Faamasino

3 O nuu nei na tuua e Ieova ina ia tofotofoina ai tagata uma o Isaraelu e leʻi auai i taua a Kanana+ 2 (ina ia tofo ai tupulaga o loo fai mai o Isaraelu i taua, o i latou ia e le‘i auai muamua i ni taua): 3 o alii e to‘alima o Filisitia,+ o tagata uma o Kanana, o tagata Saitonu,+ ma tagata Hivī+ na nonofo i le mauga o Lepanona,+ e amata mai i le mauga o Paala-heremone e oo atu i Lepo-amato.*+ 4 Na avea pea i latou ma mea e tofotofoina ai Isaraelu, ina ia iloa ai pe e usiusitaʻi Isaraelu i poloaʻiga a Ieova na ia poloaʻi atu ai i o latou tamā e ala iā Mose.+ 5 O lea na nonofo ai le fanauga a Isaraelu faatasi ma tagata Kanana,+ o tagata Hetī, o tagata Amorī, o tagata Perisē, o tagata Hivī, ma tagata Iepusē. 6 Na latou faiavā i o latou afafine, ua avatu foʻi o latou afafine i o latou atalii, ma auauna atu i o latou atua.+

7 Ua faia e le fanauga a Isaraelu mea e leaga i le silafaga a Ieova, ua galo iā i latou Ieova lo latou Atua, ma ua latou auauna iā Paala+ ma pou paia.*+ 8 O le mea lea na matuā toʻasā ai Ieova iā Isaraelu, ma na ia faatauina atu ai i latou i lima o Kusa-risatima le tupu o Mesopotamia.* Na auauna le fanauga a Isaraelu iā Kusa-risatima mo tausaga e valu. 9 Ona alalaga atu lea o le fanauga a Isaraelu iā Ieova mo se fesoasoani.+ Ua tofia e Ieova se faaola mo le fanauga a Isaraelu e faaolaina i latou,+ o Otinielu+ lea le atalii o Kinasa, le uso laʻitiiti o Kalepo. 10 Ona oo lea i ona luga o le agaga o Ieova,+ ma ua avea ai o ia ma faamasino iā Isaraelu. Ina ua alu atu o ia i le taua, ona tuuina mai lea e Ieova o Kusa-risatima le tupu o Mesopotamia* i lona lima, ma ua ia faatoʻilaloina Kusa-risatima. 11 Ua mavae lenā, ona filemu lea o le laueleele mo tausaga e 40. Mulimuli ane, ona oti ai lea o Otinielu le atalii o Kinasa.

12 Na toe faia foʻi e le fanauga a Isaraelu mea e leaga i le silafaga a Ieova.+ Ona faataga lea e Ieova o Ekelona le tupu o Moapi+ ina ia sili atu lona malosi nai lo o Isaraelu, auā ua latou faia mea e leaga i le silafaga a Ieova. 13 Ua faapotopoto faatasi foʻi e Ekelona o tagata Amonī+ ma tagata Amaleka+ e faasagatau iā i latou. Ona latou osofaʻia lea o Isaraelu ma faoa le aai o laau o pama.+ 14 Ua auauna le fanauga a Isaraelu iā Ekelona le tupu o Moapi mo tausaga e 18.+ 15 Ona alalaga atu lea o le fanauga a Isaraelu iā Ieova mo se fesoasoani.+ O lea, na tofia ai e Ieova se faaola mo i latou,+ o Euta+ le atalii o Kera mai i le ituaiga o Peniamina,+ o se tagata e lima tauagavale.+ Ua auina atu e le fanauga a Isaraelu e ala iā te ia, le meaalofa* na faatonuina e Ekelona le tupu o Moapi. 16 Ona faia lea e Euta o se pelu mo ia, e ma‘ai uma ona itu, o lona umi e tusa ma le kupita.* Ua ia fusi foʻi le pelu i lona ogāvae taumatau i totonu o lona ofu. 17 Ua ia tuuina atu le meaalofa iā Ekelona le tupu o Moapi, ma o Ekelona o se tagata e matuā puta tele.

18 Ina ua uma ona tuuina atu e Euta le meaalofa, ona latou ō ese lea ma tagata na aumaia le meaalofa. 19 Ae ina ua taunuu i le mea o iai tupua ua tā* i Kilikala,+ ona toe fo‘i lea o Euta ma faapea atu: “Le tupu e, e iai se feʻau faalilolilo mo oe.” Ona faapea mai lea o le tupu: “Aua le pisa!” O lea, na ō ai i fafo ana auauna uma. 20 Ua alu atu Euta iā te ia a o nofo na o ia i lona potu faasavili pito i luga. Ona faapea atu lea o Euta: “Ua iā te aʻu se feʻau mai le Atua mo oe.” Ona ia tulaʻi lea mai i lona nofoālii.* 21 Ona tago lea o le lima tauagavale o Euta, ma seʻi mai le pelu mai i lona ogāvae taumatau ma sunu‘i i le manava o le tupu. 22 Ua goto atoa le pelu ma lona ʻau i le manava, ma ua lilo ai le pelu ona o le puta o lona manava, auā e na te leʻi se‘iina mai i fafo le pelu, ma ua sau ai i fafo lona otaotavale. 23 Ua alu i fafo Euta e ui atu i le faapaologa,* ua ia tapuni foʻi faitotoʻa o le potu pito i luga ma loka. 24 Ina ua alu o ia i fafo, ona ō mai lea o auauna ma iloa ua loka faitotoʻa o le potu pito i luga. Ona latou faapea ane lea: “Ai o alu i le faleese* i lona potu faasavili.” 25 Ua latou faatalitali pea, ma ua oo ina popole i latou. Ina ua latou iloa e na te le‘i tatalaina lava faitotoʻa o le potu i luga, ona latou ave lea o le ki ma tatala ai faitotoʻa, ma latou vaaia ai ua paʻū i lalo* lo latou alii, ua oti.

26 Ae ua sola Euta a o latou faatali pea, ma ua ia ui atu i le mea o iai tupua ua tā*+ ma taunuu ma le saogalemu i Seirata. 27 Ina ua taunuu o ia, ona ia ilia lea o le pū+ i le vaega maugā o Efaraima;+ ua ō ifo foʻi le fanauga a Isaraelu faatasi ma ia e ō ese mai i le vaega maugā, ma ua ia taʻitaʻia i latou. 28 Ua ia fai atu iā i latou: “Ia mulimuli mai iā te aʻu, auā ua tuuina mai e Ieova o outou fili o Moapi i o outou lima.” Ona latou mulimuli atu lea iā te ia, ma ua latou maua vaega e sopoʻia ai le vaitafe* o Ioritana ina ia pu‘ea ai tagata Moapi, ma e latou te leʻi faatagaina se tasi e sopo‘ia. 29 Ua latou fasiotia tagata Moapi pe tusa ma le toʻa 10,000 i lea taimi,+ o tane e malolosi ma totoa; ma e leai se tasi na sao.+ 30 Ua faatoʻilaloina Moapi i lima o Isaraelu i lenā aso; ma ua filemu le laueleele mo tausaga e 80.+

31 Ua mavae atu o ia, ona tula‘i mai lea o Samekara+ le atalii o Anato, ua ia fasiotia foʻi tane Filisitia e toʻa 600+ i le tui povi;+ ma ua ia faaolaina ai Isaraelu.