O le Tusi Muamua o Nofoaiga a Tupu

12 O tane nei na ō mai iā Tavita i Sekeleka,+ a o leʻi mafai ona fealuaʻi o ia ona o Saulo+ le atalii o Kiso, ma o i latou nei sa aofia i tagata totoa na lagolagoina o ia i le taua.+ 2 Sa faaauupegaina i latou i ʻaufana, ma sa mafai ona faaaogā o latou lima taumatau ma lima tauagavale+ e sasau ai maa+ pe fana ai aū i ʻaufana. O i latou nei o uso* o Saulo le tagata Peniamina.+ 3 O Aisera le taʻitaʻi, faapea Ioasa, o atalii ia o Semaa le tagata Kipea,+ o Ieseelu ma Pelete, o atalii ia o Asemau,+ o Peraka, o Ieʻu le tagata Anatota, 4 o Isemaia le tagata Kipeona,+ o se toa malosi i le toʻatolu sefulu+ ma e na te taʻitaʻia le toʻatolu sefulu; o Ieremia, o Iaaseelu, o Iokana, o Ieosapa le tagata Ketere, 5 o Elusai, o Ierimota, o Pealia, o Semaria, o Sefatia le tagata Haripa, 6 o Elekana, o Isea, o Asareelu, o Ioesera, o Iasapama o tagata Koru+ ia; 7 ma Ioeli ma Sepatia, o atalii o Ieroama le tagata Kitoru.

8 Na iai nisi o tagata Kato na ō atu i le itu a Tavita i le nofoaga na lafi ai i le toafa;+ o i latou o tagata totoa malolosi, o tagata tau ua toleniina mo le taua, ua sauniuni a latou talipupuni ma tao, o o latou foliga ua pei o foliga o leona, e televavave foʻi i latou e pei o sevi i luga o mauga. 9 O Eseri o le taʻitaʻi, o lona lua o Opetaia, o lona tolu o Eliapo, 10 o lona fā o Mesemana, o lona lima o Ieremia, 11 o lona ono o Atai, o lona fitu o Elielu, 12 o lona valu o Iokana, o lona iva o Elesapata, 13 o lona sefulu o Ieremia, ma lona sefulu tasi o Makapanai. 14 O i latou ia e mai i le fanauga a Kato,+ o taʻitaʻi o le ʻautau. O lē e aupito i faatauvaa e mafai ona tau ma le toʻa 100, a o lē e aupito i sili e mafai ona tau ma le toʻa 1,000.+ 15 O i latou ia na sopoʻia Ioritana i le masina muamua ina ua lofia ona auvai, ma na latou tuliesea ē uma sa i fanua maulalalo i le itu i sasaʻe ma le itu i sisifo.

16 Ua ō mai foʻi nisi o le fanauga a Peniamina ma Iuta iā Tavita, i le nofoaga na lafi ai.+ 17 Ona alu atu lea o Tavita i o latou luma ma faapea atu: “Afai ua outou ō mai ma le filemu e fesoasoani mai iā te aʻu, ou te lotogatasi ma outou. Ae afai ua outou ō mai e faalata aʻu i oʻu fili ae e leai se mea sesē ua ou faia, ia silasila i ai le Atua o o tatou augātamā, ma ia faamasinoina+ e ia.” 18 Ona osofia* lea o Amesai+ le taʻitaʻi o le toʻatolu sefulu e le agaga o le Atua, ma ua ia faapea atu:

“Tavita e, o i matou o ou tagata, ma e matou te ʻau ma oe, le atalii e, o Iese.+

Ona talia lea o i latou e Tavita ma tofia i latou e avea ma taʻitaʻi o vaega‘au.

