Numera

4 Ua fetalai mai Ieova iā Mose ma Arona e faapea: 2 “Ia faitau le aofaʻi o atalii o Koato+ mai i atalii o Levi, e tusa ma o latou aiga, ma aiga o o latou tamā, 3 e amata mai i le 30 tausaga+ le matutua e oo atu i le 50 tausaga,+ o ē uma e i le vaega ua tofia e galulue i le faleʻie o le feiloaʻiga.+

4 “O le galuega lenei a atalii o Koato i le faleʻie o le feiloaʻiga.+ O se mea lea e sili ona paia: 5 Pe a latou sauni e ō, e ao iā Arona ma ona atalii ona ulufale i le faleʻie, ma e latou te tatala i lalo le ʻie puipui+ ma ufiufi ai le atolaau+ o le feagaiga.* 6 E latou te ufiufi i paʻu takesa ma fofola ai i luga se ʻie lanu moana ma sulu ai ona amo.+

7 “E latou te fofola fo‘i le ʻie lanu moana i luga o le laulau+ lea e laulauina ai le falaoa, ma e latou te tuu ai ipu mafolafola, o ipu, o ipu faaofuofu, ma fagu e ave ai le taulaga i meainu;+ e ao ona faaauau ona iai i luga falaoa+ e ofoina atu pea. 8 E latou te fofola le ʻie ua vali mūmū sesega i luga o ia mea, e ao foʻi ona latou ufiufi i paʻu takesa ma sulu ai ona amo.+ 9 Ona latou ave lea o le ʻie lanu moana ma ufiufi ai le tuugāmolī+ e faamalamalama ai, o ona molī,+ o ona iofi, o ona salefu,+ ma ipu uma e tuu ai le suāuu ua latou faaaogā mo molī. 10 E latou te tuu ai foʻi ma isi ana mea uma i totonu o le ufiufi o le paʻu takesa, ma tuu i luga o se laau e ave ai. 11 E latou te fofola le ʻie lanu moana i luga o le fata faitaulaga auro,+ ona latou ufiufi lea i paʻu takesa ma sulu ai ona amo.+ 12 E latou te ave mea uma+ o le auaunaga e masani ona faaaogā i le auaunaga i le mea paia, ma tuu ia mea i se ʻie lanu moana ma ufiufi ai i paʻu takesa, ma tuu i luga o se laau e ave ai.

13 “E latou te aveese lefulefu* mai i le fata faitaulaga,+ ma fofola ai i luga se ʻie ua vali lanu violē. 14 E latou te tuu ai i luga o mea uma e latou te faaaogāina pe a auauna i le fata faitaulaga: o salefu, o tui, o suō, o ipu faaofuofu, ma mea uma o le fata faitaulaga;+ e latou te fofola ai foʻi i luga le ufiufi o le paʻu takesa ma sulu ai ona amo.+

15 “E ao iā Arona ma ona atalii ona faamāeʻa le ufiufiina o le mea paia,+ ma mea uma e faaaogā i le mea paia pe a latou sauni e ō. Ona ō mai lea o atalii o Koato e latou te amoina ia mea,+ ae aua lava neʻi o latou papaʻi atu i le mea paia neʻi latou feoti.+ O tiute tauave* nei a atalii o Koato e fesoota‘i ma le faleʻie o le feiloaʻiga.

16 “O Eleasaro+ le atalii o Arona le ositaulaga, e vaaia le suāuu mo molī,+ o le mea manogi lelei+ e faamū, o taulaga i meaʻai* i aso fai soo, ma le suāuu e faauu ai.+ O ia foʻi e vaaia le faleʻie paia uma ma mea uma ua iai, e aofia ai le mea paia ma mea uma ua iai.”

17 Ua fetalai atili mai Ieova iā Mose ma Arona e faapea: 18 “Aua neʻi tuua le ituaiga o aiga o Koato+ ia fasiotia mai i le ʻau sa Levī. 19 Ae ia faia lenei mea ina ia ola ai i latou ae lē feoti, ona o le faalatalata atu i mea e sili ona paia.+ O le a ulufale Arona ma ona atalii ma e latou te tofia atu i le tagata lana galuega ma lana avega. 20 Aua neʻi o latou ō mai i totonu e vaavaai i mea paia i sina sekone lava, ina neʻi feoti i latou.”+

