O le Tusi Muamua o Nofoaiga a Tupu

19 Mulimuli ane, ina ua oti Naasa le tupu o le fanauga a Amoni, ona pule ai lea o lona atalii e sui iā te ia.+ 2 Ua faapea ane Tavita: “Ou te alofa faamaoni+ iā Anuni le atalii o Naasa, auā na alofa faamaoni lona tamā iā te aʻu.” Ona aauina atu lea e Tavita o avefeʻau e faamāfanafana iā te ia ona o lona tamā. Ae ina ua oo atu auauna a Tavita i le nuu o le fanauga a Amoni+ e faamāfanafana iā Anuni, 3 ona fai atu lea o taʻitaʻi o le fanauga a Amoni iā Anuni: “E te manatu ea ua faaaloalo Tavita i lou tamā, ua ia aauina mai ai o ē e faamāfanafana iā te oe? Pe e lē māfua ea ona ō mai ana auauna iā te oe, ina ia matuā vaavaai solo ma mataʻi le aai, ina ia faatoʻilaloina ai?” 4 Ona ave lea e Anuni o auauna a Tavita ma tafi a latou ʻava,+ ma selei o latou ofu e gata ifo i o latou nofoaga, ona aauina ese lea o i latou. 5 Ina ua taʻu atu iā Tavita e faatatau i tamāloloa, ona ia aauina atu lea o nisi e faafetaiaʻi iā i latou, auā ua matuā māsiasi tamāloloa; ua faapea atu le tupu: “Ia outou nonofo i Ieriko+ seʻia toe tutupu a outou ʻava, ona outou foʻi mai ai lea.”

6 Ua iloa e le fanauga a Amoni ua inosia e Tavita i latou, ona aauina atu lea e Anuni ma tagata Amonī o taleni* siliva e 1,000, e totogi ai ni kariota ma tagata tiʻetiʻe solofanua mai i Mesopotamia,* o Arama-maaka, ma Sopa.+ 7 O lea, ua latou totogi ai kariota e 32,000, faatasi ma le tupu o Maaka ma ona tagata. Ona latou ō mai lea ma tolauapi i luma o Metepa.+ A o tagata Amonī, ua latou faapotopoto faatasi mai i o latou aai, ma ō mai i le taua.

8 Ina ua faalogo i ai Tavita, ona ia aauina atu lea o Ioapo+ ma le ʻautau uma, ma ona tagata totoa e sili ona malolosi.+ 9 Ua ō ane le fanauga a Amoni ma faapotopoto faatasi e tau i le faitotoʻa o le aai, a o tupu na ō mai ua na o i latou i le fanua.

10 Ina ua iloa atu e Ioapo ua osofa‘i mai le fili mai i ona luma ma ona tua, ona ia tofia lea o nisi o fitafita sili o Isaraelu, ma faapotopoto faatasi i latou e tau ma tagata Suria.+ 11 A o isi na totoe o le nuu, ua ia tuuina atu i le taʻitaʻiga a* Apisai lona uso,+ ina ia faapotopoto faatasi e ia o i latou e faafetaiaʻi le fanauga a Amoni. 12 Ona ia fai atu lea: “Afai e malolosi tele tagata Suria+ iā te aʻu, ona e sau lea e laveaʻi aʻu; ae afai e malolosi tele le fanauga a Amoni iā te oe, ona ou laveaʻia lea o oe. 13 Ia tatou faamalolosi ma lototetele+ mo o tatou tagata ma aai a lo tatou Atua; e faia lava e Ieova le mea e lelei i lana silafaga.”

14 Ua ō atu Ioapo ma ona tagata e tau ma Suria, ona sosola ese ai lea o Suria mai i ona luma.+ 15 Ua vāai atu le fanauga a Amoni ua sosola ese tagata Suria, ona latou sosola ai foʻi lea mai i luma o Apisai lona uso, ma ō atu i le aai. Mulimuli ane, ua toe foʻi mai Ioapo i Ierusalema.

16 Ina ua vāai atu tagata Suria ua faatoʻilaloina i latou e Isaraelu, ona latou aauina atu lea o avefeʻau e aami tagata Suria na i le vaipanoa o le Vaitafe,*+ faatasi ma Sopaka le taʻitaʻiʻau a Atatesa na taʻitaʻia i latou.+

17 Ina ua taʻu mai iā Tavita le tala, ona ia vave faapotopoto lea o Isaraelu uma ma sopoʻia atu Ioritana, ua ō atu ma faapotopoto faatasi e tau ma i latou. Ua alu atu Tavita e faafetaiaʻi tagata Suria, ona latou tau lea ma ia.+ 18 Ona sosola lea o Suria mai i luma o Isaraelu; ua fasiotia foʻi e Tavita o tagata Suria e tau i kariota e toʻa 7,000, ma fitafita savavali e toʻa 40,000, na ia fasiotia foʻi Sopaka le taʻitaʻiʻau. 19 Ina ua iloa e auauna a Atatesa ua faatoʻilaloina i latou e Isaraelu,+ ona latou faia loa lea o se leleiga ma Tavita ma auauna iā te ia;+ e leʻi toe manana‘o fo‘i Suria e fesoasoani i le fanauga a Amoni.