Levitiko

27 Ua fetalai mai pea Ieova iā Mose e faapea: 2 “Ia e fai atu i le fanauga a Isaraelu, ma e faapea atu iā i latou, ‘Pe afai e faia e se tagata se tautoga faapitoa+ ina ia ofo atu le tau ua fuafuaina o se tagata iā Ieova, 3 o le tau ua fuafuaina o se tane mai i le 20 tausaga e oo atu i le 60 tausaga le matua, e 50 sekeli* siliva e tusa ma le fua masani o le mea paia.* 4 Ae afai o se fafine, e 30 sekeli le tau ua fuafuaina mo ia. 5 Afai e 5 tausaga e oo atu i le 20 tausaga le matua, e tatau ona 20 sekeli le tau ua fuafuaina mo le tama tama ae 10 sekeli mo le tama teine. 6 Afai e tasi le masina e oo atu i le lima tausaga le matua, e tatau ona lima sekeli siliva le tau ua fuafuaina mo tama ae tolu sekeli siliva mo teine.

7 “‘Afai e 60 tausaga agaʻi i luga le matua, e tatau ona 15 sekeli le tau ua fuafuaina mo le tane ae e 10 sekeli mo le fafine. 8 Ae afai e matuā mativa le tagata ua faia le tautoga ma lē gafatia le tau ua fuafuaina,+ e ao ona tū le tagata i luma o le ositaulaga, ma e faatulaga e le ositaulaga le tau mo ia. E fuafua e le ositaulaga le tau e tusa ma le mea e gafatia e le tagata+ e faia le tautoga.

9 “‘Afai o le tautoga e aofia ai se manu e talafeagai ona ofo atu iā Ieova, o mea uma e avatu iā Ieova e avea ma mea paia. 10 E lē mafai ona ia suia lea mea, pe fesuiaʻi se mea lelei i se mea leaga, po o se mea leaga i se mea lelei. Ae afai e na te fesuiaʻia se manu mo se isi manu, ona paia ai lea o lea manu atoa ma le manu na fesuiaʻi. 11 Afai o se manu e lē mamā+ lea e lē tatau ona ofo atu iā Ieova, e ao ona ia avatu le manu i luma o le ositaulaga. 12 E faatulaga e le ositaulaga le tau e faalagolago i lona lelei po o lona leaga. O le tau ua fuafuaina e le ositaulaga, o le tau lava lea. 13 Ae afai e manaʻo lava o ia e toe faatau mai, e ao ona ia avatu le tasi vaelima e faaopoopo i le tau ua fuafuaina.+

14 “‘Afai e avatu e se tasi lona fale iā Ieova e fai ma mea paia, e ao ona faatulaga e le ositaulaga le tau o le fale e faalagolago i le lelei po o le leaga o le fale. O le ā lava le tau ua faatulaga e le ositaulaga, o le tau lava lea.+ 15 Ae afai e manaʻo lē na avatu lona fale e fai ma mea paia e toe faatau mai lona fale, e ao ona ia avatu le tasi vaelima o le tupe e faaopoopo i le tau ua fuafuaina, ona fai ai lea ma ia.

16 “‘Afai e avatu e se tasi se vaega o lona fanua iā Ieova e fai ma mea paia, e fuafua le tau e tusa ma fatu e lūlū ai: o le somera* o fatu o le karite, e 50 sekeli siliva ia. 17 Afai e na te avatu lona fanua e fai ma mea paia, i le tausaga o le Iupelī+ ma faasolo atu ai, e ao ona tutusa le tau ma le tau ua fuafuaina. 18 Afai e na te avatu lona fanua e fai ma mea paia pe a mavae le Iupelī, ona fuafua lea e le ositaulaga le tau e tusa ma tausaga ia o loo totoe seʻia oo i le isi tausaga o le Iupelī, ona toese lea o se vaega o le tau mai i le tau ua fuafuaina.+ 19 Ae afai e manaʻo lava lē na avatu lona fanua e fai ma mea paia e toe faatau mai lona fanua, e ao ona ia avatu le tasi vaelima o le tupe e faaopoopo i le tau ua fuafuaina, ona faamauina ai lea iā te ia. 20 Afai e na te lē toe faatauina mai le fanua ma ua faatau atu le fanua i se isi tagata, e lē mafai ona toe faatauina mai. 21 Afai e faamatuu atu le fanua i le Iupelī e ao ona avea ma mea paia iā Ieova, o se fanua lea ua taofia mo se fuafuaga paia. O le a fai lea ma fanua o ositaulaga.+

22 “‘Afai e avatu e se tasi iā Ieova se fanua na ia faatauina e fai ma mea paia, ae e lē o se vaega o lona fanua,+ 23 e fuafua e le ositaulaga mo ia le aofaʻi o le tau e tusa ma tausaga seʻia oo atu i le tausaga o le Iupelī, ma e na te totogi le tau ua fuafuaina i lenā aso.+ O se mea paia lea iā Ieova. 24 I le tausaga o le Iupelī e toe faafoʻi atu ai le fanua i lē na ia faatau mai ai, o lē e ana moni le fanua.+

25 “‘E ao ona fuafuaina tau uma e tusa ma le fua masani o le mea paia. E ao ona tusa le sekeli ma le 20 kire.*

26 “‘Peita‘i, aua neʻi avatua e se tasi ulumatua a manu e fai ma mea paia, auā o ulumatua a manu e mo Ieova lava ia.+ E tusa po o se povi poʻa po o se mamoe, o mea lava ia a Ieova.+ 27 Afai e lē mamā se tasi o ia manu ma ua ia toe faatau mai e tusa ma le tau ua fuafuaina, e ao ona ia faaopoopo i ai le tasi vaelima i le tau.+ Ae afai e lē toe faatauina mai, e ao la ona faatau atu e tusa ma le tau ua fuafuaina.

28 “‘Peita‘i, o se mea ua taofia e se tagata mo se fuafuaga paia ma ua faapaiaina e faavavau* iā Ieova mai i ana mea uma, e tusa lava po o se tagata, po o se manu, po o se vaega o lona fanua, e lē mafai ona faatau atu pe toe faatauina mai. O mea uma ua taofia mo se fuafuaga paia, o le mea lea e sili ona paia iā Ieova.+ 29 E lē mafai fo‘i ona toe faatauina mai se tasi ua ta‘usalaina* ma ua tuuesea mo le faaumatiaga.+ E ao lava ona fasiotia o ia.+

30 “‘O le tasi vaesefulu*+ o le fanua, e tusa pe e mai i fatu o le fanua po o fua o laau, e mo Ieova ia mea. O mea paia ia iā Ieova. 31 Afai e manaʻo lava se tasi e toe faatau mai nisi o le tasi vaesefulu o ana mea na avatu, e ao ona ia faaopoopo atu le tasi vaelima i le aofaʻiga o lea mea. 32 O manu lona sefulu uma o le lafu povi ma le lafu mamoe, o mea uma lava e ui ane i lalo o le tootoo o lē e leoleoina lafu, e ao ona avea le manu* lona sefulu ma mea paia iā Ieova. 33 E lē tatau ona ia iloilo po ua lelei po ua leaga, aua foʻi neʻi fesuiaʻia. Afai e na te fesuiaʻia, e ao ona avea lea manu ma le manu lea e fesuiaʻi ma mea paia.+ E lē tatau ona toe faatauina mai.’”

34 O poloaʻiga ia na fetalai mai ai Ieova iā Mose mo le fanauga uma a Isaraelu i le mauga o Sinai.+