Ieremia
20 Ua faalogologo atu Pasura le atalii o Imere, o le ositaulaga, o ia foʻi o le taʻimua sili i le fale o Ieova, a o valoia e Ieremia nei mea. 2 Ona taia lea e Pasura o le perofeta o Ieremia, ma ua tuuina o ia i laau faamau+ sa i le Faitotoʻa Aupitoaluga o Peniamina, sa i le fale o Ieova. 3 Ae i le aso na sosoo ai, ina ua tatala e Pasura Ieremia mai i laau faamau, ona fai atu lea o Ieremia iā te ia:
“Ua faaigoa oe e Ieova, e lē o Pasura, a o le Mataʻu i Itu Uma.+ 4 Auā o le mea lenei ua fetalai mai ai Ieova, ‘Ou te faia oe ma mea e te mata‘u ai iā te oe lava atoa ma au uō uma, ma e latou te paʻuʻū i le pelu a o latou fili a o e vaavaai atu i ai;+ ou te tuuina atu foʻi Iuta uma i le lima o le tupu o Papelonia, ma e na te ave faapagota i latou i Papelonia ma fasiotia i latou i le pelu.+ 5 Ou te tuuina atu foʻi mea uma o loo teuina o lenei aai, o ana oloa uma, o ana mea tāua uma, ma ʻoa uma a tupu o Iuta i lima o o latou fili.+ E latou te faoa fo‘i na mea, ma ave ma avatu i Papelonia.+ 6 A o oe, Pasura e, ma ē uma o loo nonofo i lou fale, e aveina faapagota outou. E te alu atu i Papelonia ma o i inā e te oti ai, e tanu ai foʻi oe faatasi ma au uō uma, ona ua e vavalo atu iā i latou i mea pepelo.’”+
7 Ieova e, ua e faasesēina aʻu, ma ua faasesēina ai a‘u.
Ua e faaaogā lou malosi iā te aʻu, ma ua e manumalo.+
Ua avea aʻu ma mea e toē i ai i le aso atoa;
Ua tauemu mai tagata uma iā te aʻu.+
8 Auā o so o se taimi ou te tautala atu ai, e ao ona ou alaga ma folafola atu,
“O le sauā ma le faatafunaga!”
Auā ua avea le afioga a Ieova ma mea ua faalumaina ai aʻu, ma ulagia ai i le aso atoa.+
Ae i loʻu loto, ua pei o se afi e mumū o loo punitia i totonu o oʻu ivi,
Ma ua ou lē lavā taofi;
Ua lē mafai ona ou onosaia.+
“Ia taʻusala o ia; se‘i o tatou ta‘usalaina o ia!”
O tagata uma ua faamanuia mai iā te a‘u, ua latou tulimata‘i lo‘u pa‘ū:+
“Atonu o le a ia faia se mea sesē,
Ma tatou manumalo ai ma tauimasui atu iā te ia.”
11 Ae sa faatasi Ieova ma aʻu e pei o se toa malosi e mataʻutia.+
O le mea lea e tausuai ai ma lē manumalo i latou o loo faasauā mai iā te aʻu.+
E matuā faamāina i latou, auā e lē taulau i latou.
E lē galo foʻi lo latou māsiasi e faavavau.+
12 A o oe, Ieova o ʻau e, o loo e suʻesuʻe i le tagata amiotonu;
13 Ia pepese atu iā Ieova! Ia vivii atu iā Ieova!
Auā ua laveaʻi e ia le tagata mativa mai i lima o ē e faia mea leaga.
14 Ia malaia le aso na ou fanau mai ai!
Aua foʻi neʻi faamanuiaina le aso na fanaua ai aʻu e loʻu tinā!+
15 Ia malaia le tagata na avatua le tala lelei i loʻu tamā, e faapea:
“Ua fanau mai iā te oe se atalii, o se tama tama!”
Na matuā faafiafiaina ai o ia.
16 Tau ina ia avea lenā tagata e pei o ni aai ua lafoaʻiina e Ieova ma ua lē salamō ai.
Tau ina ia lagona e ia le alaga i le taeao ma le alaga o le taua i le tutonu o le lā.