū ma potu ʻai i le itu i saute ia e i autafa o le vaega o loo avanoa,+ o potu ʻai paia ia, ma o i inā e aai ai ositaulaga o ē e faalatalata atu iā Ieova, i taulaga e sili ona paia.+ O i inā foʻi latou te tuu ai taulaga nei e sili ona paia, o le taulaga i meaʻai,* o le taulaga o agasala ma le taulaga o le nofosala, auā e paia lea nofoaga.+ 14 Pe a ulufale mai ositaulaga, e lē tatau ona latou ō ese mai i le mea paia ma ō atu i le lotoā pito i fafo, ae e leʻi aveeseina muamua o latou ofu na faaaogā mo le auaunaga,+ auā e paia ia ofu. E latou te oofu i nisi ofu ina ia mafai ai ona latou ō atu i vaega ia e faataga ona ō mai i ai le nuu.”

15 Ina ua uma ona ia fuaina vaega i totonu o le malumalu,* ona ia avatu lea o aʻu e ala i le faitotoʻa o loo faasaga i sasaʻe,+ ma ua ia fuaina itu uma.

16 Ua ia fuaina le itu i sasaʻe i le ū e fuaina ai.* E tusa ai ma le ū e fuaina ai, e 500 ū lona umi mai le tasi itu i le isi itu.

17 Ua ia fuaina le itu i mātū, ma e tusa ma le ū e fuaina ai, e 500 ū lona umi.

18 Ua ia fuaina le itu i saute, ma e tusa ma le ū e fuaina ai, e 500 ū lona umi.

19 Ona ia alu atu lea i le itu i sisifo. E 500 ū lona umi, e tusa ai o le ū e fuaina ai.

20 Ua ia fuaina itu e fā. Ua iai se pā ua siʻo faataamilo ai,+ e 500 ū lona umi ma e 500 ū lona lautele,+ ina ia vā ai le laueleele paia ma le laueleele e lē paia.+