Levitiko

21 Ua toe fetalai mai Ieova iā Mose: “Ia e fai atu i ositaulaga o atalii ia o Arona, ma faapea atu iā i latou, ‘Aua neʻi faaleaga e se tasi o ia lava i se tagata ua oti o le nuu.+ 2 Ae e mafai ona faaleagaina o ia lava ona o se tasi o ona toto ma aano o lē e vavalalata la laʻua faiā, o lona tinā, o lona tamā, o lona atalii, o lona afafine, o lona uso, 3 ma e mafai ona faaleagaina o ia lava ona o lona tuafafine, pe afai o se teine muli e la te nonofo faatasi, ma e leʻi nofotane. 4 Aua neʻi leaga o ia lava ma faalumaina o ia ona o se fafine mai i ona tagata ua iai sana tane. 5 Aua neʻi o latou sele mamā o latou ulu,+ pe tafi pito o a latou ʻava, pe selei i o latou tino.+ 6 E ao ona paia i latou mo lo latou Atua,+ ma aua neʻi o latou faalumaina le suafa o lo latou Atua,+ auā o i latou ia e faia taulaga i le afi iā Ieova, o le areto* a lo latou Atua, ma e ao ona paia i latou.+ 7 Aua neʻi o latou faaipoipo atu i se fafine talitane,+ se fafine ua faaleagaina lona teine muli, po o se fafine ua teteʻa ma lana tane,+ auā e paia le ositaulaga i lona Atua. 8 E ao ona e faapaia o ia+ auā e avatu e ia le areto a lou Atua. E tatau ona paia o ia iā te oe, auā o aʻu o Ieova, o lē ua faapaiaina outou, e paia lava aʻu.+

9 “‘Afai e faaleagaina e le afafine o le ositaulaga o ia lava ina ua fai o ia ma fafine talitane, ua ia faalumaina la lona tamā. E ao ona fasiotia o ia, ma susunu i le afi.+

10 “‘A o le ositaulaga sili mai i ona uso, o lē na liligi i lona ulu le suāuu e faauu ai,+ ma o lē na tofia* e ofu i ofu faaositaulaga,+ aua neʻi lē teuina lona lauulu pe saeia ona ofu.+ 11 Aua neʻi alu atu o ia i se tino oti;*+ aua neʻi faaleagaina o ia lava e tusa po o lona tamā po o lona tinā. 12 Aua neʻi ulufafo atu o ia mai i le faleʻie paia ma aua foʻi neʻi faaleagaina e ia le faleʻie paia o lona Atua,+ talu ai ua i ona luga le faailoga o le tuuina atu, o le suāuu lea e faauuina ai a lona Atua.+ O aʻu o Ieova.

13 “‘E ao ona ia faiavā i se teine muli.+ 14 Aua neʻi faiavā o ia i se fafine ua oti lana tane, se fafine ua teteʻa ma lana tane, o lē ua faaleagaina lona teine muli, po o se talitane; ae e ao ona ia faiavā i se teine muli mai i ona tagata. 15 Aua neʻi leaga lana fanau i le nuu ona o ia,+ auā o aʻu o Ieova o lē ua faapaiaina o ia.’”

16 Ua fetalai mai pea Ieova iā Mose e faapea: 17 “Ia e fai atu iā Arona, ‘E lē mafai e se tasi o lau fanau e oo lava i o latou tupulaga o loo mulimuli mai, o lē e iai se faalētonu i lona tino, ona faalatalata mai e avatu le areto a lona Atua. 18 Afai ua iai se tasi e iai se faalētonu i lona tino, aua lava neʻi faalatalata mai lea tagata: o se tane e tauaso, pe vae piʻo, pe e iai se faalētonu i ona foliga,* pe umī le isi lima po o le isi vae nai lo o le isi, 19 o se tane ua gau le vae pe gau le lima, 20 pe tua piʻo, pe saa,* pe leaga ona mata, pe poʻupoʻua le tino, pe lafā, po ua faaleagaina ona fuāmanava.+ 21 Aua neʻi faalatalata mai se tagata o le fanau a Arona le ositaulaga, o lē ua iai se faalētonu i lona tino e faia se taulaga iā Ieova i le afi. Talu ai ua iai le faalētonu i lona tino, aua neʻi faalatalata mai o ia e avatu le areto a lona Atua. 22 E mafai ona ʻai o ia mai i le areto a lona Atua mai i mea e sili ona paia,+ ma mai i mea paia.+ 23 Peitaʻi e lē mafai ona ulu atu o ia i totonu e latalata atu i le ʻie puipui+ ma e lē mafai ona ia faalatalata atu i le fata faitaulaga,+ ona ua iai se mea e faalētonu i lona tino; ma aua neʻi faaleagaina e ia loʻu fale‘ie paia,+ auā o aʻu o Ieova o lē ua faapaiaina i latou.’”+

24 Ua faapea lava ona fai atu o Mose iā Arona, ma ona atalii, ma le fanauga uma a Isaraelu.