Ieremia

32 Ua oo mai le afioga a Ieova iā Ieremia i le tausaga lona 10 o le nofoaiga a Setekaia le tupu o Iuta, o le tausaga lona 18 lea o le nofoaiga a Nepukanesa.+ 2 O le taimi lenā na siʻomia ai Ierusalema e ʻautau a le tupu o Papelonia, a o taofia le perofeta o Ieremia i le Lotoā o le Leoleo,+ i le maota o le tupu o Iuta. 3 Auā na taofia ai o ia e Setekaia le tupu o Iuta,+ ua faapea mai: “Aiseā ua e vavalo ai faapea? Ua e faapea mai, ‘O le mea lenei ua fetalai mai ai Ieova: “Ou te tuuina atu lenei aai i le lima o le tupu o Papelonia, ma e na te faatoʻilaloina lava,+ 4 e lē sao foʻi Setekaia le tupu o Iuta mai i le ʻau Kaletaia, auā e tuuina atu lava o ia i le lima o le tupu o Papelonia, e la te tautatala faafesagaʻi ma ia, ma fevaaiaʻi foʻi o laʻua mata.”’+ 5 ‘E ave e ia o Setekaia i Papelonia, ma e iai pea o ia i inā seʻia ou liliu atu iā te ia,’ ua fetalai mai ai Ieova. ‘E ui lava ina outou faasagatau pea i le ʻau Kaletaia, ae e tou te lē manumalo ai.’”+

6 Ua faapea atu Ieremia: “Ua oo mai le afioga a Ieova iā te aʻu, e faapea, 7 ‘O lea e sau iā te oe Hanameali le atalii o Saluma le uso o lou tamā ma faapea mai: “Ia e faatau mo oe loʻu fanua o loo i Anatota,+ auā ua iā te oe le aiā e muamua toe faatau mai ai.”’”+

8 Ona sau lea iā te aʻu o Hanameali le atalii o le uso o loʻu tamā, i le Lotoā o le Leoleo, ma faapea mai iā te aʻu e tusa ma le afioga a Ieova: “Inā e faatau ia loʻu fanua faamolemole o loo i Anatota, i le nuu o Peniamina, auā o loo iā te oe le aiā e ave ai ma toe faatau mai ai. Ia e faatau mo oe.” Ona ou iloa ai lea, o le afioga lea mai iā Ieova.

9 Ona ou faatau ai lea mai iā Hanameali le atalii o le uso o loʻu tamā o le fanua o loo i Anatota. Na ou fuaina atu iā te ia o tupe,+ e fitu sekeli* ma tupe siliva e sefulu. 10 Ona ou tusia lea i se tusi+ ma faamaufaailogaina, na ou aami foʻi ni molimau+ ma ou fuaina tupe i le fua. 11 Na ou ave le tusi o le faatau, o le tusi lea ua faamauina e tusa ma le poloaʻiga ma tulafono, faapea ma le tusi e leʻi faamauina, 12 ona ou avatu lea o le tusi o le faatau iā Paruka+ le atalii o Neria+ o le atalii o Maseia, i luma o Hanameali le atalii o le uso o loʻu tamā, ma molimau o ē na saini i le tusi o le faatau, ma tagata Iutaia uma o loo nonofo i le Lotoā o le Leoleo.+

13 Ona ou poloaʻiina lea o Paruka i o latou luma, e faapea: 14 “O le mea lenei ua fetalai mai ai Ieova o ʻau, o le Atua o Isaraelu, ‘Ia e ave nei tusi, o le tusi o le faatau lea ua faamauina, ma le isi tusi e leʻi faamauina, ia e tuu i totonu o se fagu omea, ina ia teu malu ai mo se taimi umi.’ 15 Auā o le mea lenei ua fetalai mai ai Ieova o ʻau, o le Atua o Isaraelu, ‘E toe faatauina mai fale, o fanua, ma togāvine i lenei nuu.’”+

16 Ina ua uma ona ou avatu le tusi o le faatau iā Paruka le atalii o Neria, ona ou tatalo lea iā Ieova e faapea: 17 “Auē, Ieova e, le Alii Pule Silisili Ese! Faauta! Na e faia le lagi ma le lalolagi i lou mana tele+ ma lou aao faaloaloa. E leai se mea e faigatā iā te oe, 18 o Lē e faaalia le alofa faamaoni i afe o tupulaga, ae taui atu mea sesē a tamā i* a latou fanau pe a mavae atu i latou,+ o le Atua moni, o Lē e sili ma malosi, o Ieova o ʻau lona suafa. 19 E sili oe i fautuaga,* e silisili foʻi i mea na faia,+ o loo silasila ou fofoga i ala uma o tagata,+ ina ia avatu iā i latou taʻitoʻatasi e tusa ma ona ala, e tusa foʻi ma mea e na te faia.+ 20 Na e faia faailoga ma vavega i le nuu o Aikupito, ia ua lauiloa e oo mai i aso nei, ma e faia ai se suafa mo oe lava i Isaraelu ma le fanau a tagata,+ e pei ona iai i le aso nei. 21 Ona e aumaia lea o lou nuu o Isaraelu mai i le nuu o Aikupito, faatasi ma faailoga, o vavega, o le aao malosi, o le aao faaloaloa, ma mea mataʻutia.+

22 “Mulimuli ane, na e foaʻiina atu iā i latou o lenei laueleele na e tautō e avatu i o latou augātamā,+ o se laueleele e tafe ai le suāsusu ma le meli.+ 23 Ona latou ō mai lea ma fai mo i latou, ae e latou te leʻi faalogo i lou siʻufofoga pe savavali i lau tulafono. E latou te leʻi faia mea uma na e poloaʻi ai iā i latou e fai, o le mea lea ua e faaoo ai lenei malaia iā i latou.+ 24 Faauta! Ua ō mai tagata e osofaʻi le aai+ e ala i mea mautiʻetiʻe na tanu e siʻomia ai, ma e tuuina atu lava le aai i lima o le ʻau Kaletaia o ē o loo tau faasaga i ai, ona o le pelu,+ o le oge, ma le faamaʻi;+ ua tutupu foʻi mea uma na e fetalai i ai, e pei ona e silasila i ai. 25 A o oe Ieova e, le Alii Pule Silisili Ese, na e fetalai mai iā te aʻu, ‘Ia e faatau mo oe le fanua i tupe ma aami ni molimau,’ e ui e tuuina atu lava le aai i lima o le ʻau Kaletaia.”

