Numera

8 Ona fetalai mai lea o Ieova iā Mose e faapea: 2 “Ia e fai atu iā Arona ma e faapea atu iā te ia, ‘Pe a e tutuina molī, e ao ona susulu atu le malamalama o molī e fitu i le pito i luma o le tuugāmolī.’”+ 3 O lea, o le mea lenei ua faia e Arona: Ua ia tutu molī ina ia malamalama ai le pito i luma o le tuugāmolī,+ e pei ona poloaʻi mai ai Ieova iā Mose. 4 Ua faapenei ona faia le tuugāmolī: Ua faia i le auro e ala i le faaaogāina o le samala; e mai i lona ʻau e oo i ona fuga ua faia e ala i le faaaogāina o le samala.+ Ua faia le tuugāmolī e tusa ai ma mea na faaali mai+ e Ieova iā Mose.

5 Ua fetalai mai pea Ieova iā Mose e faapea: 6 “Ia e aumai le ʻau sa Levī mai i le fanauga a Isaraelu, ma ia faamamāina i latou.+ 7 O le auala lea e te faamamā ai i latou: Ia sausau le vai e faamamā ai mai i agasala i o latou luga, e ao ona latou tafi o latou tino uma, ia tatā o latou ofu, ma faamamā iā te i latou lava.+ 8 Ona latou aumaia lea o se tamaʻi povi poʻa+ ma le taulaga i meaʻai+ o falaoamata lelei ua iai sina suāuu, ma e te aumaia foʻi se tamaʻi povi poʻa e fai ai le taulaga o agasala.+ 9 E te aumaia le ʻau sa Levī i luma o le faleʻie o le feiloaʻiga, ma faapotopoto mai le faapotopotoga atoa o le fanauga a Isaraelu.+ 10 Pe a e aumaia le ʻau sa Levī i luma o Ieova, e faaee e le fanauga a Isaraelu o latou lima i luga o le ʻau sa Levī.+ 11 E ao iā Arona ona ofo atu* le ʻau sa Levī i luma o Ieova, e fai ma taulaga lūlū+ mai i le fanauga a Isaraelu, ma e latou te auauna i le galuega a Ieova.+

12 “Ona faaee lea o lima o le ʻau sa Levī i luga o ulu o povi poʻa.+ Pe a māeʻa, ona avatu lea o le tasi e fai ai le taulaga o agasala, ma le isi e fai ai le taulaga mū iā Ieova, e faia ai le togisala+ mo le ʻau sa Levī. 13 E te faatutū le ʻau sa Levī i luma o Arona ma ona atalii, ma ofo atu* i latou e fai ma taulaga lūlū iā Ieova. 14 E ao ona e vavaeese le ʻau sa Levī mai i le fanauga a Isaraelu, ma e fai le ʻau sa Levī ma oʻu tagata.+ 15 A mavae lea, o le a ō mai le ʻau sa Levī e auauna i le faleʻie o le feiloaʻiga. O le auala lea e te faamamāina ai i latou ma ofo atu* i latou o se taulaga lūlū. 16 Auā o i latou ua tofia mo aʻu mai i le fanauga a Isaraelu. E fai i latou mo aʻu ina ia sui ai ulumatua uma lava* o le fanauga a Isaraelu.+ 17 Auā o aʻu e ana ulumatua uma o le fanauga a Isaraelu, o tagata atoa ma manu.+ Na ou faapaiaina i latou mo aʻu i le aso na ou taia ai ulumatua uma i le atunuu o Aikupito.+ 18 Ou te aumaia le ʻau sa Levī e sui ai ulumatua uma o le fanauga a Isaraelu. 19 Ou te avatu le ʻau sa Levī o ē ua tofia iā Arona ma ona atalii mai i le fanauga a Isaraelu, ina ia auauna i le galuega mo le fanauga a Isaraelu i le faleʻie o le feiloaʻiga,+ ma fesoasoani i le faia o le togisala mo le fanauga a Isaraelu,+ ina neʻi oo se mala i le fanauga a Isaraelu, auā e faalatalata atu le fanauga a Isaraelu i le mea paia.”

20 Ona faia lea faapea e Mose ma Arona ma le faapotopotoga o le fanauga a Isaraelu faatasi ma le ʻau sa Levī. Ua faapena lava ona faia e le fanauga a Isaraelu faatasi ma i latou, e tusa ma poloaʻiga uma a Ieova iā Mose e faatatau i le ʻau sa Levī. 21 Ua faamamā e le ʻau sa Levī i latou lava, ma tatā o latou ofu,+ mulimuli ane ua ofo atu* e Arona i latou e fai ma taulaga lūlū i luma o Ieova.+ Ona faia lea e Arona o le togisala mo i latou e faamamā ai i latou.+ 22 Ua mavae lea, ona ō mai ai lea o le ʻau sa Levī ina ia faia la latou galuega i le faleʻie o le feiloaʻiga i luma o Arona ma ona atalii. Ua faapea lava ona latou faia e pei ona poloaʻi mai ai Ieova iā Mose e faatatau i le ʻau sa Levī.

23 Ua fetalai mai foʻi Ieova iā Mose e faapea: 24 “O le mea lenei e faatatau i le ʻau sa Levī: O se tane e alu atu e galue i le vaega e faia galuega i le faleʻie o le feiloaʻiga, e amata mai i le 25 tausaga agaʻi i luga le matua. 25 Ae pe a atoa le 50 tausaga, ona mālōlō ai lea o ia mai i lea vaega e faia le galuega ma lē toe galue ai. 26 E mafai ona ia fesoasoani i ona uso o ē e tausia le faleʻie o le feiloaʻiga e tusa ma o latou tiute tauave, ae e lē tatau ona ia faatinoina le galuega i inā. Ia outou faia faapea i le ʻau sa Levī ma o latou tiute tauave.”+