O le Tusi Lona Lua iā Timoteo
1 O aʻu o Paulo, o le aposetolo a Keriso Iesu ona o le finagalo o le Atua, e tusa ma le folafolaga o le ola e ala iā Keriso Iesu,+ 2 o laʻu tusi iā Timoteo, le atalii pele:+
Tau ina ia iā te oe le agalelei faifua, le alofa mutimutivale, ma le filemu mai i le Atua le Tamā ma Keriso Iesu lo tatou Alii.
3 Ou te faafetai i le Atua o lē ua ou tuuina atu i ai le auaunaga paia e pei foʻi o oʻu augātamā, faatasi ai ma se lotofuatiaifo mamā, ina ia ou manatuaina pea oe i aʻu talosaga i pō ma ao. 4 Ua ou naunau e fia vaai iā te oe a o oʻu manatua ou loimata, ina ia faatumuina ai aʻu i le olioli. 5 Auā ua ou manatua lou faatuatua e lē faatagāfai,+ lea na iai muamua iā Loi le tinā o lou tinā ma Eunike lou tinā, ae ou te mautinoa o loo iai foʻi iā te oe.
6 O le mea lea ou te faamanatu atu ai iā te oe ina ia e faamumū e pei o se afi le meaalofa a le Atua ua iā te oe, ina ua faaee atu oʻu lima iā te oe.+ 7 Auā e leʻi tuuina mai e le Atua iā i tatou le agaga e palaai ai,+ ae o le agaga e faamalosi ai, e alofa ai+ ma mafaufau lelei ai. 8 O lea, aua neʻi e mā i le molimau e uiga i lo tatou Alii,+ po o aʻu o le pagota ona o ia, ae ia e onosaʻi i puapuaga+ ona o le tala lelei e ala i le faalagolago i le mana o le Atua.+ 9 Na ia faaola mai iā i tatou ma valaauina i tatou i le valaau paia,+ e lē ona o a tatou galuega, ae ona o lona lava finagalo ma lona agalelei faifua.+ Na tuuina mai i aso anamua lenei mea iā i tatou e tusa ai ma Keriso Iesu, 10 a o lenei ua faailoa manino mai i le faaalia mai o lo tatou Faaola, o Keriso Iesu,+ o lē na faaumatiaina le oti+ ae faasusulu mai le malamalama i le ola+ ma le tino e lē pala+ e ala i le tala lelei,+ 11 lea na tofia ai aʻu o sē e talaʻi, o se aposetolo ma o se faiaʻoga.+
12 O le māfuaaga foʻi lea ua ou tigā ai i mea nei,+ ae ou te lē mā ai.+ Auā ua ou iloa Lē ua ou talitonu i ai, ma ua ou mautinoa foʻi e mafai ona ia leoleoina le mea ua ou tuuina atu iā te ia, seʻia oo i lea aso.+ 13 Ia e taofimau pea i le faaaʻoaʻoga* o upu aogā*+ na e faalogo ai mai iā te aʻu i le faatuatua ma le alofa, ona o le autasi ma Keriso Iesu. 14 Ia e tausia lenei mea tāua na tuuina atu iā te oe, e ala i le agaga paia lea e i totonu iā i tatou.*+
15 Ua e iloa lenei mea, ua liliuese mai iā te aʻu o tane uma i le itumalo o Asia,+ e aofia ai Fogelu ma Emokene. 16 Tau ina ia faaalia e le Alii le alofa mutimutivale i le aiga o Oneseforo,+ auā na masani ona ia faamalosiau iā te aʻu, ma e leʻi mā foʻi o ia i oʻu noanoataga. 17 A o iai foʻi o ia i Roma, sa tinoū e saʻili iā te aʻu ma na ia maua aʻu. 18 Tau ina ia foaʻi atu e le Alii o Ieova* iā te ia lona alofa mutimutivale i lea aso. Ua e iloa lelei foʻi ana galuega uma na faia i Efeso.