21 Ona fetalai mai lea o Ieova iā Mose e faapea: 22 “Ia faitau le aofaʻi o atalii o Keresona,+ e tusa ma aiga o o latou tamā ma o latou aiga. 23 E te lesitalaina i latou e amata mai i le 30 tausaga le matutua e oo atu i le 50 tausaga, o ē uma e i le vaega ua tofia e auauna i le faleʻie o le feiloaʻiga. 24 O le mea lenei ua tofia i aiga o Keresona e latou te vaaia ma tauave:+ 25 E latou te ave ʻie o le faleʻie paia, le faleʻie o le feiloaʻiga,+ o lona ufiufi ma le ufiufi paʻu takesa lea e i le pito i luga,+ le ʻie pupuni o le faitotoʻa o le faleʻie o le feiloaʻiga,+ 26 o ʻie e tautau i le lotoā,+ le ʻie pupuni i le faitotoʻa o le lotoā+ lea e faataamilo i le faleʻie paia ma le fata faitaulaga, o maea o le faleʻie ma mea uma e faaaogā ai, ma mea uma e manaʻomia mo le faia o galuega. O la latou galuega lea. 27 O galuega uma ma mea e ave e le fanauga a Keresona,+ e ao ona vaaia e Arona ma ona atalii; ia e tofia i ai nei mea uma e latou te tauaveina, auā o lo latou tiute tauave lea. 28 O le galuega lenei a aiga o le fanauga a Keresona i le faleʻie o le feiloaʻiga,+ ma o a latou tiute tauave e faia i le taʻitaʻiga a Itamaro,+ le atalii o Arona le ositaulaga.

29 “Ia e lesitalaina atalii o Merari+ e tusa ma o latou aiga, ma aiga o o latou tamā. 30 E te lesitalaina i latou e amata mai i le 30 tausaga le matutua e oo atu i le 50 tausaga, o ē uma e i le vaega ua tofia e auauna i le faleʻie o le feiloaʻiga. 31 O mea nei e ao ona latou aveina+ e fesoota‘i ma a latou galuega i le faleʻie o le feiloaʻiga: o auivi laupapa+ o le faleʻie paia, o ona pou faalava,+ o ona poutū,+ o ona lagolago;+ 32 o poutū+ e soo ai le lotoā, o lagolago,+ o pine+ ma maea o le faleʻie, atoa foʻi ma mea uma e faaaogā ma mea uma e tusa ma lenei auaunaga. E tou te tofia e tusa ma o latou igoa mea e ao ona latou aveina. 33 O le auala lenei e auauna ai aiga o atalii o Merari+ i le faleʻie o le feiloaʻiga, ma e faia i le taʻitaʻiga a Itamaro, le atalii o Arona le ositaulaga.”+

34 Ona lesitalaina lea e Mose ma Arona ma taʻitaʻi+ o le faapotopotoga, o atalii o Koato+ e tusa ma o latou aiga ma aiga o o latou tamā, 35 e amata mai i le 30 tausaga le matutua e oo atu i le 50 tausaga, o ē uma e i le vaega ua tofia e auauna i le faleʻie o le feiloaʻiga.+ 36 O le aofa‘iga o i latou ua lesitalaina e tusa ma o latou aiga, e 2,750.+ 37 O i latou ia mai i aiga o le fanauga a Koato ua lesitalaina, o ē uma ua auauna i le faleʻie o le feiloaʻiga. Ua lesitalaina e Mose ma Arona i latou ona o le faatonuga a Ieova e ala mai iā Mose.+

38 Ua lesitalaina atalii o Keresona+ e tusa ma o latou aiga, ma aiga o o latou tamā, 39 e amata mai i le 30 tausaga le matutua e oo atu i le 50 tausaga, o ē uma e i le vaega ua tofia e auauna i le faleʻie o le feiloaʻiga. 40 O le aofa‘iga o i latou ua lesitalaina e tusa ma o latou aiga ma aiga o o latou tamā, e 2,630.+ 41 O le lesitalaina lenei o aiga o atalii o Keresona, o ē ua auauna i le faleʻie o le feiloaʻiga. Ua lesitalaina e Mose ma Arona i latou ona o le faatonuga a Ieova.+

42 Ua lesitalaina atalii o Merari e tusa ma o latou aiga, ma aiga o o latou tamā, 43 e amata mai i le 30 tausaga le matutua e oo atu i le 50 tausaga, o ē uma e i le vaega ua tofia e auauna i le faleʻie o le feiloaʻiga.+ 44 O le aofa‘iga o i latou ua lesitalaina e tusa ma o latou aiga, e 3,200.+ 45 O le lesitalaina lenei o aiga o atalii o Merari, o ē ua lesitalaina e Mose ma Arona ona o le faatonuga a Ieova e ala mai iā Mose.+

46 Ua lesitalaina e Mose ma Arona ma taʻitaʻi o Isaraelu nei sa Levī uma, e tusa ma o latou aiga ma aiga o o latou tamā; 47 o i latou e amata mai i le 30 tausaga le matutua e oo atu i le 50 tausaga, ma o i latou uma na tofia e auauna ma amoina mea e fesoota‘i ma le faleʻie o le feiloaʻiga.+ 48 O le aofa‘iga o i latou ua lesitalaina, e 8,580.+ 49 Na lesitalaina i latou ona o le faatonuga a Ieova e ala mai iā Mose, e taʻitasi e tusa ma lana galuega ua tofia i ai ma lana avega; na lesitalaina i latou e pei ona poloaʻi mai ai Ieova iā Mose.