Faamasino

8 Ona fai mai lea o tagata o Efaraima iā te ia: “O le ā ea lenei mea ua e faia iā i matou? Aiseā na e lē amia ai i matou ina ua e alu atu e tau ma Mitiana?”+ Ua latou matuā finau ane iā te ia.+ 2 Ae ua ia fai atu iā i latou: “O le ā se mea ua ou faia e faatusatusa atu i mea ua outou faia? Pe e lē sili ea toe fuifui vine o Efaraima+ nai lo o seleselega o vine o Apieseru?+ 3 Na tuuina atu e le Atua i o outou lima o perenise o Mitiana o Oreva ma Seeva,+ ma o le ā ea se mea ua ou faia e faatusatusa atu i mea ua outou faia?” Ina ua ia fai atu lenā tala, ona teʻa ai lea o lo latou ita.*

4 Ua oo atu Kitiona i Ioritana ma sopoʻia. Ua lē lavavā Kitiona ma tagata e toʻa 300 ua iā te ia, ae o loo tuliloa pea o latou fili. 5 O lea, ua ia fai atu i tagata o Sukota: “Faamolemole, seʻi avane ni falaoa i tagata o loo mulimuli mai iā te aʻu, auā ua lē lavavā i latou, ae ou te tuliloa pea iā Sepa ma Salemuna, o tupu o Mitiana.” 6 Ae ua fai mai perenise o Sukota: “Po ua i ou lima ea Sepa ma Salemuna e matou te avatu ai falaoa i lau ʻautau?” 7 Ona fai atu lea o Kitiona: “Afai e tuuina mai e Ieova o Sepa ma Salemuna i loʻu lima, ona ou sasaina lea o outou i laau tuitui ma laau talatala o le toafa.”+ 8 Ua alu aʻe o ia mai i inā e agaʻi i Penueli, ma fai atu le talosaga lava lenā, ae na tali mai tagata o Penueli iā te ia e pei o tagata o Sukota. 9 Ua ia faapea atu foʻi i tagata o Penueli: “Ou te talepeina i lalo lenei ʻolo+ pe a ou foʻi mai ma le manumalo.”

10 Sa iai Sepa ma Salemuna i Karekori, faatasi ma a la ʻautau, e tusa ma le to‘a 15,000. O tagata ia na totoe mai i le ʻautau atoa a tagata mai i Sasaʻe,+ auā na fasiotia tane e toʻa 120,000 o ē na iai a latou pelu. 11 Ua alu aʻe pea Kitiona i le ala o ē na nonofo i faleʻie i le itu i sasaʻe o Nopa ma Iakepea,+ ma osofa‘ia le ʻautau a o leʻi nofosauni i latou. 12 Ina ua sosola Sepa ma Salemuna, na ia tuliloa iā i laʻua ma puʻea tupu e toʻalua o Mitiana, o Sepa ma Salemuna; ua gatete foʻi le ʻautau uma.

13 Ua toe foʻi mai Kitiona le atalii o Ioasa mai i le taua, na ui mai i le aʻega e alu aʻe ai i Herese. 14 A o alu aʻe, na ia puʻea ai se tauleʻaleʻa mai i Sukota ma fesilisili iā te ia. Ona tusia lea e le taule‘ale‘a mo ia o igoa o perenise ma toeaina o Sukota, e toʻa 77 tane. 15 Ona alu atu lea o ia i tagata o Sukota ma faapea atu: “O Sepa lenei ma Salemuna na outou faifai ai iā te aʻu e faapea, ‘Po ua i ou lima ea Sepa ma Salemuna e matou te avatu ai falaoa i ou tagata ua lē lavavā?’”+ 16 Ona ia ave lea o toeaina o le aai faapea laau tuitui ma laau talatala o le toafa, ma ia faia ai le aʻoaʻiga o tagata o Sukota.+ 17 Na ia talepe i lalo le ʻolo o Penueli,+ ma fasiotia tamāloloa o le aai.

