Malaki

2 “O lenei foʻi, ositaulaga e, o le poloaʻiga lenei mo outou.+ 2 Afai tou te mumusu e faalogo ma teuina i o outou loto ina ia faamamaluina loʻu igoa,” ua fetalai mai ai Ieova o ʻau, “ona ou faaooina atu lea o le malaia i o outou luga,+ ma ou te liua o outou faamanuiaga i malaia.+ Ioe, ua ou liua faamanuiaga i malaia, auā ua outou lē teuina i o outou loto lenei mea.”

3 “Faauta! ou te faaleagaina* a outou fatu ua lūlūina ona o outou,+ ou te lafoina atu foʻi otaotavale i o outou mata, o otaotavale ia o taulaga o a outou tausamiga; ma o le a ave outou i le mea ua iai otaotavale. 4 E tou te iloa ai ua ou tuuina atu lenei poloaʻiga iā te outou, ina ia faaauau pea ona iai laʻu feagaiga ma Levi,”+ ua fetalai mai ai Ieova o ʻau.

5 “O laʻu feagaiga ma ia, o le feagaiga o le ola ma le filemu, lea na ou avatu iā te ia ina ia mataʻu* ai o ia. Na ia mataʻu iā te aʻu, ioe, na ia mata‘u i lo‘u igoa. 6 Sa i lona gutu le tulafono* o le upu moni,+ e leʻi maua foʻi i ona laugutu se mea e lē tonu. Na ia savali faatasi ma aʻu i le filemu ma le amiotonu,+ ma e toʻatele i latou na ia faaliliueseina mai i mea sesē. 7 Auā e ao ona leoleo le poto i laugutu o le ositaulaga, ma e ao foʻi ona saʻilia e tagata le tulafono* mai i lona gutu,+ auā o ia o le avefeʻau a Ieova o ʻau.

8 “A o outou, ua outou liliuese mai i le ala. O outou foʻi ua tautevateva ai le toʻatele i le tulafono.*+ Ua outou faaleagaina le feagaiga a Levi,”+ ua fetalai mai ai Ieova o ʻau. 9 “O lea, o le a ou faia outou ina ia inosia ma manatu faatauvaa i ai le nuu atoa, ona ua outou lē tausia oʻu ala, ae ua outou faaituʻau i le faatatauina o le tulafono.”+

10 “Pe e lē toʻatasi ea le tamā o i tatou uma?+ Pe e lē toʻatasi ea le Atua na foafoaina i tatou? Aiseā la ua tatou faa‘ole‘ole ai o le tasi i le isi,+ i lo tatou solia o le feagaiga a o tatou augātamā? 11 Ua faa‘ole‘ole Iuta, ua faia foʻi le mea inosia i Isaraelu ma Ierusalema; auā ua faaleagaina e Iuta le paia* o Ieova,+ lea e pele iā te Ia, ma ua ave foʻi e ia le afafine o se atua ese e fai ma ana avā.+ 12 O le a faaumatia e Ieova so o se tasi mai i faleʻie o Iakopo ua faia lenā mea, e tusa lava po o ai,* e ui e na te avatu le taulaga e fai ma meaalofa iā Ieova o ʻau.”+

13 “E iai se isi mea* e tou te faia, e iʻu ai ina lilofia le fata faitaulaga a Ieova i loimata ona o le tagi ma le ōi, ma ua lē toe liuliualo mai ai o ia i a outou taulaga e fai ma meaalofa, pe fiafia foʻi i so o se mea mai i o outou lima.+ 14 Ae ua outou fai atu, ‘O le ā le māfuaaga?’ Auā ua fai Ieova ma molimau iā te oe ma lau avā na e faia a o e tauleʻaleʻa, o lē na e faa‘ole‘ole i ai, e ui o ia o lau paaga ma o le avā o lau feagaiga.*+ 15 Ae e iai se tasi e na te leʻi faia ia mea, auā ua iā te ia le vaega ua totoe o le agaga. O le ā le mea ua ia saʻilia? O le fanau a le Atua. O lea ia outou leoleo i o outou loto, ma aua neʻi e faa‘ole‘ole i lau avā na fai a o e tauleʻaleʻa. 16 Auā ou te ʻinoʻino* i le tatalaina o faaipoipoga,”+ ua fetalai mai ai Ieova le Atua o Isaraelu, “ma lē ua ufiufi lona ofu i le faasauā,”* ua fetalai mai ai Ieova o ʻau. “Ia outou leoleo fo‘i i o outou lava loto, ma aua neʻi outou feutagaʻi ma le faa‘ole‘ole.+

17 “Ua outou faatigā iā Ieova i a outou upu.+ Ae ua outou fai atu, ‘O le ā le auala ua matou faatigā ai iā te ia?’ E ala i le fai ane, ‘O i latou uma ua faia mea leaga e lelei i latou i le silafaga a Ieova, ma ua fiafia o ia iā i latou,’+ pe e faapea ane foʻi, ‘O fea o iai le Atua o le faamasinotonu?’”