O le Tusi Lona Lua o Nofoaiga a Tupu

21 Ona taoto lea o Iosefatu faatasi ma ona augātamā, ua tanu foʻi o ia faatasi ma ona augātamā i le Aai a Tavita; ua avea foʻi Ioramo lona atalii ma tupu e sui iā te ia.+ 2 O ona uso, o atalii ia o Iosefatu, o Asaraia, o Ikielu, o Sakaria, o Asaraia, o Mikaele, ma Sefatia; o i latou uma nei o atalii o Iosefatu le tupu o Isaraelu. 3 Na tuuina atu e lo latou tamā iā i latou le tele o meaalofa o siliva, o auro, ma mea mananaia, faatasi ai ma aai malupuipuia i Iuta;+ ae na ia tuuina atu le malo iā Ioramo,+ auā o ia o le ulumatua.

4 Ina ua pule Ioramo i le malo o lona tamā, ona ia faamalosia lea o lona tulaga, e ala i le fasiotia o ona uso+ uma i le pelu, faapea foʻi ma nisi o alii sili o Isaraelu. 5 E 32 tausaga o Ioramo ina ua fai o ia ma tupu, ma e valu tausaga na ia pule ai mai i Ierusalema.+ 6 Na savali o ia i le ala o tupu o Isaraelu,+ e pei ona faia e i latou i le aiga o Aapo; auā na fai le afafine o Aapo ma ana avā,+ ma na ia faia pea mea leaga i le silafaga a Ieova. 7 Ae e leʻi finagalo Ieova e faaoo mai le faaumatiaga i le aiga o Tavita, ona o le feagaiga na ia osia ma Tavita,+ auā na ia folafola mai e na te tuuina mai pea se lamepa iā te ia ma lana fanau.+

8 O aso o Ioramo, na fouvale ai Etoma iā Iuta+ ma faia so latou lava tupu.+ 9 Ona ō atu lea i Etoma o Ioramo faatasi ma ana taʻitaʻiʻau faapea foʻi ana kariota uma, ma ua siʻosiʻomia o ia ma alii e pule i kariota, e tagata Etoma. Ae ua tulaʻi o ia i le pō ma faatoʻilaloina i latou. 10 Ae o loo fouvale pea Etoma iā Iuta e oo mai i le aso nei. O le taimi lenā na fouvale ai foʻi ma le nuu o Lipena,+ auā ua tuua e Ioramo o Ieova le Atua o ona augātamā.+ 11 Ua ia faia foʻi mea maualuluga+ i luga o mauga o Iuta, ina ia faapogaia ai tagata o Ierusalema e lē faamaoni i le Atua,* ma ua ia taʻitaʻisesēina ai Iuta.

12 Mulimuli ane, ona aumai ai lea o se tusi iā te ia mai iā Elia+ le perofeta, e faapea: “O le mea lenei ua fetalai mai ai Ieova le Atua o Tavita lou augātamā, ‘Ua e lē savali i ala o Iosefatu+ lou tamā, po o ala o Asa+ le tupu o Iuta. 13 Ae ua e savali i ala o tupu o Isaraelu,+ ma faapogaia Iuta ma ē o nonofo i Ierusalema e lē faamaoni i le Atua*+ e pei ona faia e le aiga o Aapo,+ ma ua e fasiotia fo‘i ou lava uso,+ o le aiga o lou tamā, o ē sa sili atu ona lelei nai lo o oe. 14 O le mea lea o le a matuā taia ai e Ieova lou nuu, o ou atalii, o au avā, ma au oloa uma. 15 E iā te oe foʻi le tele o maʻi, e aofia ai se maʻi i lou gaʻau, ma e faasolo ina leaga lou ma‘i i lea aso ma lea aso, seʻia oo ina paʻū mai i fafo lou gaʻau.’”

16 Ona faatupu lea e Ieova o le agaga+ fouvale iā Filisitia+ ma Arapi+ o ē sa nonofo latalata i tagata Aitiope, ina ia faasagatau iā Ioramo. 17 Ona latou ō atu faamalosi lea ma osofa‘ia Iuta ma faoa oloa uma na maua i le fale o le tupu,+ atoa foʻi ma ona atalii ma ana avā; e na o lona atalii o Ioasasa*+ o lē e aupito i laʻitiiti na totoe iā te ia. 18 Ina ua mavae nei mea uma, ona taia lea o ia e Ieova i se maʻi i lona gaʻau lea e leai se togafiti.+ 19 Mulimuli ane, ina ua mavae le lua tausaga, ona paʻū ai lea i fafo o lona gaʻau ona o lona maʻi, ma ua iʻu ai ina oti o ia i lona maʻi tigāina; ma e leʻi faamūina e ona tagata ni mea mo ia, e pei ona faamūina o mea mo ona augātamā.+ 20 E 32 ona tausaga ina ua fai o ia ma tupu, ma e valu tausaga na ia pule ai mai i Ierusalema. E leʻi faanoanoa foʻi se tasi ina ua oti o ia. Ona latou tanu lea o ia i le Aai a Tavita,+ ae e lē i fanuatanu o tupu.+