26 Ona oo mai lea o le afioga a Ieova iā Ieremia e faapea: 27 “O aʻu o Ieova, o le Atua o tagata uma. Pe e iai ea se mea e faigatā iā te aʻu? 28 O le mea lea ua fetalai mai ai Ieova, ‘Ou te tuuina atu lenei aai i le ʻau Kaletaia ma le lima o Nepukanesa le tupu o Papelonia, ma e faatoʻilaloina lava e ia.+ 29 E ō mai foʻi le ʻau Kaletaia o ē o loo tau faasaga i lenei aai ma faamū lenei aai i le afi, ma susunu ai lava,+ atoa foʻi ma fale na faia ai taulaga iā Paala i o latou luga, ma liligi atu ai taulaga i meainu i isi atua ina ia faatigā mai ai iā te aʻu.’+

30 “‘Auā e na o mea leaga lava ua faia e le fanauga a Isaraelu ma le fanauga a Iuta i oʻu luma, e mai lava i lo latou talavou;+ ua faatigā mai pea le fanauga a Isaraelu iā te aʻu i galuega a o latou lima,’ ua fetalai mai ai Ieova. 31 ‘Auā talu mai lava le aso na fausia ai lenei aai e oo mai i le aso nei, e na o le faatupu ai o loʻu ita ma loʻu to‘asā,+ ina ia aveesea ai lenei aai mai i oʻu luma,+ 32 ona o mea leaga uma na faia e le fanauga a Isaraelu ma Iuta e faatigā mai ai iā te aʻu, o i latou, o o latou tupu,+ o o latou perenise,+ o o latou ositaulaga, o o latou perofeta,+ o tagata o Iuta, ma ē o loo nonofo i Ierusalema. 33 Ua ū mai pea o latou tua iā te aʻu ae e lē o o latou mata;+ e ui lava ina ou taumafai e aʻoaʻoina pea lava pea i latou,* ae e leai se tasi o i latou na faalogo ina ia talia le aʻoaʻiga.+ 34 Ua latou tuu a latou tupua inosia i le fale ua taʻua ai loʻu igoa, ina ia faaleagaina ai.+ 35 E lē gata i lea, ua latou fausia mea maualuluga iā Paala i le vanu o Hinoma,*+ ina ia latou faaui ane ai o latou atalii ma o latou afafine i le afi iā Moloka,+ o se mea ou te leʻi poloaʻi atu ai iā i latou,+ ma e le‘i alu a‘e foʻi i loʻu loto* e faia lea mea inosia, ma faatupu ai le agasala iā Iuta.’

36 “O lea, o le mea lenei ua fetalai mai ai Ieova le Atua o Isaraelu e faatatau i lenei aai na outou fai mai e tuuina atu i le lima o le tupu o Papelonia, e ala i le pelu, o le oge, ma le faamaʻi, 37 ‘Ou te faapotopoto faatasi i latou mai i nuu uma na ou faataapeape i ai i latou i loʻu ita, o loʻu to‘asā, ma loʻu to‘atama‘i tele,+ ou te toe aumaia foʻi i latou i lenei mea ma faanonofo ai ma le saogalemu.+ 38 E avea i latou ma oʻu nuu, e avea foʻi aʻu ma o latou Atua.+ 39 Ou te foaʻiina atu iā i latou le loto e tasi+ ma le ala e tasi ina ia latou matataʻu ai pea iā te aʻu, mo lo latou lava lelei ma le lelei o a latou fanau pe a mavae atu i latou.+ 40 Ou te osia foʻi se feagaiga ma i latou e faavavau,+ ina ia ou lē liliuese mai i le faia o mea lelei iā i latou;+ ma ou te tuu i o latou loto le mataʻu iā te aʻu, ina ia latou lē liliuese ai mai iā te aʻu.+ 41 O le a ou olioli iā i latou ma o le a ou faia mea lelei mo i latou,+ ou te totōina lava i latou i lenei laueleele+ ma loʻu lotoatoa ma loʻu malosi atoa.’”

42 “Auā o le mea lenei ua fetalai mai ai Ieova, ‘E pei lava ona ou faaoo i lenei nuu o lenei mala tele uma, e faapea foʻi ona ou faaoo iā i latou o mea lelei uma ua ou folafola atu iā i latou.+ 43 E toe faatauina mai fo‘i fanua i lenei nuu,+ e ui ua outou faapea ane: “Ua faatafunaina, e lē o iai se tagata po o se manu, ma ua tuuina atu i le ʻau Kaletaia.”’

44 “‘E faatau mai fanua i tupe, e tusia foʻi tusi o le faatau ma faamaufaailogaina, e aami foʻi molimau i le nuu o Peniamina,+ i nuu o loo siʻomia ai Ierusalema, i aai o Iuta,+ i aai o vaega maugā, i aai o le fanua maulalo,+ ma aai i le itu i saute, auā ou te toe aumaia i latou na ave faapagota,’+ ua fetalai mai ai Ieova.”