18 Ua ia fesili atu iā Sepa ma Salemuna: “E faapeʻī tagata na outou fasiotia i Tapora?” Ua la tali mai: “E pei lava o oe, e taʻitasi ma foliga e pei o alo o se tupu.” 19 Ona ia fai atu lea: “O oʻu uso i latou, o le fanau a loʻu tinā. O loo soifua Ieova, ana oulua faaolaina i latou, semanū ou te lē fasiotia oulua.” 20 Ona ia fai atu lea iā Ietero lana ulumatua: “Inā tulaʻi ia e fasioti iā i laʻua.” Ae ua lē seʻia e le tauleʻaleʻa lana pelu, auā ua fefe o ia, ona o ia o se tauleʻaleʻa. 21 Ae ua fai mai Sepa ma Salemuna: “Ia e tulaʻi mai oe, ma fasi iā i maʻua, auā e fua le tagata i lona malosi.”* Ona tulaʻi lea o Kitiona ma fasioti iā Sepa ma Salemuna,+ na ia ave foʻi asoa e pei o le masina na i ua o a la kamela.

22 Mulimuli ane, ona fai mai lea o tagata Isaraelu iā Kitiona: “Ia e pule iā i matou, o oe ma lou atalii atoa ma le atalii o lou atalii, auā ua e faaolaina i matou mai i lima o Mitiana.”+ 23 Ae ua faapea atu Kitiona iā i latou: “Ou te lē pule iā te outou, e lē pule foʻi loʻu atalii iā te outou. E pule lava Ieova iā te outou.”+ 24 Ua toe faapea atu Kitiona: “Ou te talosaga atu iā te outou: ia outou aumai iā te aʻu se mama o le isu mai i a outou mea na faoa.” (Na iai a latou mama auro e tui i isu, auā o i latou o tagata Isamaeli.)+ 25 Ua latou tali mai: “Matou te avatua lava.” Ona latou fofola lea o se ofu tele, ma taʻitoʻatasi le tagata ma lafo i ai se mama o le isu mai i mea na faoa. 26 E 1,700 sekeli* auro le mamafa o mama auro o isu na ia talosaga i ai, e ese mai i asoa e pei o le masina, o tautaliga, ma ofu fulufulu mamoe violē na ofuina e tupu o Mitiana, ma asoa na i ua o kamela.+

27 Ona faia lea e Kitiona o le efota+ i le auro, ma faaaliali i lona aai o Ofira;+ ona ō atu lea o Isaraelu uma i inā ma tapua‘i ai,*+ ma avea ai ma mailei iā Kitiona ma lona aiga.+

28 Ua toʻilalo Mitiana+ i luma o le fanauga a Isaraelu, ma e latou te le‘i toe faasagatau iā i latou;* ona filemu ai lea o le laueleele mo tausaga e 40 i aso o Kitiona.+

29 Ona toe fo‘i lea o Ierupaala+ le atalii o Ioasa i lona aiga ma nofo ai pea i inā.

30 E toʻa 70 atalii na fananau mai iā Kitiona,* auā e toʻatele ana avā. 31 Na fanaua foʻi e lana palake sa i Sekema se atalii mai iā te ia, ma na faaigoa e Kitiona o Apimeleko.+ 32 Ona maliu lea o Kitiona le atalii o Ioasa ina ua toeaina lava, na tanu foʻi o ia i le tuugamau o Ioasa lona tamā i Ofira, le nuu o tagata Apieseru.+

33 Ina ua maliu Kitiona, ona toe tapua‘i lea o le fanauga a Isaraelu iā Paala,*+ ma latou tofia ai Paala-perita e avea ma o latou atua.+ 34 Ua lē manatua e le fanauga a Isaraelu Ieova lo latou Atua,+ o lē na lavea‘iina i latou mai i lima o o latou fili uma na siʻomia ai i latou;+ 35 e latou te leʻi alolofa faamaoni atu foʻi i le aiga o Ierupaala, o Kitiona lea, e tusa ai o mea lelei uma na ia faia mo Isaraelu.+