Ieremia

33 Ua faalua ona oo mai le afioga a Ieova iā Ieremia, a o taofia pea o ia i le Lotoā o le Leoleo,+ ua faapea mai: 2 “O le mea lenei ua fetalai mai ai Ieova o Lē na faia le lalolagi, o Ieova o lē na saunia ma na matuā faatumauina; o Ieova o lona suafa lea, 3 ‘Ia e valaau mai iā te aʻu, ona ou tali atu ai lea iā te oe, ma ou nofosauni e taʻu atu iā te oe mea tetele ma mea faigatā e te leʻi iloaina.’”+

4 “Auā o le mea lenei ua fetalai mai ai Ieova le Atua o Isaraelu, e faatatau i fale o lenei aai ma fale o tupu o Iuta ua talepe i lalo e fai ma puipuiga mai i mea mautiʻetiʻe ma le pelu+ a le fili, 5 e faatatau foʻi iā i latou ua ō mai e tau faasaga i le ‘au Kaletaia, ma faatumu na mea i tino oti o tagata o ē na ou fasiotia i loʻu ita ma loʻu to‘asā, ona o a latou mea leaga uma na ʻaloese ai oʻu mata mai i lenei aai: 6 ‘Ou te aumaia le faamālōlōga ma le ola mālōlōina mo ia,+ ou te faamālōlō foʻi i latou ma faaali atu i ai le tele o le filemu ma le upu moni.+ 7 Ou te toe aumaia o ē na ave faapagota o Iuta ma ē na ave faapagota o Isaraelu,+ ou te atiaʻe foʻi i latou e pei ona ou faia i le taimi muamua.+ 8 Ou te faamamāina i latou mai i le nofosala i a latou agasala na faia iā te aʻu,+ ou te faamagaloina atoatoa foʻi lo latou nofosala i a latou agasala ma mea sesē na latou faia iā te aʻu.+ 9 E avea o ia ma igoa fiafia iā te aʻu, o le viiga ma le matagofie i luma o atunuu uma o le lalolagi, o ē e faalogo i mea lelei uma ua ou faia iā i latou.+ E matataʻu foʻi i latou ma gatete+ ona o mea lelei uma ma le filemu uma ua ou tuuina atu iā te ia.’”+

10 “O le mea lenei ua fetalai mai ai Ieova: ‘I lenei mea e tou te faapea mai ua tuufua, ua leai se tagata po o ni lafumanu o iai, i aai foʻi o Iuta ma auala o Ierusalema ua faatafunaina, ua leai se tagata po o nisi e nonofo ai po o ni lafumanu, e toe lagona ai 11 le leo o le fiafia ma le olioli,+ o le leo o le alii faaipoipo ma le tamaʻitaʻi faaipoipo, o leo o i latou ua faapea mai: “Ia outou faafetai atu iā Ieova o ʻau, auā e lelei Ieova;+ e tumau e faavavau lona alofa faamaoni!”’+

“‘E latou te avatu taulaga faafetai i le fale o Ieova,+ auā ou te toe faafoʻisia mai o ē na ave faapagota o le nuu e pei ona iai muamua,’ ua fetalai mai ai Ieova.”

12 “O le mea lenei ua fetalai mai ai Ieova o ʻau, ‘I lenei mea ua tuufua, ua leai se tagata po o ni lafumanu, ma i ona aai uma foʻi, o le a toe iai fanua e aai ai lafumanu a leoleo mamoe, o ē e ave a latou lafu e taooto ai.’+

13 “‘I aai o vaega maugā, i aai o le nofoaga maulalo, i aai o le itu i saute, i le nuu o Peniamina, i nofoaga o siʻomia ai Ierusalema,+ ma i aai o Iuta,+ e toe ui ane ai lafu mamoe i lalo o lima o lē na te faitauina,’ ua fetalai mai ai Ieova.”

14 “‘Faauta! E oo mai aso,’ ua fetalai mai ai Ieova, ‘ou te faataunuuina ai le folafolaga lelei na ou fai atu ai e faatatau i le aiga o Isaraelu ma le aiga o Iuta.+ 15 I na aso ma i lenā taimi, ou te faatupuina ai iā Tavita se tātupu* amiotonu,+ e na te faia le faamasinogatonu ma le amiotonu i le nuu.+ 16 I na aso, e faaolaina ai Iuta+ ma e nonofo Ierusalema ma le saogalemu.+ E taʻua foʻi o ia: O Ieova o la Tatou Amiotonu.’”+

17 “Auā o le mea lenei ua fetalai mai ai Ieova: ‘E lē motu mai i le gafa o Tavita se tagata e nofo i le nofoālii o le aiga o Isaraelu,+ 18 e lē motu fo‘i ona iai mai i le ‘auositaulaga sa Levī, o se tagata e tū i o‘u luma e ofoina atu taulaga mū, e susunu taulaga i meaʻai, ma ofo atu taulaga.’”

19 Ua toe oo mai foʻi le afioga a Ieova iā Ieremia, ua faapea mai: 20 “O le mea lenei ua fetalai mai ai Ieova, ‘Afai e tou te mafaia ona lepeti laʻu feagaiga ma le ao, ma laʻu feagaiga ma le pō, ina ia lē oo mai le ao po o le pō i le taimi tatau,+ 21 ona mafai ai lea ona lepeti o laʻu feagaiga ma Tavita laʻu auauna,+ ina ia leai sona atalii e pule o se tupu i lona nofoālii,+ e faapea foʻi la‘u feagaiga ma le ʻauositaulaga sa Levī, o aʻu auauna.+ 22 E pei ona lē mafai ona faitauina o ʻau o le lagi ma lē mafai ona fuatia le oneone o le sami, e faapea lava ona ou faatoʻateleina le fanau a Tavita laʻu auauna, atoa ma sa Levī o ē o loo auauna mai iā te aʻu.’”

23 Ua toe oo mai le afioga a Ieova iā Ieremia, ua faapea mai: 24 “Pe e te lē o iloa ea mea ua tautatala mai ai lenei nuu, ua faapea, ‘O le a teena e Ieova aiga e lua na ia filifilia’? Ua latou lē faaaloalo i loʻu nuu, ma ua latou lē toe manatu iā i latou o se nuu.

25 “O le mea lenei ua fetalai mai ai Ieova: ‘E pei lava ona ou osia la‘u feagaiga ma le ao ma le pō,+ o tulafono foʻi o le lagi ma le lalolagi,+ 26 e faapea lava ona ou lē teena le fanau a Iakopo ma le fanau a Tavita laʻu auauna, ma ou te aumaia mai i lana fanau o ē e pule i ē e tupuga mai iā Aperaamo, Isaako, ma Iakopo. Auā ou te faapotopotoina mai i latou na ave faapagota,+ ma ou tigā alofa iā i latou.’”+