19 Na iai foʻi nisi o le ituaiga o Manase na sosola atu iā Tavita, ina ua ō mai o ia faatasi ma Filisitia e tau ma Saulo; ae e leʻi fesoasoani Tavita iā Filisitia, auā ina ua uma ona talatalanoa alii o Filisitia,+ ona latou aauina ese atu lea o ia, ma faapea ane: “O le a sola atu o ia i lona alii o Saulo, ma e lamatia ai o tatou ola.”+ 20 Ina ua alu o ia i Sekeleka,+ ona sosola mai lea iā te ia o i latou nei mai i le ituaiga o Manase: o Atana, o Ieosapa, o Ietiaelu, o Mikaele, o Ieosapa, o Eliu, ma Seletai, o taʻitaʻi ia o le taʻitoʻaafe a Manase.+ 21 Na fesoasoani i latou iā Tavita e tau ma le ʻautau e faoa mea, auā o i latou uma o tagata totoa malolosi,+ ma na avea i latou ma taʻitaʻi o le ʻautau. 22 O lea aso ma lea aso, na ō mai ai pea le nuu iā Tavita+ e fesoasoani iā te ia seʻia avea ma ʻautau toʻatele, e pei o le ʻautau a le Atua.+

23 O le aofaʻi nei o tagata totoa na faaauupegaina mo le taua, na ō mai iā Tavita i Heperona+ ina ia liliu atu iā te ia le malo o Saulo, e tusa ai ma le faatonuga a Ieova.+ 24 E toʻa 6,800 le fanauga a Iuta na aveina talipupuni tetele ma tao, o ē ua faaauupegaina mo le taua. 25 E mai i le fanauga a Simeona, o tagata totoa malolosi o le ʻautau, e toʻa 7,100.

26 E mai i le ʻau sa Levī, e toʻa 4,600. 27 O Ioiata+ le taʻitaʻi o le fanauga a Arona,+ sa faatasi ma ia le toʻa 3,700, 28 faapea foʻi Satoka+ o se tauleʻaleʻa e toa ma malosi, ma taʻitaʻi e toʻa 22 mai i le aiga o lona tamā.

29 E mai i le fanauga a Peniamina, o uso* o Saulo,+ e toʻa 3,000, ma o le toʻatele o i latou na lagolagoina muamua ma le faamaoni le aiga o Saulo. 30 E mai i le fanauga a Efaraima, e toʻa 20,800 tagata totoa malolosi, o tagata taʻutaʻua i aiga o o latou tamā.

31 E mai i le ʻafa o le ituaiga o Manase, e toʻa 18,000 na filifilia e ō mai e fai Tavita ma tupu. 32 E mai i le fanauga a Isakara o ē na iloa tonu le taimi e tatau ona gaoioi ai Isaraelu, e toʻa 200 o latou taʻitaʻi, ma e usiusitaʻi o latou uso* uma iā i latou. 33 E mai i le ituaiga o Sepulona, e toʻa 50,000 ē na mafai ona ō i le taua, ua faapotopoto faatasi ma a latou auupega uma e tau, na ō atu uma e ʻau ma Tavita e aunoa ma le faalotolotolua. 34 E mai i le ituaiga o Nafatali, e toʻa 1,000 taʻitaʻi, ma na iā i latou foʻi le toʻa 37,000 e iai talipupuni tetele ma tao. 35 E mai i le ituaiga o Tanu, o i latou na faapotopoto faatasi e tau, e toʻa 28,600. 36 E mai i le ituaiga o Asera, o i latou na faapotopoto faatasi e tau, e toʻa 40,000.

37 E mai i le isi itu o Ioritana,+ o tagata Reupena, o tagata Kato, ma le ʻafa o le ituaiga o Manase, e toʻa 120,000 fitafita na iai auupega eseese uma mo le taua. 38 O i latou uma o tagata o le taua ua ‘au faatasi e sauni e tau; ua latou ō mai ma le lotoatoa i Heperona ina ia fai Tavita ma tupu o Isaraelu uma; ua lotogatasi foʻi ē uma na totoe o Isaraelu ina ia fai Tavita ma tupu.+ 39 Ua latou nonofo ai i inā ma Tavita i aso e tolu, ua aai ma inu auā na saunia e o latou uso na mea mo i latou. 40 O ē foʻi e latalata atu iā i latou, faapea ma ē e ō mai mai i mea mamao e pei o Isakara, o Sepulona, ma Nafatali, ua latou aumai meaʻai i luga o asini, o kamela, o miula, ma povi, o falaoamata, o keke o mati mamago, o keke vine, o uaina, o suāuu, faapea povi ma mamoe e matuā tele lava, auā ua olioli Isaraelu.